រាជធានីភ្នំពេញ ៖ គិតដល់ខែមីនានេះ ហាងបុកល្ហុងរបស់អតីតកីឡាករល្បីឈ្មោះសែន រ៉ាឌី មានរយៈពេលពេញ១ឆ្នាំ ហើយមុខរបររបស់លោកក៏ទទួលបានការគាំទ្រខ្លាំង
ណាស់ដែរ បើទោះជាមុខរបរនេះមានការប្រកួតប្រជែងច្រើនពីសំណាក់អ្នកមានជំនាញ និងបើកហាងដូចគ្នាក្ដី ។ លោកបានបង្ហាញវត្តមានក្នុងហាងបុកល្ហុង ដែលដាក់យីហោថា «សែន រ៉ាឌី បុកល្ហុង» នៅទល់មុខផ្សារស៊ីឡិប មិនដែលបាត់មុខនោះទេ ខណៈក្រៅពីធ្វើជាថៅកែជាមួយដៃគូ លោកក៏ជាអ្នកធ្វើម្ហូបទទួលភ្ញៀវ និងជាអ្នកបុកល្ហុងជូនភ្ញៀវដោយផ្ទាល់ដៃផងដែរ ។ លោកបានបង្ហើបឱ្យដឹងពីស្ថានភាពផ្ទាល់ខ្លួនក្រោយក្លាយជាថៅកែហាង និងការលំបាកជុំវិញការកែច្នៃរសជាតិប្លែកៗដើម្បីទាក់ទាញភ្ញៀវឱ្យជាប់ចិត្តនោះផង។
កីឡាករសាច់សខ្ចីមិនសមជាអ្នកប្រដាល់យកសាច់ស្រស់ទៅប្ដូរលើរេញរូបនេះនិយាយថា មុនឈានដល់ការបណ្ដាក់ទុនបើកហាងបុកល្ហុងជាមួយដៃគូ លោក និងដៃគូមិនមែនដំឡូងមូលនោះទេ គឺបានចេញទៅហាត់ជំនាញធ្វើបុកល្ហុង និងជំនាញធ្វើគ្រឿងក្លែមផ្សេងៗយ៉ាងស្ទាត់ជំនាញរយៈពេល២ខែឯណោះ ទើបឈានដល់ការប្រមូលលុយសន្សំពីការប្រដាល់ និងពីការងារផ្សេងមកបើកហាងបុកល្ហុងនេះនិងគ្រឿងសមុទ្រ។
លោកគឺជាអ្នកចេញម្ហូប និងច្នៃដោយខ្លួនឯងផង ដូច្នេះក្រៅពីធ្វើជាថៅកែ លោកក៏មិនខុសពីចុងភៅម្នាក់ដែរ ។ លោកថែមទាំងចេះលាយគ្រឿងដែលមានឱជារសដោយផ្ទាល់ដៃទៀតផង ក្រៅពីចេះធ្វើម្ហូបច្រើនមុខក្នុងនាមជាថៅកែនោះ ។ យ៉ាងណាមិញ លោកបានបង្ហាញពីការលំបាកតាំងពីបានក្លាយជាថៅកែ ដោយក្នុងពេលខ្លះស្ទើរមិនមានពេលសម្រាក និងពេលវេលាផ្ទាល់ខ្លួន ដោយសារតែមានការទទួលខុសត្រូវកាន់តែច្រើន មិនថាមើលខុសត្រូវហាង មិនថាចាត់ចែងរឿងធ្វើគ្រឿងម្ហូបអាហារ និងចាត់ចែងផ្សេងៗទៀត ដែលមិនចេះតែប្រហែសបាន ។
