ប្ញសឈើនៅប្រាសាទតាព្រហ្ម កំពុងត្រូវបានការពារបំផុត
- សៀមរាប
ខេត្តសៀមរាប ៖ កាលពីថ្ងៃទី៦ មីនា ២០១៨ បានចាប់ផ្តើមកដំណើរការគម្រោងរៀបចំក្រាលក្ដារឈើ តាមឫសឈើធំៗ និងនៅតាមវង់ទស្សនារបស់ភ្ញៀវទេសចរនៅប្រាសាទតាព្រហ្ម ។ តាមការប៉ាន់ស្មាន…
ខេត្តសៀមរាប ៖ កាលពីថ្ងៃទី៦ មីនា ២០១៨ បានចាប់ផ្តើមកដំណើរការគម្រោងរៀបចំក្រាលក្ដារឈើ តាមឫសឈើធំៗ និងនៅតាមវង់ទស្សនារបស់ភ្ញៀវទេសចរនៅប្រាសាទតាព្រហ្ម ។ តាមការប៉ាន់ស្មាន គម្រោងនេះ អាចនឹងបញ្ចប់នៅមុនរដូវវស្សាមកដល់ ។
ក្រុមការងារនៃនាយកដ្ឋានគ្រប់គ្រងព្រៃឈើ បរិស្ថាន និងទេសភាពវប្បធម៌នៃអាជ្ញាធរជាតិអប្សរា កំពុងញាប់ដៃញាប់ជើងរៀបចំក្រាលក្ដារនៅជុំវិញឫសឈើនៅប្រាសាទតាព្រហ្ម ។ គេដឹងហើយថា ដើមឈើធំៗ និងឫស ធំៗ ដែលមានវ័យចំណាស់នៅប្រាសាទតាព្រហ្ម គឺជាផ្នែកមួយដ៏ទាក់ទាញសម្រាប់ភ្ញៀវទេសចរជាតិ និងអន្ដរជាតិ ។ ពួកគេ តែងផ្តិតយកទិដ្ឋភាពទាំងនោះនៅពេលបានមកដល់ប្រាសាទ ម្តងៗ។ ជាមួយនឹងកំណើនទេសចរជាច្រើនមកដល់ប្រាសាទតាព្រហ្ម វាក៏បានបង្កហានិភ័យផងដែរ ។ ហានិភ័យត្រង់ភ្ញៀវទេសចរបានដើរជាន់ឫសឈើនៅក្រោមដីដោយមិនដឹងខ្លួន ដែលវានឹងបង្អាក់ដំណើរលូតលាស់របស់ដើមឈើទាំងនោះ ។
លោកយិន សូវ៉ាត អនុប្រធាននាយកដ្ឋានគ្រប់គ្រងព្រៃឈើ បរិស្ថាន និងទេសភាពវប្បធម៌ ដែលកំពុងដឹកនាំក្រុមការងាររៀបចំកម្រាលក្ដារនៅប្រាសាទតាព្រហ្ម បានថ្លែងថា គោលបំណងនៃការរៀបចំនេះ គឺដើម្បីបង្កើនការលូតលាស់របស់ដើមឈើ និងថែរក្សាបរិស្ថានជុំវិញឱ្យបានល្អប្រសើរឡើងវិញ ។ តាមការបញ្ជាក់របស់មន្ត្រីព្រៃឈើ ទីតាំងឫសឈើចំនួន៦កន្លែង ដែលគ្រោងក្រាលក្ដារ និងនៅតាមវង់ទស្សនាប្រវែងជាង៤០០ម៉ែត្របន្ថែមទៀត ។
តាមការបញ្ជាក់របស់លោកយិន សូវ៉ាត ឈើដែលយកមកប្រើប្រាស់នេះជាប្រភេទឈើគគីរ ដែលតាមការប៉ាន់ស្មានសរុបប្រហែលជាង៧០ម៉ែត្រគីប ដែលវាអាចរក្សាគុណភាពបានពី៦ទៅ៧ឆ្នាំ ។ ក្រុមការងារកំពុងមមាញឹករៀបចំគម្រោងនេះ ដោយរំពឹងថា វានឹងរួចរាល់នៅមុនរដូវវស្សា ឬមុនកិច្ចប្រជុំអាយស៊ីស៊ី-អង្គរ នៅក្នុងខែមិថុនា ខាងមុខ ៕
ចែករំលែកព័តមាននេះ