រាជធានីភ្នំពេញ ៖ តុលាការកំពូលនៅព្រឹកថ្ងៃទី១៤ ខែមិនានេះ បានប្រកាសសាលដីកាសម្រេចតម្កល់សាលដីកាសាលាឧទ្ធរណ៍ ទុក្ខជាបានការដដែលលើសំណុំរឿងលោក ស៊ុត ឌីណា អតីតឯកអគ្គរាជទូតកម្ពុជាប្រចាំប្រទេសកូរ៉េខាងត្បូង ពាក់ព័ន្ធករណីខុសនីតិវិធី ។
សវនាការនៅតុលាការកំពូលដែលមានលោកជំទាវ គីម សត្ថាវី ប្រធានក្រុមប្រឹក្សាជំនុំជម្រះតុលាការកំពូល និងតំណាងមហាអយ្យការលោក ចាន់ តារារស្មី បានឱ្យដឹងថា ពាក់ព័ន្ធករណីនេះដែរ ដោយសារ ជនជាប់ចោទ ស៊ុត ឌីណា មិនបានធ្វើលិខិតផ្ទេរសិទិ្ធឲ្យមេធាវី ដើម្បីពឹងពាក់ ទើបសាលាឧទ្ធរណ៍សម្រេចមិនចាត់ការបណ្តឹងរបស់លោក ស៊ុត ឌីណា ដោយសំអាងថា បណ្តឹងនេះធ្វើឡើងខុសនីតិវិធីច្បាប់ ។
សូមជម្រាបថា លោក កោ វណ្ឌី អនុប្រធានសាលាដំបូងរាជធានីភ្នំពេញ កាលពីព្រឹកថ្ងៃទី០១ ខែធ្នូ ឆ្នាំ២០១៦ បានប្រកាសសាលក្រមផ្តន្ទាទោសលោក ស៊ុត ឌី ណា ដាក់ពន្ធនាគារ៥ឆ្នាំ និងពិន័យជាប្រាក់ចូលថវិការដ្ឋចំនួន១០លានរៀល ពាក់ព័ន្ធទៅនឹងអំពើពុករលួយ ។ ជនត្រូវចោទក្នុងសំណុំរឿងឈ្មោះ ស៊ុត ឌីណា ភេទប្រុស អាយុ៤៥ឆ្នាំ ត្រូវបានអយ្យការអមសាលាដំបូងរាជធានីភ្នំពេញចោទប្រកាន់ពីបទ រំលោភអំណាច បទបញ្ញត្តិ ដែលមានចែងក្នុងមាត្រា ៣៥ ស្តីពីច្បាប់ប្រឆាំងអំពើពុករលួយ និងបទការកេងយកផលប្រយោជន៍ដោយខុសច្បាប់ បទបញ្ញត្តិ ដែលមានចែងក្នុងមាត្រា៥៩៧ និង៥៩៨ នៃក្រមព្រហ្មទណ្ឌ ។
គួរបញ្ជាក់បន្តទៀតថា លោក ស៊ុត ឌីណា ត្រូវបានអង្គភាពប្រឆាំងអំពើពុករលួយ ACU ចាប់ខ្លួនកាលពីថ្ងៃទី០៤ ខែមេសា ឆ្នាំ២០១៦ ខៈណៈពេលរូបលោកបានវិលត្រឡប់មកពីប្រទេសកូរ៉េខាងត្បូង ចូលមកប្រទេសកម្ពុជា ៕
ចែករំលែកព័តមាននេះ