ទីក្រុងសិង្ហបុរី ៖ តម្លៃប្រេងបានធ្លាក់ចុះជាបន្តបន្ទាប់ ព្រោះតែការផលិតប្រេងឆៅនៅសហរដ្ឋអាមេរិកមានកំណើនមិនឈប់ឈរ ដែលធ្វើឲ្យប៉ះពាល់ដល់ទីផ្សារ ។
តម្លៃប្រេង West Texas Intermediate របស់សហរដ្ឋអាមេរិក ស្មើ៦១,២០ដុល្លារក្នុង១ធុង ធ្លាក់ចុះ១៦សេន ឬ០,២% ។ រីឯតម្លៃប្រេងឆៅ Brent វិញ ស្មើ៦៤,៨០ដុល្លារក្នុង១ធុង ធ្លាក់ចុះ១៥សេន ឬ០,២% ។
ធនាគារ ANZ បាននិយាយកាលពីថ្ងៃអង្គារថា ៖« តម្លៃប្រេងបានធ្លាក់ចុះ ខណៈមានការព្រួយបារម្ភពីផលិតកម្មកើនឡើងនៅសហរដ្ឋអាមេរិក ហើយវាអាចនឹងបង្កើនចំនួនប្រេងស្តុកទុករបស់សហរដ្ឋអាមេរិកកាន់តែខ្ពស់ថែមទៀត » ។
កាលពីចុងឆ្នាំ២០១៧ ផលិតកម្មប្រេងឆៅអាមេរិកបានកើនឡើងលើសពី១០លានធុងទៅទៀតក្នុង១ថ្ងៃ គឺច្រើនជាងផលិតកម្មរបស់អារ៉ាប៊ីសាអូឌីត ដែលជាប្រទេសនាំចេញប្រេងច្រើនជាងគេលើពិភពលោក ។
យោងតាមភ្នាក់ងារថាមពលអន្តរជាតិបានឲ្យដឹងថា នាចុងឆ្នាំ២០១៨នេះ ផលិតកម្មនៅសហរដ្ឋអាមេរិកនឹងកើនលើសពី១១លានធុងក្នុង១ថ្ងៃ ហើយនឹងយកឈ្នះប្រទេសរុស្ស៊ី។ ផលិតកម្មកើនឡើងក្នុងប្រទេសនេះ ភាគច្រើនគឺមកពីផលិតកម្មប្រេងថ្មសែល ។
រដ្ឋបាលព័ត៌មានថាមពលអាមេរិក (EIA) បាននិយាយក្នុងរបាយការណ៍ផលិតកម្មប្រចាំ
ខែ ចេញផ្សាយកាលពីថ្ងៃចន្ទថា ផលិតកម្មប្រេងឆៅរបស់អាមេរិកពីថ្មសែល នឹងកើនឡើងប្រមាណ១៣ម៉ឺន១ពាន់ធុងក្នុង១ថ្ងៃនាខែមេសា មកស្មើ៦,៩៥លានធុងក្នុង១ថ្ងៃ ។
រដ្ឋបាលព័ត៌មានថាមពលអាមេរិកបន្តថា ការកើនឡើងនេះ គឺច្រើនជាងកំណើនក្នុងខែមីនា ដែលស្មើ១០ម៉ឺន៥ពាន់ធុងក្នុង១ថ្ងៃ មកស្មើ ៦,៨២លានធុងក្នុង១ថ្ងៃផងដែរ ៕
ចែករំលែកព័តមាននេះ