រាជធានីភ្នំពេញ ៖ បណ្តាញទូរគមនាគមន៍ បច្ចេកវិទ្យាគមនាគមន៍ និងព័ត៌មាន គឺជាផ្នែកមួយដ៏សំខាន់ដែលដើរតួនាទីស្នូល ធ្វើជាឆ្អឹងខ្នងសម្រាប់ឲ្យសេវាអនឡាញនានាដំណើរការបានទៅដោយរលូន ប្រកបដោយសន្តិសុខ និងសុវត្ថិភាព ។ ទោះជាយ៉ាងនេះក្ដី ក៏ទទួលរងនូវហានិភ័យផងដែរ ពិសេសត្រូវក្រុមHacker លួចចូលយកទិន្នន័យ ឬគ្រប់គ្រងគណនីទៅប្រើប្រាស់តែម្ដង ខណៈការយល់ដឹងពីវិស័យនេះនៅមានកម្រិត ។
ដោយសារតែមានការកើនឡើងនូវការHackចូលក្នុងគណនីហ្វេសប៊ុករបស់ថ្នាក់ដឹកនាំ ក្រសួងស្ថាប័នរាជរដ្ឋាភិបាល និងសាធារណជនទូទៅ ក្រសួងប្រៃសណីយ៍ និងទូរគមនាគមន៍ បានរៀបចំកិច្ចប្រជុំមួយ ស្តីពីការពង្រឹងសន្តិសុខក្នុងការប្រើប្រាស់បណ្ដាញទូរគមនាគមន៍ និងព័ត៌មាន កាលពីថ្ងៃទី១៣ មីនា ដោយមានការចូលរួមពី អគ្គស្នងការនគរបាលជាតិ ប្រតិបត្តិករ និងបុគ្គលពាក់ព័ន្ធ ក្នុងគោលបំណងដើម្បីស្វែងយល់អំពីស្ថានភាពសន្តិសុខ(security) ក្នុងការប្រើប្រាស់បណ្តាញទូរគមនាគមន៍ បច្ចេកវិទ្យាគមនាគមន៍ និងព័ត៌មាន ។
លោក តាន់ សុភ័ក្រ អនុប្រធាននាយកដ្ឋានសន្តិសុខទូគមនាគមន៍ និងព័ត៌មាន បានលើកឡើងថា នៅក្នុងលក្ខណៈបច្ចេកទេស មិនមានកំណត់ប្រព័ន្ធណាមានចំណុចខ្សោយទេ ប៉ុន្តែអ្នកបច្ចេកទេសសន្និដ្ឋានថា ក្រុមHackerអាចលួចសារ(SMS)ពីទូរស័ព្ទដៃរបស់អ្នកប្រើប្រាស់បានតាមរយៈ៤ចំណុចដូចជា ៖
១-លួចតាមប្រព័ន្ធទូរស័ព្ទដៃនៅពេលផ្ញើសារ ។
២-មានអ្នកផ្ទៃក្នុងផ្តល់សារទៅកាន់ពួកHacker ។
៣- តាមការសិក្សាឃើញថា ការផ្សាយនូវ SS7 ( Signaling System7)ជាប្រព័ន្ធមួយដែលក្រុមហ៊ុនទូរស័ព្ទនៅលើពិភពលោកមួយចំនួនបានប្រើប្រាស់ ដែលអាចឲ្យក្រុមHackerលួចសារពីប្រព័ន្ធទូរស័ព្ទដៃបាន ។
៤- អ្នកប្រើប្រាស់យកទូរស័ព្ទដៃទៅដំឡើងកម្មវិធីមួយចំនួនដែលមិនដឹងប្រភពច្បាស់លាស់ ហើយបំពេញទិន្នន័យដើម្បីប្រើប្រាស់ ដូច្នេះក្រុមHacker អាចលួចសារតាមរយៈការចុះឈ្មោះនោះ និងធ្វើការគ្រប់គ្រង ដោយប្ដូរលេខសម្ងាត់តែម្ដង ។
លោកបានបញ្ជាក់ថា បើតាមការចេញផ្សាយរបស់ ss7map.p1sec.com ដែលបង្ហាញពីកម្រិតហានិភ័យនៅលើពិភពលោក ក្នុងនោះប្រទេសកម្ពុជាយើងក៏បានជួបនឹងss7 ដែរ ដែលកម្រិតរបស់វាគឺមានហានិភ័យខ្ពស់ ដែលអាចឲ្យជនអនាមិគលួចបាននូវព័ត៌មាននៃការប្រើប្រាស់ទូរស័ព្ទដៃរបស់យើង ដូចជាលេខទូរស័ព្ទ ការប្រើប្រាស់អ៊ីនធើរណេតតាមរយៈទូរស័ព្ទដៃ ឬការហៅចេញហៅចូលរបស់អ្នកប្រើប្រាស់ទូរស័ព្ទដៃជាដើម ។
