ក្នុងជំនួបពិភាក្សាការងារទ្វេរភាគី ជាមួយលោកស្រីរ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា សម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានឱ្យដឹងថា សម្តេចបានចាត់ឱ្យក្រុមការងារចម្រុះមួយ…
ក្នុងជំនួបពិភាក្សាការងារទ្វេរភាគី ជាមួយលោកស្រីរ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា សម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានឱ្យដឹងថា សម្តេចបានចាត់ឱ្យក្រុមការងារចម្រុះមួយ បើកការស៊ើបអង្កេតបន្ថែម លើករណីហិង្សារហូតដល់ការផ្ទុះអាវុធនៅឃុំ២ធ្នូ ស្រុកស្នួល ខេត្តក្រចេះ ។ នេះបើតាមការឱ្យដឹងពីលោក ផាត សុផានិត ប្រធាននាយកដ្ឋានទំនាក់ទំនងអន្ដរជាតិ ដែលត្រូវបានគេហទំព័រ អគ្គស្នងការដ្ឋាននគរបាលជាតិចុះផ្សាយនាថ្ងៃទី១៣ មីនា ឆ្នាំ ២០១៨ ។
តាមគេហទំព័រដដែលឱ្យដឹងថា បើទោះបីទទួលបានរបាយការណ៍ពីអាជ្ញាធរមូលដ្ឋានខេត្តក្រចេះយ៉ាងណាក៏ដោយ តែសម្ដេច ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានចាត់ឱ្យក្រុមការងារចម្រុះមួយបើកការស៊ើបអង្កេតបន្ថែម លើករណីហិង្សារហូតដល់ការផ្ទុះអាវុធនៅឃុំ២ធ្នូ ស្រុកស្នួល ខេត្តក្រចេះ ។
បើតាមលោក ផាត សុផានិត ឱ្យដឹងដូចនេះក្រោយបញ្ចប់ជំនួបរវាងសម្ដេច ស ខេង ជាមួយលោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានចូលជួបពិភាក្សាការងារជាមួយសម្តេច ស ខេង កាលពីល្ងាចថ្ងៃទី១២ ខែមីនា ឆ្នាំ២០១៨ ។លោកបន្តថា ក្នុងជំនួបនោះលោកស្រី រ៉ូណា ស្មីត បានសួរទៅសម្តេច ស ខេង ថាតើមានទទួលបានព័ត៌មានបន្ថែមទៀតទេពាក់ព័ន្ធករណីផ្ទុះអាវុធនៅឃុំ២ធ្នូ ស្រុកស្នួល ខេត្តក្រចេះ ដែលបណ្ដាលឱ្យពលរដ្ឋ២នាក់រងរបួសជុំវិញបញ្ហាដីធ្លី ។
«សម្ដេច ស ខេង បានថ្លែងថា សម្ដេចក៏ទទួលបានរបាយការណ៍បឋមមួយចំនួនដែរ ប៉ុន្ដែសម្ដេចបានចាត់ក្រុមការងារពីក្រសួងមហាផ្ទៃមានទាំងខាងនគរបាល មានទាំងខាងអធិការកិច្ច ទៅធ្វើការស្រាវជ្រាវបន្ថែមទៅលើករណីដែលកើតឡើងនៅក្រចេះនេះ ហើយមកដល់ពេលនេះសម្ដេចក៏មិនទាន់បានទទួលរបាយការណ៍ពីក្រុមការងារ ដែលបញ្ជូនទៅនេះទេ ហើយបើទទួលបានយ៉ាងណានោះសម្ដេចនឹងធ្វើការបន្ដទៀត»។
គួររំលឹកថា កាលពីរសៀលថ្ងៃទី៨ ខែមីនា ឆ្នាំ២០១៨ មានអំពើហិង្សាមួយ បានផ្ទុះឡើងរវាងអាជ្ញាធរ និងប្រជាពលរដ្ឋនៅឃុំ២ធ្នូ ស្រុកស្នូលខេត្តក្រចេះ ខណៈកម្លាំងសមត្ថកិច្ច អាជ្ញាធរព្យាយាមបំបែកប្រជាពលរដ្ឋដែលនាំគ្នាបិទផ្លូវជាតិលេខ៧៦ ។ការដែលប្រជាពលរដ្ឋនាំគ្នាបិទផ្លូវបានកើតឡើងបន្ទាប់ពីសមត្ថកិច្ចចម្រុះក្រោមការដឹកនាំរបស់លោក ជា សុភ័ក្រ ព្រះរាជអាជ្ញារងអមសាលាដំបូងខេត្តក្រចេះ ចុះទៅរុះរើសំណង់តូចៗរបស់ពួកគាត់ស្ថិតនៅក្នុងក្រុមហ៊ុនចំការកៅស៊ូមេមត់ ៕
ចែករំលែកព័តមាននេះ