ខេត្តស្វាយរៀង ៖ មនុស្សប្រុសស្រី២នាក់ បានរងរបួសធ្ងន់ស្រាលដោយសារ ជួបគ្រោះថ្នាក់ចរាចរណ៍មួយដែលបង្កដោយរថយន្តមួយគ្រឿង បើកបរក្នុងល្បឿនលឿនជ្រុលទៅបុករ៉ឺម៉កម៉ូតូពីក្រោយ បណ្តាលឲ្យអ្នកបើករ៉ឺម៉ករបួសធ្ងន់ធ្ងរ បាក់ជើងឆ្វេង និងអ្នករួមដំណើររងរបួសស្រាល ។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២និង៣០នាទីព្រឹក ឈានចូលថ្ងៃទី១៤ ខែមិនា ឆ្នាំ២០១៨ នៅចំណុចលើផ្លូវជាតិលេខ១ ចន្លោះគីឡូម៉ែត្រលេខ១៤២- ១៤៣ ស្ថិតក្នុងភូមិ ដើមពោធិ៍ ឃុំ ស្វាយតាយាន ស្រុក កំពង់រោទិ៍ ខេត្ត ស្វាយរៀង ។
បើតាមសមត្ថកិច្ចបានឲ្យដឹងថា គ្រោះ ថ្នាក់ចរាចរណ៍នេះ បង្កដោយរថយន្តមួយគ្រឿង ពណ៌ទឹកមាស ពាក់ស្លាកលេខភ្នំពេញ 2D-8746 អ្នកបើកបររថយន្តបានរត់គេចពីកន្លែងកើតហេតុ បាត់ស្រមោល (បន្សល់ទុករថយន្តនៅកន្លែងកើតហេតុ ដោយមិនស្គាល់អត្តសញ្ញាណ) ។
បើតាមអ្នកនៅកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូរ៉ឺម៉កធ្វើដំណើរទិសដៅពីលិចទៅកើត រីឯរថយន្តបង្កហេតុធ្វើដំណើរស្របទិសគ្នា លុះមកដល់ចំណុចកើតហេតុខាងលើ ក៏ជ្រុលចង្កូតទៅបុកម៉ូតូសណ្តោងរឺម៉ក ពណ៌ក្រហម ស្លាកលេខគ្មាន ចំពីក្រោយរ៉ឺម៉ក បណ្តាលឲ្យក្រឡាប់ផ្ងាជើងឡើងលើ តែម្តង ។
ប្រភពខាងលើបានបន្តទៀតថា អ្នកបើកបររ៉ឺម៉កម៉ូតូខាងលើមានឈ្មោះ កឺក ភេទប្រុស អាយុ៣៥ឆ្នាំ មុខរបរដឹកបន្លែ ។ បច្ចុប្បន្នរស់នៅភូមិប្រសូត្រ១ ឃុំកណ្ដៀងរាយ ស្រុកស្វាយទាប ខេត្តស្វាយរៀង រងរបួសធ្ងន់ បាក់ជើងខាងឆ្វេង (មិនពាក់មួកសុវត្តិភាព) និងអ្នករួមដំណើរម្នាក់ឈ្មោះ ហ៊ីង ភេទស្រី អាយុ៣៣ឆ្នាំ មុខរបរលក់បន្លែ រស់នៅភូមិឃុំជាមួយគ្នា រងរបួសស្រាល (មិនពាក់មួកសុវត្ថិភាព) ។ មូលហេតុ រថយន្តប្រើប្រាស់ល្បឿនលឿន ខ្វះការប្រុងប្រយ័ត្ន ។
ចំណែកអ្នករងរបួសទាំង២នាក់ ត្រូវបានសមត្ថកិច្ចបញ្ជូនយកទៅសង្គ្រោះនៅមន្ទីរពេទ្យបង្អែកខេត្តស្វាយរៀង ។ ចំពោះមធ្យោបាយ ទាំងពីរគ្រឿង យកមករក្សាទុកនៅអធិការដ្ឋាននគរបាលស្រុកស្វាយទាប ដើម្បីរង់ចាំធ្វើការដោះស្រាយគ្នាតាមច្បាប់ ៕
ចែករំលែកព័តមាននេះ