រាជធានីភ្នំពេញ ៖ ចៅក្រមតុលាការកំពូលលោកជំទោវ គីម សុត្ថាវី ប្រធានក្រុមប្រឹក្សារជំនុំជម្រះ និងតំណាងមហាអយ្យការលោក ឈួន ចាន់ថា បានបើកសវនាការលើសំណុំរឿងជនជាប់ចោទ សម រង្ស៊ី អតីតប្រធានគណបក្សសង្គ្រោះជាតិ ចោទពីបទបរិហារកេរ្តិ៍ ជាសាធារណៈ និងបទញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៣០៥ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ ។
សវនាការនេះដែរ ត្រូវបានលោកមេធាវី សំ សុគង់ មេធាវីការពារឲ្យលោក សម រង្ស៊ី អតីតមេដឹកនាំអតីតគណបក្សសង្គ្រោះជាតិ បានដាក់ពាក្យសុំពន្យារពេលសវនាការសិន ដោយសារលោកមានបញ្ហាសុខភាព ដែលត្រូវទៅព្យាបាលនៅប្រទេសថៃ ។ ដោយសំអាងថា លោកមេធាវី សំ សុគង់ បានដាក់សារណាការពារកូនក្តី រួចហើយចឹងលោកស្រីចៅក្រមក៏បានសម្រេចមិនលើកសវនាការនេះ ដោយសម្រេចបន្តសវនាការនេះតែម្តង ។ នាពេលសវនាការលោក គី តិច មេធាវីតំណាងដោយអណ្ណិតរបស់សម្តេចតេជោនាយករដ្ឋមន្ត្រី បានធ្វើសេចក្តីសន្និដ្ឋានតបនឹងសារណារបស់មេធាវី សំ សុគង់ ការពារសិទ្ធិឲ្យជនជាប់ចោទ សម រង្ស៊ី មួយចំនួន រួចក៏បានស្នើសុំឲ្យលោកចៅក្រមសម្រេចតម្កល់សាលដីកាសាលាឧទ្ធរណ៍ទាំងមូល ។
តំណាងមហាអយ្យការលោក ឈួន ចាន់ថា ធ្វើសេចក្តីសន្និដ្ឋានក៏ស្នើសុំឲ្យលោកស្រីចៅក្រមសម្រេចតម្កល់សាលដីកាសាលាឧទ្ធរណ៍ទាំងមូល ។
ក្រោយពីបញ្ចប់សវនាការរួច លោកស្រីចៅក្រមក៏បានថយទៅពិចារណាជាងកន្លះម៉ោង រួចក៏បានសម្រេចប្រកាសសាដីកា ១- ទទួលបណ្តឹងសារទុក្ខរបស់មេធាវី សំ សុគង់ ធ្វើត្រូវតាមទម្រង់ច្បាប់ដែលអាចយកមកបើកសវនាការជំនុំជម្រះបាន ២- បដិសេធបណ្តឹងសារទុក្ខរបស់មេធាវី សំ សុគង់ ៣- សម្រេចតម្កល់សាលដីកាសាលាឧទ្ធរណ៍ទុក្ខជាបានការដដែល ។
សូមជម្រាបថា ទាំងសាលាឧទ្ធរណ៍ និងសាលាដំបូងរាជធានីភ្នំពេញបានសម្រេចផ្តន្ទាទោសលោក សម រង្ស៊ី អតីតប្រធានគណបក្សសង្គ្រោះជាតិឱ្យជាប់ពន្ធនាគារ១ឆ្នាំ៨ខែ ពិន័យ១០លានរៀល និងសងសំណង១០០រៀល ទៅឲ្យដើមបណ្តឹងដដែល ចំពោះករណីចោទប្រកាន់ រាជរដ្ឋាភិបាលកម្ពុជាថា នៅពីក្រោយខ្នងនៃអំពើឃាតកម្មបាញ់សម្លាប់ លោក កែម ឡី ៕
ចែករំលែកព័តមាននេះ