លោក ម៉ុក ខេមរា ប្រធាននាយកដ្ឋានទូរគមនាគមន៍ និងព័ត៌មាន បានគាំទ្រនឹងការលើកឡើងនេះ ដោយសារថ្មីៗនេះលោកបានជួបបញ្ហាដោយផ្ទាល់ តាមរយៈការភ្ជាប់ជាមួយនឹងលេខទូរស័ព្ទ និងEmailរបស់លោក ។
លោកថ្លែងថា ៖« ការHack គឺមកពីការដាក់recovery password តាមSMS អីចឹងរាល់ពេលដែលគេបានយកគណនីរបស់ខ្ញុំយកទៅគ្រប់គ្រង គឺមានការLoginតាមហ្នឹងរហូត ទាល់តែខ្ញុំដកSMSចេញ ទើបស្ងាត់ ហើយភាគច្រើនគេHackនៅពេលយប់ ជាពេលដែលយើងមិនចាប់អារម្មណ៍ ។ ក្រៅពីហ្វេសប៊ុក គឺយើងអាចមានហានិភ័យមួយផ្សេងទៀត តាមរយៈTelegram និងWhatsApp ជាដើម ព្រោះវាទាក់ទងនឹងSMSទាំងអស់។ អីចឹងជនអនាមិគ អាចចូលបាន ហើយលួចយកទិន្នន័យរបស់យើងទាំងអស់ » ។
លោកបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានលើកឡើងថា ចាប់តាំងពីឆ្នាំ២០១៧មក មានការវាយប្រហារតាមប្រព័ន្ធអ៊ីនធើរណេតកើនឡើងយ៉ាងខ្លាំង ជាពិសេសក្នុងអំឡុងខែកញ្ញា រហូតដល់ដើមឆ្នាំ២០១៨ គឺកើតឡើងដោយសារSMSទាំងអស់ ។
លោកថ្លែងថា ៖« ការវាយប្រហារភាគច្រើនគឺតាមរយៈហ្វេសប៊ុក ព្រោះLink មួយចំនួនដែលយើងធ្វើការប្រើប្រាស់គឺជាLink តាមហ្វេសប៊ុក ប៉ុន្តែនៅពេលដែលយើង Accessចូលតាមរយៈហ្វេសប៊ុក គឺយើងប្រើប្រាស់នូវប្រព័ន្ធសន្តិសុខមួយដែលហៅថា ប្រព័ន្ធសន្តិសុខពីរជំហាន (2-step verification or 2-step authentication) គឺការប្រើប្រាស់ SMS ឬ Email ។ បើសិនជាSMSទទួលនូវការវាយប្រហារ គឺយើងអាចប្រើតាមរយៈ Email ជំនួសវិញ »។
លោកក៏បានជំរុញឲ្យប្រតិបត្តិករនាំគ្នាថែរក្សាទិន្នន័យឯកជន ពិសេសSMS ព្រមទាំងការហៅចេញចូលរបស់អ្នកប្រើប្រាស់ទាំងអស់ ហើយត្រូវធ្វើរបាយការណ៍សុវត្ថិភាពពីប្រព័ន្ធទាំងនេះជូនក្រសួង ដើម្បីពិនិត្យនិងធានាសុវត្ថិភាពរបស់អ្នកប្រើប្រាស់ ។
គួរបញ្ជាក់ថា នៅក្នុងដើមឆ្នាំ២០១៨ នេះអ្នកប្រើប្រាស់ហ្វេសប៊ុកនៅកម្ពុជាបានកើនឡើងដល់៦លាន៨សែននាក់ បើធៀបនឹងឆ្នាំ២០១៧មានចំនួន៤លាន៨សែននាក់ ។ ការពង្រឹងសន្តិសុខក្នុងការប្រើប្រាស់បណ្តាញទូរគមនាគមន៍បច្ចេកវិទ្យាគមនាគមន៍ និងព័ត៌មាន គឺជាកត្តាចាំបាច់មួយដែលប្រតិបត្តិករទាំងអស់ត្រូវយកចិត្តទុកដាក់ ៕
ចែករំលែកព័តមាននេះ