រាជធានីភ្នំពេញ ៖ មកទល់សព្វថ្ងៃគេកត់សម្គាល់ថា កីឡាជាច្រើនប្រភេទត្រូវបានមហាជនចំណាយលុយហ្វឹកហាត់ បើទោះជាអ្នកចូលខ្លួនទៅហ្វឹកហាត់ទាំងនោះមិនមានបំណងក្លាយខ្លួនជាកីឡាករអាជីព ឬគ្រាន់តែចង់ចេះចង់ដឹងលើប្រភេទកីឡាទាំងនោះក្ដី។
កីឡាទាំងនោះបានក្លាយជាទីផ្សាររកលុយយ៉ាងសកម្មភាពរបស់អ្នកជំនាញ ជាពិសេសរបស់កីឡាករដែលចេះស្ទាត់ហើយបានវិវត្តខ្លួនក្លាយជាគ្រូបង្វឹកឯករាជ្យដោយមិនស្ថិតក្រោមសម្ពាធអ្នកណាមួយនោះផង ។ គ្រូបង្វឹកកីឡាទាំងនោះបានប្រើយុទ្ធសាស្ត្ររាងខ្លួន ទាក់ទាញកូនសិស្សឱ្យចូលហ្វឹកហាត់ច្រើនឡើង ដោយខ្លះទទួលការបង់ប្រាក់ពីសិស្សហើយក៏ទទួលបានការឧបត្ថម្ភផ្ដាច់មុខពីក្រុមហ៊ុន ឬសប្បុរសជនមួយចំនួននៅពីក្រោយខ្នងផងដែរ ទើបធ្វើឱ្យក្លិបកីឡាទាំងនោះក្លាយជាអាជីវកម្មរបស់ម្ចាស់ក្លិប។
+ កីឡាបាល់ទាត់ ៖ គ្មានអ្នកណាមិនដឹងនោះទេថាកីឡាបាល់ទាត់នាពេលចុងក្រោយបានក្លាយជាកីឡាដែលពេញនិយមបំផុត ដែលអាចរកចំណូលបានច្រើនពីអ្នកចង់ហ្វឹកហាត់ និងអ្នកចង់ក្លាយជាកីឡាករ ។ បើទោះជាមិនមានឈ្មោះក្លាយជាសមាជិកក្នុងក្លិបបាល់ទាត់ណាមួយ ក៏អ្នកហាត់ជាមួយកីឡានេះរមែងត្រូវការចំណាយលុយផ្ទាល់ខ្លួនផងដែរ ដើម្បីជួលតារាងជុំគ្នាដើម្បីហ្វឹកហាត់ ហើយក្រោយពេលបង្កើនសមត្ថភាពបានល្អ ក៏បង់លុយចូលហាត់នៅក្នុងក្លិបណាមួយ ដើម្បីបានក្លាយជាកីឡាករអាជីព ។
ក្លិបបាល់ទាត់ច្រើនឡើងដែលសុទ្ធតែមានឈ្មោះបោះសំឡេងនៅក្នុងវិស័យបាល់ទាត់ សុទ្ធតែបានប្រកាសទទួលកូនសិស្សតាំងពីអាយុ១០ឆ្នាំរហូត១៨ឆ្នាំ ដើម្បីយកមកបង្វឹកដោយកីឡាករភាគច្រើនត្រូវគេឃើញចុះឈ្មោះ និងចូលហ្វឹកហាត់ដោយការយកចិត្តទុកដាក់នោះផង បន្ថែមពីលើការបង់លុយជាប្រចាំខែ ឬជាវគ្គ ឬអាចមិនបង់តែម្ដង ប្រសិនបើក្លិបពេញចិត្តសមត្ថភាព ។ កីឡាករដែលត្រូវបានជ្រើសរើសភាគច្រើនត្រូវបានគេកំណត់លើកាយសម្បទា និងសុខភាព ទើបទទួលជាសិស្សថ្មី ហើយកំណត់ឱ្យបង់លុយប្រចាំខែ និងចំណាយលុយទិញសំលៀកបំពាក់ជាហូរហែ ដោយគេឃើញអ្នកមានជំនាញច្រើនឡើង បានយកមុខរបរបើកក្លិបបាល់ទាត់នេះ ធ្វើជាអាជីព ។ បើទោះជាត្រូវចំណាយលុយជាប្រចាំ ប៉ុន្តែក្លិបបាល់ទាត់នីមួយៗនៅតែសំបូរកូនសិស្សហ្វឹកហាត់ប្រជ្រៀតគ្នាព្រោះតែការនិយមចូលចិត្តរបស់យុវវ័យ និងក្មេងៗនោះផង ។
