រាជធានីភ្នំពេញ ៖ ហេង ស៊ីវឡាង កីឡាការិនីប្រណាំងកង់ដ៏ឆ្នើមរបស់កម្ពុជា បានប្រាប់អ្នកយកព័ត៌មានកោះសន្តិភាពក្នុងឱកាសចូលរួមពិធីបុណ្យទន្លេឯក្រុងតាខ្មៅ ខេត្តកណ្ដាល កាលពីថ្ងៃទី១១ មីនា កន្លងមកនេះថា នាងនឹងប្រកាសលាឈប់ពីក្រុមជម្រើសជាតិហើយ ។ ការប្រកាសលាឈប់នេះមិនមែនមានន័យថានាងចាកចេញពីអាជីពកីឡាប្រណាំងកង់ទាំងស្រុងនោះទេ គឺគ្រាន់តែចង់ទុកឱកាសឱ្យក្មេងស្រករក្រោយជាអ្នកបន្តវេន ដោយនាងធ្វើជាគ្រូបង្ហាត់វិញម្ដង។
ហេង ស៊ីវឡាង ធ្លាប់ដណ្ដើមបានមេដាយមាសនិងប្រាក់ជាច្រើនគ្រឿងពីការប្រកួតនៅលើឆាកអន្តរជាតិនាពេលកន្លងមក ។ សព្វថ្ងៃនេះ បទពិសោធន៍ជិះកង់របស់នាងពុំទាន់មានកីឡាការិនីកម្ពុជារូបណាមានសមត្ថភាពបំបែកឯតទគ្គកម្មរបស់នាងបាននៅឡើយទេ។ទោះបីនាងប្រកាសលាឈប់ពីក្រុមជម្រើសជាតិនាពេលនេះ តែនាងនៅតែបន្តហ្វឹកហាត់និងបង្វឹកដល់ក្មេងៗស្រករក្រោយសម្រាប់បន្តវេននាង។
ហេង ស៊ីវឡាង ធ្លាប់មានស្នាដៃធំៗជាច្រើនក្នុងការដណ្ដើមយកមេដាយនៅលើឆាកអន្តរជាតិ ដូចជានៅក្នុងឆ្នាំ២០១៧ដណ្ដើមបានមេដាយមាសពីការប្រកួតនៅប្រទេសម៉ាឡេស៊ី និងកាលពីដើមឆ្នាំ២០១៨កន្លងមក ដណ្ដើមបានមេដាយមាសពីការប្រកួតកម្រិតអាស៊ីនៅប្រទេសមីយ៉ាន់ម៉ា។
ចំពោះការលាឈប់ពីក្រុមជម្រើសជាតិរបស់កីឡាការិនី ហេង ស៊ីវឡាង នាពេលនេះផ្ដល់ផលប្រយោជន៍ជាច្រើនដល់កីឡាការិនីក្មេងៗជំនាន់ក្រោយ ដូចជាផ្ដល់ឱកាសឱ្យពួកគេជាប់ជាកីឡាការិនីជម្រើសជាតិពេញសិទ្ធិ កាត់បន្ថយថវិកាមួយចំនួនសម្រាប់ទ្រទ្រង់ដល់ការហ្វឹកហាត់របស់ពួកគេថែមទៀត ។ សព្វថ្ងៃនេះបើទោះជាពុំទាន់មានអ្នកណាមានសមត្ថភាពស្មើនាងមែន ប៉ុន្តែទិសដៅរបស់នាង គឺចង់ស្វែងរកធនធានកីឡាការិនីក្មេងៗជំនាន់ក្រោយឱ្យបានច្រើន ជាពិសេសក្មេងៗនៅតាមសាលារៀន និងក្មេងៗដទៃទៀតដែលមានបំណងចង់ចូលរួមនៅក្នុងវិស័យកីឡាប្រណាំងកង់់ ដើម្បីក្លាយជាកីឡាការិនីជម្រើសជាតិពិតប្រាកដសម្រាប់ត្រៀមប្រកួតកីឡាស៊ីហ្គេមលើកទី៣២ ឆ្នាំ២០២៣ ពេលដែលកម្ពុជាទទួលធ្វើជាម្ចាស់ផ្ទះ។
ជាក់ស្ដែងនៅក្នុងឱកាសប្រកួតជិះកង់អបអរថ្ងៃបុណ្យទន្លេលើកទី៤ នៅក្រុងតាខ្មៅ ខេត្តកណ្ដាល កាលពីថ្ងៃអាទិត្យ ទី១១ មីនា កន្លងមកនេះ ហេង ស៊ីវឡាងបានត្រឹមតែចូលរួមក្នុងឋានៈជាអ្នកផ្ដល់បទពិសោធន៍ដល់អ្នកជិះកង់ជំនាន់ក្រោយតែប៉ុណ្ណោះ៕
ចែករំលែកព័តមាននេះ