រាជធានីភ្នំពេញ ៖ ដេប៉ូលក់ឈើមួយកន្លែងបានឆាបឆេះឈើកែច្នៃធ្វើជាទ្វារដែលដាក់ចំហុយនៅក្នុងឡបង្កឱ្យមានការភ្ញាក់ផ្អើលកាលពីវេលាម៉ោង២និង១៥នាទីរំលងអធ្រាត្រឈានចូលថ្ងៃទី១៥ ខែមីនា ឆ្នាំ២០១៨ ត្រង់ចំណុចដេប៉ូលក់ឈើមួយកន្លែងក្បែរនឹងស្តុបឧកញា ម៉ុង រិទ្ធី តាមបណ្តោយផ្លូវហាណូយ ស្ថិតក្នុងភូមិបាយ៉ាប…
រាជធានីភ្នំពេញ ៖ ដេប៉ូលក់ឈើមួយកន្លែងបានឆាបឆេះឈើកែច្នៃធ្វើជាទ្វារដែលដាក់ចំហុយនៅក្នុងឡបង្កឱ្យមានការភ្ញាក់ផ្អើលកាលពីវេលាម៉ោង២និង១៥នាទីរំលងអធ្រាត្រឈានចូលថ្ងៃទី១៥ ខែមីនា ឆ្នាំ២០១៨ ត្រង់ចំណុចដេប៉ូលក់ឈើមួយកន្លែងក្បែរនឹងស្តុបឧកញា ម៉ុង រិទ្ធី តាមបណ្តោយផ្លូវហាណូយ ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
បើតាមសម្តីម្ចាស់ដេប៉ូលក់ឈើដែលរងការឆាបឆេះបានរៀបរាប់ប្រាប់ឱ្យដឹងថា នៅមុនពេលកើតហេតុគាត់បានធុំក្លិនឈ្ងៀម និងមានផ្សែងខ្មួលខ្មាញ់ចេញមកពីក្នុងឡសម្រាប់ចំហុយទ្វារកែច្នៃដែលមានហំទំ៦ម៉ែត្រគុណនឹង៧ម៉ែត្រ មានដាក់ទ្វារឈើនៅក្នុងចំហុយជិត៣០គីប ស្ថិតនៅខាងក្រោយដេប៉ូ ។
ខណៈធុំក្លិនឈ្ងៀម និងមានផ្សែងហុយបែបនេះគាត់ក៏បានចេញទៅមើលស្រាប់តែឃើញមានអណ្តាតភ្លើងកំពុងតែឆាបឆេះចេញមកពីក្នុងឡចំហុយនោះ ហើយគាត់ក៏ស្រែកឆោឡោនាំគ្នាដងទឹកទៅជះពន្លត់ និងទាក់ទងទៅសមត្ថកិច្ចមូលដ្ឋានឱ្យចុះមកអន្តរាគមន៍ ។
សមត្ថកិច្ចមូលដ្ឋានមកដល់កន្លែងកើតហេតុបានទាក់ទងទៅរថយន្តពន្លត់អគ្គីភ័យរបស់ស្នងការដ្ឋាននគរបាលរាជធានីភ្នំពេញចុះមកចំនួន៦គ្រឿងបានធ្វើការបាញ់ពន្លត់អស់ទាំងចំនួន៦គ្រឿង និងចំណាយពេលអស់រយៈពេលមួយម៉ោងទើបរលត់ជាស្ថាពរគឺរលត់ទៅវិញម៉ោង៣និង១៥នាទីទៀបភ្លឺថ្ងៃដដែល ។
បើតាមសម្តីពីសមត្ថកិច្ចបានឱ្យដឹងថា ករណីអគ្គីភ័យខាងលើនេះមិនបង្កឱ្យមានការឆេះរាលដាលដល់ផ្ទះសម្បែងរបស់ប្រជាពលរដ្ឋដែលនៅក្បែរខាងនោះទេ គឺគ្រាន់តែរងការខូចទ្វារឈើដែលដាក់ចំហុយនៅខាងក្នុងឡឆេះអស់មួយចំនួនតូចប៉ុណ្ណោះ ចំពោះមូលហេតុសមត្ថកិច្ចកំពុងធ្វើការស្រាវជ្រាវបន្ត ៕
ចែករំលែកព័តមាននេះ