ខេត្តកំពង់ឆ្នាំង ៖ “ទិវាវប្បធម៌ថ្ងៃនេះមិនមែនមានសារៈសំខាន់តែថ្ងៃនេះ ឬនៅទីនេះនោះទេ គឺមានសារៈសំខាន់ ទូទាំងប្រទេស ដល់គ្រប់ស្រទាប់មហាជន ពិសេសស្រទាប់យុវវ័យ“ ។ ឯកឧត្តម ជុច ភឿន រដ្ឋលេខាធិការ ក្រសួងវប្បធម៌ មានប្រសាសន៍បែបនេះ ក្នុងពិធីប្រារព្ធទិវាវប្បធម៌ជាតិលើកទី២០ នៅសាលានយោយបាយ ខេត្តកំពង់ឆ្នាំង នាព្រឹកថ្ងៃទី១៤ ខែមីនា ឆ្នាំ២០១៨នេះ ដោយមានមន្ត្រីរាជការកងកម្លាំងប្រដាប់អាវុធ និងសិស្សានុសិស្សចូលរួម សរុបជាង៥០០នាក់។ ឯកឧត្តមបានបន្តថា ទិវាវប្បធម៌ជាតិលើកទី២០ ឆ្នាំនេះ គឺក្រោមប្រធានបទ (យុវជនដើម្បីវប្បធម៌ជាតិ) ហេតុនេះហើយ យុវជនរបស់យើងត្រូវតែចេះស្រឡាញ់ គោរព ថែរក្សារ អភិរក្ស និងអភិវឌ្ឍន៍ នូវវប្បធម៌ជាតិ របស់យើង អោយបានស្ថិតស្ថេរ គង់វង្សយូអង្វែង និង ច្នៃប្រឌិតដើម្បីអភិវឌ្ឍន៍បន្ថែមទៀត។ ឯកឧត្តមបានបញ្ជាក់ថា ទិវាវប្បធម៌ជាតិជាទិវាមួយដ៏សំខាន់ របស់ប្រទេសជាតិដែលរដ្ឋាភិបាលបានយកចិត្តទុកដាក់រៀបចំពិធីនេះជារៀងរាល់ឆ្នាំ ដើម្បីរំលឹកដល់គុណូបក្ការៈ និងស្នាដៃដ៏វិសេសវិសាលរបស់បុព្វបុរសនៃយើងដែលបានទុកនូវមរតកវប្បធម៌ដ៏សម្បូរបែប និងមានតម្លៃជាប្រវត្តិសាស្ត្រមិនអាចកាត់ថ្លៃបានដល់ចំកូនចៅជំនាន់ក្រោយ។
ទិវាវប្បធម៌ជាតិនេះ គឺជាការជំរុញការផ្សព្វផ្សាយ ការផ្ទេរចំណេះដឹង និងការបំផុសស្មារតីឲ្យ ស្រឡាញ់វប្បធម៌ និងមនសិការជាតិដល់ ប្រជាពលរដ្ឋ និងយុវជនដែលជាទំពាំងស្នងឫស្សី ដើម្បីចូលរួមកាពារបានគង់វង្សនូវសម្បត្តិវប្បធម៌ជាតិ និងវប្បធម៌ចម្រុះនៃសហគមន៍ជនជាតិនៅព្រះរាជាណាចក្រកម្ពុជា រក្សាបាននូវឯករាជ្យជាតិ សាមគ្គីភាព សន្តិភាពនិងការអភិវឌ្ឍន៍។ វប្បធម៌ជាតិដែលជាប្រភពធនធានមិនចេះរីងស្ងួតប្រកបដោយសក្កានុពល ក្នុងការរួមចំណែកអភិវឌ្ឍសេដ្ឋកិច្ចសង្គម តាមរយៈការបង្កើតសេវាកម្ម និងផលិតកម្មវប្បធម៌សម្រា ប់គោលបំណងពាណិជ្ជកម្ម និងទេសចរណ៍។ បច្ចុប្បន្នរដ្ឋាភិបាលកំពុងយកចិត្តទុកដាក់ថែរក្សាការពារ និងអភិរក្សមរតកវប្បធម៌ ដូចជាអ្នកច្រៀងចាប៉ីដងវែង អ្នកច្រៀងអាយ៉ៃជាដើម ដែលចាត់ទុកពួកគាត់ថា ជាមរតកមនុស្សរស់ ដែលយុវជនទាំងអស់ត្រូវតែរៀនសូត្រយកស្នាដៃល្អរបស់គាត់ រក្សាទុកជាមរតកវប្បធម៌ របស់ខ្មែរពិតៗ សម្រាប់កូនចៅជំនាន់ក្រោយ។
ឯកឧត្តមក៏បានសំណូមពរ ដល់អាជ្ញាធរគ្រប់ជាន់ថ្នាក់ត្រូវ យកចិត្តទុកដាក់ ថែរក្សាកាពារទួលបុរាណ ដែលមាននៅក្នុងខេត្ត ដូចជាប្រាសាទកំពង់ព្រះ ទួលបុរាណសំរោងសែន វត្តត្រឡែងកែង និងវត្តកំពង់ត្រឡាចក្រោមជាដើម។ ដែលសុទ្ធតែជាស្នាដៃរបស់បុព្វបុរ សយើងតាំងពីសម័យបុរាណដែលយើងចាំបាច់ត្រូវតែរក្សាការពារឲ្យបានគង់វង្ស ដើម្បីទេសចរណ៍មកលេងកម្សាន្ត និងស្វែងយល់អំពីវប្បធម៌របស់ជាតិរបស់យើង។ ក្នុងឱកាសនោះដែរលោកជំទាវ ប៉ាល់ យឿន អភិបាលរងខេត្ត ក៏បានសំណូមពរដល់យុវជនដែលជាទំពាំងស្នងឫស្សីទាំងអស់ សូមធ្វើជាគំរូក្នុងការថែរក្សាការពារវប្បធម៌របស់ជាតិ មានការស្លៀកពាក់ ការសម្តែងសិល្បៈជាខ្មែរ ការរក្សាអក្សរសាស្ត្រជាតិ និងការការពារបេតិកភណ្ឌរបស់ជាតិ ឲ្យបានគង់វង្ស។ សូមកុំប្រព្រឹត្តនូវអំពើពាលាអាវាសែ ប្រើប្រាស់គ្រឿងស្រវឹង និងថ្នាំញៀន ជាដើម៕
ចែករំលែកព័តមាននេះ