លោកសម្ដែងអារម្មណ៍កាន់តែឆ្ងាយពីការប្រដាល់ ដោយអះអាងថា បើទោះជាលោកនៅស្រឡាញ់ការប្រដាល់ ក៏លែងមានពេលហ្វឹកហាត់បង្កើនសមត្ថភាពរបស់ខ្លួននៅលើវិស័យនេះដែរ ដើម្បីកុំឱ្យមានការរិះគន់ណាមួយថាលោកឡើងប្រកួតធ្លាក់ដៃ ហើយមិនល្អដូចមុន ។ លោកថា មិនមែនដោយសារតែក្លាយជាថៅកែទើបចង់ឈប់ប្រដាល់ទាំងស្រុងនោះទេ ប៉ុន្តែបណ្ដាលមកពីការប្រដាល់បើខ្វះការហ្វឹកហាត់ជាប់លាប់ គឺមិនអាចទៅរួច និងមិនអាចប្រថុយយកកេរ្តិ៍ឈ្មោះទៅចោលលើរេញ ដោយសារតែហេតុផលចង់ប្រដាល់នោះទេ ទើបឈប់តែម្ដងដើម្បីស៊ប់នឹងការងារបើកហាងឱ្យកាន់តែល្អ ក្នុងពេលដែលលោកក៏មានការរវល់កាន់តែច្រើនក្នុងអាជីពបើកហាងនោះ ។ ប៉ុន្តែលោកក៏មិនមានគម្រោងបោះបង់ការប្រដាល់រហូតនោះដែរ ដោយលោកនៅតែទទួលយកការប្រកួតកីឡាវ៉ូវីណាមមិនចោលនោះទេ ដើម្បីបានរួមចំណែកលើកស្ទួយវិស័យកីឡាមួយនេះឱ្យនៅតែរឹងមាំតាមតែអាចធ្វើទៅបាន ។ លោកនិយាយថា ដោយសារតែការប្រដាល់នោះហើយ ដែលជួយឱ្យលោកអាចបើកហាងបាន ដោយអ្នកស្គាល់លោកនៅក្នុងពិភពប្រដាល់ភាគច្រើន សុទ្ធតែមកគាំទ្រស្នាដៃបុកល្ហុងរបស់លោក ទើបធ្វើឱ្យមុខរបររបស់លោកទទួលបានភាពរីកចម្រើនមកទល់ពេលនេះ។
លោក សែន រ៉ាឌី និយាយថា ជារៀងរាល់ថ្ងៃតាំងពីលោករៀនចប់មហាវិទ្យាល័យ លោករវល់រឿងហាងទាំងមូលមិនសូវទំនេរបានដេក បានដើរនោះទេ ខណៈដែលការទៅណាមកណាម្ដងៗក៏ត្រូវចាត់ចែងការងារឱ្យស្រេចទាំងការផ្សំគ្រឿង និងការងារផ្សេងទៀតៗ ដោយសារតែក្នុងហាងទាំងមូលលោកគឺជាអ្នកច្នៃម្ហូប និងគ្រឿងផ្សំប្រចាំហាង ។ លោកថា ជារៀងរាល់ថ្ងៃ លោកត្រូវរិះរកមុខម្ហូបថ្មី ហើយក្រៅពីផ្សំគ្រឿងលោកក៏ស្ទាត់នឹងជំនាញបុកល្ហុងបែបថៃ បែបឡាវ និងបែបខ្មែរមានរសជាតិប្លែកផងដែរ ទើបហាងរបស់លោកទទួលបានការគាំទ្រ ។ ក្នុងមួយថ្ងៃៗ មិនដែលមានថ្ងៃណា ដែលលោកមិនខ្វល់ពីការងារថ្មីនេះទេ ដោយលោកយល់ថា នេះ ជាមុខរបរដែលធ្វើឱ្យលោកកាន់តែយល់ដឹងច្រើន តាំងពីការធ្វើម្ហូប ការគ្រប់គ្រងហាង និងការទទួលខុសត្រូវលើបុគ្គលិកបម្រើ ក៏ដូចជាការសម្របសម្រួលជាមួយបណ្ដាភ្ញៀវនោះផង។