មកទល់សព្វថ្ងៃ មិនមានស្ថិតិបញ្ជាក់ថា ក្លិបបាល់ទាត់ និងអ្នកចូលហ្វឹកហាត់បាល់ទាត់ទាំងអាជីព និងមិនអាជីពមានចំនួនប៉ុន្មាននោះទេ ដោយគ្រាន់តែគេមើលឃើញថាមានចំនួនច្រើនគួរឱ្យកត់សម្គាល់ ។ កីឡាករអាជីពច្រើននាក់បានវិវត្តខ្លួនក្លាយជាគ្រូបង្វឹក និងទទួលបានប្រាក់ចំណូលដោយសារតែតួលេខអ្នកចង់ហ្វឹកហាត់កើនឡើងច្រើន។
+ តេក្វាន់ដូ ៖ កីឡាមួយនេះក៏មានការពេញនិយមពីសំណាក់ក្មេងៗ និងយុវវ័យច្រើនឡើងផងដែរចូលចិត្តហ្វឹកហាត់ ។ មិនថាប្រុសឬស្រី ដែលចូលចិត្តហ្វឹកហាត់កីឡានេះ ភាគច្រើនមិនមានបំណងចង់ក្លាយជាកីឡាករអាជីពនោះទេ ដោយសារតែអ្នកហ្វឹកហាត់ច្រើននាក់ត្រូវបានគ្រូបង្វឹកបញ្ជាក់ថា មកបង់លុយហ្វឹកហាត់ ដោយសារតែចង់ចេះក្បាច់គុន និងចង់ឱ្យមានសុខភាពល្អ ។
អ៊ីចឹងហើយទើបអ្នកមានជំនាញមួយនេះ បើកជាទីតាំងបង្ហាត់សិស្សដើម្បីរកចំណូលដាក់ហោប៉ៅតែម្ដង ព្រោះតែការពេញនិយមពីសំណាក់អ្នកចូលចិត្តចង់ចេះក្បាច់គុនមួយនេះ ។ ក្នុងមួយខែៗគ្រូបង្វឹកលើកីឡាប្រភេទនេះ អាចរកចំណូលបានខ្ពស់ ខណៈដែលការបង្វឹកតេក្វាន់ដូ ក៏ត្រូវគេឃើញហ្វឹកហាត់នៅលើសួន និងនៅទីសាធារណៈណាក៏បាន ដោយមិនភ័យរឿងជួលទីតាំងអស់លុយ ក៏មិនខ្វះសិស្សហាត់ដែរ។
+ ការ៉ាតេដូ ៖ មិនខុសគ្នាដែរក្លិបប្រមាណជាង៣០នៅក្នុងប្រទេសកម្ពុជាគឺបានដំណើរការយ៉ាងរលូន ដោយសារតែក្មេងៗ និងយុវវ័យភាគច្រើនចូលចិត្តហ្វឹកហាត់កីឡាមួយនេះដើម្បីសុខភាព និងដើម្បីបានចេះស្នៀតខ្លះគ្រាន់ការពារខ្លួន ។ អ្នកបង្វឹកកីឡាប្រភេទនេះ មិនសំដៅចង់ក្លាយជាកីឡាករអាជីពទេ ប៉ុន្តែអ្នកដែលបានចំណាយពេលហ្វឹកហាត់ជាប់លាប់យូរឆ្នាំ និងមានសមត្ថភាព ក៏ត្រូវបានគ្រូបង្វឹកលើកទឹកចិត្តឱ្យចូលប្រកួតដណ្ដើមមេដាយ និងវិវត្តខ្លួនក្លាយជាកីឡាករអាជីពផងដែរ ។
ក្នុងមួយខែចំណាយបង់ការហាត់រៀនមិនក្រោម១៥ដុល្លារ ដោយមិនរាប់បញ្ចូលការចំណាយលើសម្ភារ និងការហូបចុក តែក្លិបការ៉ាតេដូភាគច្រើននៅតែសំបូរអ្នកហាត់ដោយក្នុងមួយក្លិបមានកូនសិស្សមិនក្រោមពី៣០ទៅ៥០នាក់នោះទេ ទើបធ្វើឱ្យអ្នកចេះកីឡានេះរកចំណូលបានយ៉ាងស្រួល ដោយសារតែការបើកក្លិប និងទទួលបង្វឹកសិស្សតាមសាលា ឬដល់ផ្ទះ។
