ខេត្តព្រះវិហារ ៖ សេចក្តីរាយការជាបឋមពីខេត្តព្រះវិហារបានឲ្យដឹងថា កាលពីយប់ថ្ងៃទី១៣ មីនា ២០១៨ កម្លាំងសមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃ បានចុះបង្ក្រាបករណីជួញដូរ គ្រឿងញៀនមួយករណី នៅកណ្តាលព្រៃឆ្ងាយពីទីរួមខេត្តព្រះវិហារ។ ជនសង្ស័យឈ្មោះ ប៊ី គិនខាន់ចាន់ថា ហៅស៊ីយង់ ជនជាតិឡាវ ភេទប្រុស អាយុ៣៤ឆ្នាំ ទីលំនៅភូមិគីឡូលេខ១៤ ស្រុកបាចៀង ក្រុងប៉ាក់សេ ខេត្តចំប៉ាសាក់ ប្រទេសឡាវ។ សមត្ថកិច្ចបង្ក្រាប និងចាប់បានសារធាតុញៀន ប្រភេទម៉ាទឹកកកចំនួន៤គីឡូក្រាម និងសារធាតុញៀនប្រភេទយ៉ាម៉ា (ថ្នាំក្រវីធ្វើឲ្យសប្បាយ) ចំនួន១ម៉ឺនគ្រាប់។
នៅព្រឹកថ្ងៃទី១៤ មីនា នេះ ជនសង្ស័យ និង វត្ថុតាងសារធាតុញៀនប្រមាណ ជាង៤គីឡូក្រាមនោះ ត្រូវបានសមត្ថកិច្ចនគរបាលមន្ទីរប្រឆាំងគ្រឿងញៀន កំពុងដឹកចេញពីក្នុងព្រៃមកកាន់ទីរួមខេត្ត និងបន្តមកក្រសួងមហាផ្ទៃ រាជធានីភ្នំពេញ។ ដោយយោងទៅលើបទបញ្ជាពីនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកនាយឧត្តមសេនីយ៍ ម៉ក់ ជីតូ អគ្គស្នងការរង ក្រោមការណែនាំពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
លទ្ធផលជាក់ ស្តែងករណីបង្ក្រាបការជួញដូរគ្រឿងញៀន ឆ្លងដែនដោយខុសច្បាប់នេះ បានធ្វើឡើងនៅវេលាម៉ោង៦ និង៣០នាទីព្រឹក ថ្ងៃទី១៣ មីនា ២០១៨ នៅចំណុចភូមិកំពង់ព្រះឥន្ទ ឃុំកំពង់ស្រឡៅ២ ស្រុកឆែប ខេត្តព្រះវិហារ (ព្រំប្រទល់ឡាវ ស្រុកមឿងខូង ខេត្តចំប៉ាសាក់តាមដងទន្លេល្ពៅ) ដែលសមត្ថកិច្ចបានប្រើប្រាស់កម្លាំងជំនាញការិយាល័យទី៩ នៃមន្ទីរប្រឆាំងគ្រឿងញៀន ក្រសួងមហាផ្ទៃ។ ក្នុងនោះសមត្ថកិច្ចបានធ្វើការឃាត់ជនសង្ស័យម្នាក់ឈ្មោះ ប៊ី គិនខាន់ចាន់ថា ហៅស៊ីយង់ នេះនៅកន្លែងកើតហេតុ រួមទាំងចាប់យកវត្ថុតាងសារធាតុញៀន ម៉េតំហ្វេតាមីនគ្រាប់ WY ចំនួន១០.០០០គ្រាប់ ម៉េតំហ្វេតាមីន ICEទម្ងន់ ៤.០០០ក្រាម (៤គីឡូក្រាម)៕
ចែករំលែកព័តមាននេះ