លោកមានគម្រោងពង្រីកមុខជំនួញឱ្យធំជាងនេះ ប៉ុន្តែមិនទាន់ដឹងថារហូតដល់ពេលណាទើបមានលទ្ធភាពនោះទេ ដោយសារតែការគ្រប់គ្រងត្រឹមហាងតូចមួយ ក៏លំបាកសម្រាប់លោកណាស់ទៅហើយ ។ លោកបង្ហាញអារម្មណ៍សប្បាយចិត្តដែលអាជីវកម្មរបស់ខ្លួនកាន់តែទទួលបានជោគជ័យ បើទោះជាលោកត្រូវហត់នឿយបន្តិចតាំងពីក្លាយជាថៅកែម្នាក់ក្ដី ។ មិនខុសពីការលើកឡើង អ្នកប្រដាល់ដែលមានប្រភពមកពីខេត្តកោះកុងរូបនេះក៏ធ្លាប់រៀបរាប់ថា៖« វាអត់អីទេបង! វានៅដំណើការទៅមួយៗដែរ ។ វាក៏មិនស្ងាត់ដែរ មានភ្ញៀវមករហូត។
ដំបូងៗអ៊ីចឹង ចំណូលយើងមិនទាន់ដឹង ព្រោះតែការចំណាយនៅរញ៉េញ៉ៃបន្តិច ។ យើងមិនទាន់គ្រប់គ្រងវាបានច្បាស់លាស់ ចំណាយច្រើនព្រោះវានៅខ្វះខាតមិនទាន់គ្រប់ទាំងអស់ទេ »។
ម្ទាស់មេដាយមាសពិភពលោកវ៉ូវីណាម ឆ្នាំ២០១៥ ដែលមានឈ្មោះដើមថា ទិន ភាព បន្ថែមថា ទុនដំណើរការហាងបុកល្ហុងថ្មីមួយនេះ បានការចូលហ៊ុនជាមួយបងធម៌ម្នាក់ដែលចំណាយសរុប១ម៉ឺន៦ពាន់ដុល្លារ មិនទាន់គិតពីការតុបតែងបន្ថែម ។ សែន រ៉ាឌី បន្ត ៖«បាទសម្រាប់ការបើកហាងមួយនេះចំណាយលុយបើសរុបទៅប្រហែលជា១ម៉ឺនជាងហើយបង។ នេះគ្រាន់តែលើការតុបតែង ហើយនៅមិនទាន់តុបតែងអស់ទៀត គឺនៅទៀត» ។ គួរឱ្យដឹងដែរថា ហាងបុកល្ហុងដែលមានស្ថាបនិកជាអ្នកប្រដាល់ដ៏ល្បីឈ្មោះ សែន រ៉ាឌី បានចាប់ផ្ដើមដំណើការតាំងពីថ្ងៃទី២៦ មីនា ២០១៧ កន្លងមក ដែលមានទីតាំងស្ថិតនៅមុខផ្សារស៊ីឡិប រាជធានីភ្នំពេញ ។ ម្ចាស់ខ្សែក្រវាត់ប្រាក់រង្វាន់១ម៉ឺនដុល្លារនៃកម្មវិធីសមរភូមិអ្នកប្រយុទ្ធវគ្គ១របស់ PNN រូបនេះក៏មានគម្រោងពង្រីកសាខាបន្ថែមប្រសិនហាងបុកល្ហុងរបស់ខ្លួន ដំណើរកាន់តែល្អនៅពេលខាងមុខ ជាពិសេសប្រសិនបើលោកអាចបណ្ដុះបងប្អូន ឬអ្នកជំនិតណាម្នាក់ឱ្យចេះដូចលោកក្នុងការច្នៃម្ហូប គ្រឿងក្លែម និងគ្រប់គ្រងហាងបានល្អជំនួសដៃជើង៕
ចែករំលែកព័តមាននេះ