យ៉ាងណាមិញបើធៀបនឹងសន្ទុះគាំទ្ររបស់កីឡាតេក្វាន់ដូ គឺអ្នកចង់ហ្វឹកហាត់កីឡាមួយនេះហាក់មានកម្រិតតិចជាង ដែលអាចគេជឿជាក់លើភាពល្បីឈ្មោះរបស់កីឡាតេក្វាន់ដូច្រើនជាង ជាពិសេសបន្ទាប់ពីកីឡាការិនីស៊ន សៀវម៉ី ដណ្ដើមបានមេដាយមាសពីអន្តរជាតិ ហើយធ្វើឱ្យមានការទទួលស្គាល់ពីភាពល្បីល្បាញរបស់កីឡាមួយនេះ។
+ ហែលទឹក ៖ ដោយសារតែនៅប្រទេសកម្ពុជាមិនសូវមានអាងហែលទឹកអំណោយផល ទើបមិនសូវមានក្លិបហែលទឹកច្រើនទេ ប៉ុន្តែនៅក្នុងសហព័ន្ធកីឡាហែលទឹក និងទីតាំងដែលមានអាងហែលទឹកសមស្រប គឺសុទ្ធតែមានបើកបង្រៀនហែលទឹកបើទោះជាការទទួលបង្រៀននោះ មិនមានការទទួលស្គាល់នៅក្នុងសហព័ន្ធក្តី ។
ជាក់ស្ដែង កីឡាការិនី ហែមថុន វិទិនី អាចរកចំណូលបានមិនតិចនោះទេ ពីការទទួលសិស្សតាមម៉ោងដែលកញ្ញាបង្វឹក ខណៈដែលអ្នកជំនាញហែលទឹកផ្សេងទៀត ក៏ទទួលបង្វឹកសិស្សតាមម៉ោង និងហ្សូនរបស់ខ្លួនរៀងៗខ្លួនផងដែរ ដើម្បីរកចំណូលជាប្រចាំ ។ មានការបញ្ជាក់ថា នៅក្នុងអាងហែលទឹកស្ដាតអូឡាំពិកមួយ មានអ្នកទទួលបង្វឹកសិស្សឱ្យហែលទឹកច្រើននាក់ ដោយគ្រូបង្វឹកទាំងនោះបានទាំងប្រកួតប្រជែងគ្នាបញ្ចេញស្នាដៃ និងរកទីផ្សារដែលជាសិស្សឱ្យបានច្រើន ងាយនឹងទទួលបានចំណូលខ្ពស់នោះផង។ ប៉ុន្តែគេកត់សម្គាល់ថា អ្នកចំណាយលុយទៅហាត់ហែលទឹកភាគច្រើន មិនចង់ក្លាយជាកីឡាករនោះទេ គឺគ្រាន់តែចង់មានជំនាញហែលទឹកឱ្យបានល្អប៉ុណ្ណោះ។
+ ល្បុក្កតោ ៖ មកដល់ពេលនេះ កីឡាករល្បុក្កតោស្ងប់ស្ងាត់ជាងមុនបន្តិចហើយ ប៉ុន្តែគេនៅតែឃើញកីឡាប្រភេទនេះរកលុយបានដដែល សម្រាប់ក្លិបណា ឬគ្រូបង្វឹកណាដែលមានស្នាដៃ ។ មានការបញ្ជាក់ថា អ្នកចង់ហ្វឹកហាត់កីឡាមួយនេះច្រើនចូលតាមខ្សែបណ្ដាញ និងហ្វឹកហាត់មិនសូវបានយូរនោះទេ ដោយសារតែមានក្បាច់ច្រើនពិបាកចាំ និងមានគ្រោះថ្នាក់ខ្លះដែរនៅពេលវាយតប់គ្នាឱ្យពេញលក្ខណៈមែនទែន ។ ប៉ុន្តែអ្នកដែលតស៊ូបានក៏បានក្លាយជាកីឡាករកីឡាការិនីអាជីពគួរឱ្យសរសើរផងដែរ ។
