ខេត្តសៀមរាប ៖ ផ្លូវមួយខ្សែប្រវែង១,២០០ម៉ែត្រ ទទឹង៧ម៉ែត្រ ស្ថាបនាចាក់កៅស៊ូ (DBST) រួមទាំងធ្វើការរៀបចំដាក់ប្រព័ន្ធលូបង្ហូរទឹកភ្លៀង ក្រោមគម្រោងថវិការបស់សាលាខេត្តសៀមរាប ប្រចាំឆ្នាំ២០១៧ ដែលតភ្ជាប់ពីផ្លូវធំទៅភ្ជាប់ផ្លូវវាងក្រុង ស្ថិតនៅភូមិវាល សង្កាត់ជ្រាវ ក្រុងសៀមរាប ខេត្តសៀមរាប ដែលស្ថាបនាដោយក្រុមហ៊ុន លីសាំងលេង ត្រូវបានបើកការដ្ឋាន នាព្រឹកថ្ងៃទី១៤ ខែមីនា ឆ្នាំ២០១៨ នេះ ក្រោមអធិបតីរបស់លោក ឃឹម ប៊ុនសុង អភិបាល នៃគណៈអភិបាលខេត្ត ដោយមានការអញ្ជើញចូលរួមពីសំណាក់អស់លោក លោកស្រីជា ថ្នាក់ដឹកនាំមន្ទីរ អង្គភាព អាជ្ញាធរក្រុង ចៅសង្កាត់រួមទាំងប្រជាពលរដ្ឋផងដែរ ។
សូមបញ្ជាក់ផងដែរថា ផ្លូវគឺជាសរសៃឈាមសេដ្ឋកិច្ចជាតិ មានផ្លូវ គឺមានក្តីសង្ឃឹម និងជានយោបាយឈ្នះៗរបស់ សម្តេចតេជោ ហ៊ុន សែន សម្រាប់ការវិនិយោគលើសំណង់សន្តិភាពដ៏រឹងមាំនៅកម្ពុជា ដើម្បីឈានឆ្ពោះទៅរកការអភិវឌ្ឍន៍ការចាប់ដៃគូជាមួយវិស័យឯកជន ដើម្បីការអភិវឌ្ឍន៍ វាគឺជាការប្រើប្រាស់នយោបាយឈ្នះៗ ដើម្បីវិនិយោគលើវិស័យសេដ្ឋកិច្ច ។
តាមការបញ្ជាក់របស់ លោក សូរ ប្លាតុង អភិបាល នៃគណៈអភិបាលក្រុងសៀមរាប បានឲ្យដឹងថា ផ្លូវមួយខ្សែនេះមានសារៈសំខាន់ក្នុងការបម្រើដល់វិស័យទេសចរណ៍ និងការដឹកជញ្ជូនកសិផលរបស់ប្រជាកសិករទៅកាន់ទីផ្សារ មានប្រវែង១,២០០ម៉ែត្រ ទទឹង៧ម៉ែត្រ ដោយធ្វើការចាក់កៅស៊ូ (DBST) ។
មានប្រសាសន៍សំណេះសំណាលនោះដែរ លោក ឃឹម ប៊ុនសុង អភិបាលខេត្តក៏បានលើកឡើងអំពីគម្រោងជាច្រើនរបស់សាលាខេត្តសៀមរាប ក្នុងការជួសជុល និងស្ថាបនាផ្លូវនៅក្នុងក្រុងប្រវត្តិសាស្ត្រសៀមរាប ជាប្រភេទផ្លូវចាក់បេតុង ផ្លូវចាក់កៅស៊ូ (DBST) ឬចាប់បេទីមផងដែរ ។ លោកក៏បានលើកឡើងនូវអនុសាសន៍ល្អៗមួយចំនួនរបស់ប្រមុខរាជរដ្ឋាភិបាលកម្ពុជា ដែលមាន សម្តេចតេជោ ហ៊ុន សែន ជានាយករដ្ឋមន្ត្រី ដែលបានឆ្លុះបញ្ចាំងឲ្យឃើញនូវ ពីការគិតគូរខ្ពស់ប្រកបដោយចក្ខុវិស័យ ដើម្បីវឌ្ឍន៍ភាពសង្គម កំណើនសេដ្ឋកិច្ច និងអភិវឌ្ឍន៍លើគ្រប់វិស័យ ។ សំខាន់ដោយខេត្តសៀមរាបជាខេត្តនៃគោលដៅរបស់ភ្ញៀវទេសចរណ៍នៅលើពិភពលោកចូលមកទស្សនាកម្សាន្ត ហើយក្នុងភូមិសាស្ត្រសង្កាត់ជ្រាវនេះ ក៏ជាតំបន់កសិកម្មមួយក្នុងការផលិតបន្លែយកទៅកាន់ទីផ្សារក្នុងក្រុងផងដែរ ។
