តាមការសិក្សាថ្មីមួយចុងក្រោយបំផុត បានអះអាងថា ផឹកតែ១ពែង អាចជួយឲ្យអ្នកដោះស្រាយបញ្ហាស្មុគស្មាញបានរហ័សជាងមុន។ លទ្ធផលនៃការសិក្សាបានរកឃើញថា សមាសធាតុពីធម្មជាតិ ដែលគេរកឃើញនៅក្នុងទឹកតែ១ពែង អាចជួយឲ្យថាមពលខួរក្បាលបានល្អប្រសើរជាងមុន ហើយជួយបង្កើនភាពវាងវៃថែមទៀត។
នៅក្នុងការសិក្សានោះ ក្រុមអ្នកស្រាវជ្រាវបានពិនិត្យមើលពីប្រសិទ្ធភាពនៃសារធាតុគីមីដ៏សំខាន់ទាំងឡាយ ដែលគេរកឃើញនៅក្នុងទឹកតែ ចំពោះកត្តាផ្លូវចិត្តរបស់អ្នកស្ម័គ្រចិត្តធ្វើពិសោធន៍វ័យក្មេងចំនួន៤៤នាក់ ។
សមាសធាតុសកម្មនៅក្នុងតែមានដូចជាអាស៊ីដអាមីណូ(L-theanine) ចាប់ផ្តើមមានប្រសិទ្ធភាពបន្ទាប់ពីផឹកបាន ២០ទៅ៧០នាទី ។ អ្នកសិក្សាបានរកឃើញទៀតថា ភាពវាងវៃរបស់អ្នកស្ម័គ្រចិត្តធ្វើពិសោធន៍បានឡើងខ្ពស់ទៀតផង។
ឯការសិក្សាមួយផ្សេងទៀតរបស់អ្នកវិទ្យាសាស្ត្រហូឡង់ទៅលើមនុស្សអាយុក្រោម៤០ឆ្នាំដែលបានចុះផ្សាយនៅក្នុងកាសែត Nutritional Neuroscience បានអះអាងផងដែរថា តែអាចជួយកាត់បន្ថយអាការនឿយហត់បានទៀតផង។
ចំណែកការសិក្សាដទៃទៀត បានអះអាងថា ការផឹកទឹកតែមានលទ្ធភាពជួយកាត់បន្ថយការប្រឈមនឹងជំងឺបេះដូង និងជំងឺមហារីកបាន។ លើសពីនេះការផឹកទឹកតែទៀងទាត់រយៈ ពេល១០ឆ្នាំឡើងទៅអាចជួយឲ្យឆ្អឹងរឹងមាំ។
វេជ្ជបណ្ឌិតទីម បុនមកពីក្រុមហ៊ុនTea Advisory Panelបាននិយាយថា ការរកឃើញថ្មីៗចុងក្រោយនេះ បានគាំទ្រលទ្ធផលចំពោះការសិក្សាលើកមុនដែលបានបង្ហាញថាផឹកតែខ្មៅ(តែធម្មតា) ២ពែងក្នុង១ថ្ងៃជួយធ្វើឲ្យល្អប្រសើរនូវលទ្ធភាពប្រុងប្រយ័ត្នចំពោះសកម្មភាពដែលកំពុងធ្វើ។ លោកបានបន្ថែមថា៖«ដូច្នេះការសិក្សាខាងដើមនេះ វាបានផ្តល់ជាភស្តុតាងដែលថា ការផឹកតែពិតជាអាចជួយកែលំអមុខងារយល់ដឹងរបស់យើងបាន ជាពិសេសជួយឲ្យមានការប្រយ័ត្នបានល្អក្នុងអំឡុងពេលបំពេញកាតព្វកិច្ច» ៕
ចែករំលែកព័តមាននេះ