យ៉ាងណាមិញ គេឃើញកីឡានេះទាក់ទាញក្រុមផលិតករភាពយន្តបានច្រើន ដោយសារតែគេចង់បណ្ដុះតួឱ្យក្លាយជាអ្នកក្បាច់គុនងាយស្រួលថតរឿង។
+ យុទ្ធក្រមខម ៖ កាលពីមួយរយៈមុនកីឡាមួយនេះត្រូវគេចាប់អារម្មណ៍ហ្វឹកហាត់គគ្រឹកគគ្រេងខ្លាំងណាស់នៅតាមបរិវេណវិទ្យាល័យ និងសាលារៀនឯកជន ។ ប៉ុន្តែក្នុងរយៈពេលចុងក្រោយ អ្នកបន្តហ្វឹកហាត់ច្រើនតែនៅបរិវេណសាកលវិទ្យាល័យភូមិន្ទភ្នំពេញ ដែលអាចមកពីក្បាច់សង្គ្រាមរបស់កីឡានេះពិបាកហាត់ផង និងដោយសារតែយុវវ័យមិនសូវជាច្រើនស្គាល់ថាយុទ្ធក្រមខមជាអ្វី ។
ប៉ុន្តែនៅតាមបណ្ដាក្លិបមួយចំនួន នៅតែមានសិស្សហាត់ច្រើន ហើយជួយឱ្យគ្រូបង្វឹករកចំណូលបានគួរសមដដែល បើទោះជាខ្វះការបំផុស ហើយធ្លាក់ការចាប់អារម្មណ៍ជាងមុនក្ដី។
+ កីឡាប្រដាល់ ៖ អ្នកជំនាញកីឡានេះគឺរឹតតែយកការបង្វឹកសិស្សធ្វើជាអាជីពច្រើនឡើង បើទោះជាអ្នកចូលហាត់ភាគច្រើនមិនតម្រូវបង់លុយជាប្រចាំដូចកីឡាខាងលើ ។
គ្រូបង្វឹក ឬម្ចាស់ក្លិបច្រើនបើកក្លិបនេះដើម្បីទាក់ទាញការជ្រោមជ្រែង និងទទួលបានផលកម្រៃមកវិញពីការដាក់សិស្សឱ្យឡើងរេញ ដោយកាត់ពីសិស្សផង និងទទួលបានពីប៉ុស្ដិ៍ផង ទើបធ្វើឱ្យកីឡាករដែលមានសមត្ថភាពធ្វើគ្រូបង្វឹក និងមានសមត្ថភាពបើកក្លិបរកចំណូលបានច្រើនពីការបង្វឹកសិស្ស ។ មកទល់សព្វថ្ងៃ កីឡានេះ មានក្លិបកាន់តែច្រើន ហើយសកម្មភាពក៏មានច្រើនដែរ បើទោះជាពិបាករឿងស្វែងរកសិស្សមកបង្វឹកក្ដី។
+ ប្រណាំងម៉ូតូ ៖ កីឡានេះក៏រកចំណូលបានច្រើនផងដែរ រាប់ទាំងម្ចាស់ទីលាន និងគ្រូបង្វឹក តែកីឡាមួយនេះ អ្នកអាចរកចំណូលបានគឺបានតែក្លិបដែលមានការទទួលស្គាល់រួចមកហើយ ដោយមិនអាចចង់បើកក្លិបហើយក៏មានអ្នកទៅបង្វឹកនោះទេ ។ ប៉ុន្តែសម្រាប់ក្លិបដែលមានសិស្ស និងមានម៉ូតូជួលឱ្យហ្វឹកហាត់ គឺសំបូរសិស្សហាត់រកចំណូលបានខ្ពស់មិនធម្មតាផងដែរ។
បន្ថែមពីលើកីឡាទាំង៨ប្រភេទខាងលើ កីឡាប្រភេទផ្សេងក៏ត្រូវគេកត់សម្គាល់ថាមាន
ការហ្វឹកហាត់ច្រើនឡើងផងដែរ ដោយគ្រាន់តែមានចំនួនសិស្សចុះឈ្មោះហ្វឹកហាត់មិនច្រើនណាស់ណា បើធៀបនឹងកីឡាទាំង៨ដែលគេកត់សម្គាល់ថា មានកូនសិស្សថ្មីៗជាប់រហូត ហើយភាគច្រើនគឺពួកគេចង់ហាត់ដោយសុខចិត្តចំណាយលុយ និងការតាំងចិត្ត៕
ចែករំលែកព័តមាននេះ