លោក ឃឹម ប៊ុនសុង ក៏បានលើកឡើងថា ពិធីសម្ភោធបើកការដ្ឋានស្ថាបនាផ្លូវមួយខ្សែនេះ ក្នុងគោលបំណងពង្រឹងនូវហេដ្ឋារចនាសម្ព័នរូបវ័ន្តរបស់ខេត្ត ក្នុងស្ថានភាពបច្ចុប្បន្ន សេដ្ឋកិច្ច មនុស្ស និងការកើនឡើងចរាចរយ៉ាងគំហុក ព្រមទាំងកាត់បន្ថយការលំបាករបស់ប្រជាពលរដ្ឋ និងជួយសម្រួលការកកស្ទះចរាចរដឹកជញ្ជូន ព្រមទាំងលើកនូវសោភ័ណភាពក្រុងឲ្យស្រស់ត្រកាលទៀតផង ។ ក្នុងនោះដែរ លោកក៏បានបញ្ជាក់ថា នយោបាយដែលល្អ គឺនយោបាយការពារសន្តិភាព ជំរុញការអភិវឌ្ឍន៍លើកស្ទួយជីវភាពរស់នៅរបស់ប្រជាពលរដ្ឋ ។ ដូច្នេះហើយទើបអាជ្ញាធរខេត្តបានជំរុញឲ្យក្រុមហ៊ុនយកចិត្តទុកដាក់ធ្វើការស្ថាបនាផ្លូវចាក់ក្រាលកៅស៊ូប្រភេទ (DBST) ឲ្យធានាបាននូវគុណភាពប្រើប្រាស់ ព្រមទាំងដាក់ប្រព័ន្ធលូបង្ហូរទឹកផងដែរ ។
លោកក៏បានសំណូមពរ និងការអាព្យាស្រ័យចំពោះប្រជាពលរដ្ឋមានលំនៅដ្ឋាននៅតាមដងផ្លូវនេះ នៅពេលការស្ថាបនាផ្លូវរបស់ក្រុមវិស្វកម្មតែងមានការប៉ះពាល់ដល់ការរស់នៅរបស់បងប្អូន អំពីសុខភាព អនាម័យ ។ ក៏ប៉ុន្តែនៅពេលផ្លូវនេះរួចរាល់ហើយនោះ ផ្លូវនេះនឹងជួយសម្រួលដល់ភាពកកស្ទះចរាចរ និងងាយស្រួលក្នុងការដឹកជញ្ជូនកសិផលដែលបងប្អូនផលិតបានយកទៅកាន់ទីផ្សារ ។ ម្យ៉ាងទៀតសូមឲ្យអាជ្ញាធរក្រុង-សង្កាត់ត្រូវយកចិត្តទុកដាក់ថែទាំផ្លូវនេះ និងធ្វើឲ្យដងផ្លូវប្រកបទៅពណ៌បៃតង គឺត្រូវរួមគ្នាធ្វើការដាំដើមឈើមានតម្លៃ ក្នុងការលើកនូវសោភ័ណភាពក្រុងបុរាណយើងទៀតផង ។
លោក ឃឹម ប៊ុនសុង ក៏បានលើកនូវអនុសាសន៍របស់ប្រមុខរាជរដ្ឋាភិបាល ចំពោះបញ្ហាការយកដីផ្លូវសាធារណៈធ្វើជាកម្មសិទ្ធ និងសាងសង់លំនៅដ្ឋាននោះ រាជរដ្ឋាភិបាលក៏ដូចអាជ្ញាធរខេត្ត មិនអនុញ្ញាតឲ្យរស់នៅទីនោះឡើយ ដែលធ្វើឲ្យប៉ះពាល់យ៉ាងខ្លាំងនូវសោភ័ណភាព និងបង្កភាពអនាធិបតេយ្យ និងបង្កអសន្តិសុខទៀតផង ។ ម្យ៉ាងទៀតសូមបងប្អូនត្រូវចូលរួមសហការណ៍ជាមួយអាជ្ញាធរ មន្ត្រីជំនាញ ក្នុងការស្ថាបនាផ្លូវឲ្យបានរួចរាល់មុនរដូវវស្សាចូលមកដល់ ដើម្បីបម្រើផលប្រយោជន៍សង្គមជាតិយើងទាំងអស់គ្នា ៕
ចែករំលែកព័តមាននេះ