ម្រេចកំពត អាចនឹងមានទីផ្សារថ្មីបន្ថែមទៀតនៅប្រទេសស្វ៊ីស
- កំពត
រាជធានីភ្នំពេញ ៖ សមាគមផលិតករ LA MAISON DU GRUYÈRE ដែលមានកិត្តិនាមល្បីល្បាញប្រកបដោយសក្តានុពលក្នុងការផលិតឈីស (Cheese) កាលពីពេលថ្មីៗនេះបានសន្យាពិចារណា…
រាជធានីភ្នំពេញ ៖ សមាគមផលិតករ LA MAISON DU GRUYÈRE ដែលមានកិត្តិនាមល្បីល្បាញប្រកបដោយសក្តានុពលក្នុងការផលិតឈីស (Cheese) កាលពីពេលថ្មីៗនេះបានសន្យាពិចារណា…
រាជធានីភ្នំពេញ ៖ សមាគមផលិតករ LA MAISON DU GRUYÈRE ដែលមានកិត្តិនាមល្បីល្បាញប្រកបដោយសក្តានុពលក្នុងការផលិតឈីស (Cheese) កាលពីពេលថ្មីៗនេះបានសន្យាពិចារណា និងឆ្លៀតពេលមកទស្សនាចម្ការម្រេចកំពត ដើម្បីឈ្វេងយល់ពីប្រវត្តិសាស្ត្រ ភូមិសាស្ត្រ និងលក្ខណៈពិសេសរបស់ម្រេចកំពត ។ ការសន្យានេះ ធ្វើឡើងនៅក្នុងជំនួបពិភាក្សាការងាររវាងលោករដ្ឋមន្ត្រីក្រសួងពាណិជ្ជកម្ម ប៉ាន សូរស័ក្ដិ ជាមួយសមាគមផលិតករ LA MAISON DU GRUYÈRE, លោក M. Eric Thevenod ទីប្រឹក្សាផ្នែកម៉ាកសម្គាល់ភូមិសាស្ត្រទំនិញនៃវិទ្យាស្ថានកម្មសិទ្ធិបញ និងលោក Georges Magnin តំណាងភោជនីយដ្ឋាននៃសហព័ន្ធស្វ៊ីស ដើម្បីពង្រីកការប្រើប្រាស់ និងស្វែងរកទីផ្សារនាំចេញម្រេចកំពត ឲ្យបានកាន់តែទូលំទូលាយថែមទៀត ។ នេះបើយោងតាមការចេញផ្សាយរបស់ក្រសួងពាណិជ្ជកម្ម ។
នេះជាសញ្ញាវិជ្ជមានក្នុងការបើកច្រកទីផ្សារថ្មីមួយទៀតសម្រាប់ម្រេចកំពត ដែលជាផលិតផលសម្គាល់ភូមិសាស្ត្រត្រូវបានទទួលស្គាល់ពីអន្តរជាតិ និងកំពុងធ្វើការនាំចេញទាំងក្នុងតំបន់ និងសកលលោក ។
យោងតាមការចេញផ្សាយ លោករដ្ឋមន្ត្រី ប៉ាន សូរស័ក្តិ បានពិភាក្សាជាមួយអ្នកពាក់ព័ន្ធដើម្បីបញ្ចុះបញ្ចូលឲ្យសមាគមបែរមកប្រើប្រាស់ ម្រេចកំពត ធ្វើជាធាតុផ្សំក្នុងការផលិតឈីសដែលទើបរកឃើញរូបមន្ដថ្មី ។ ជាការឆ្លើយតប សមាគមបានសន្យាពិចារណា និងឆ្លៀតពេលមកទស្សនាចម្ការម្រេចកំពត ដើម្បីឈ្វេងយល់ពីប្រវត្តិសាស្ត្រ ភូមិសាស្ត្រ និងលក្ខណៈពិសេសរបស់ម្រេចកំពតផងដែរ ។
ប្រធានសមាគមម្រេចកំពត លោក ងួន ឡាយ បានប្រាប់កោះសន្តិភាពនៅថ្ងៃទី១២ មីនា ថា វាជាឱកាសល្អណាស់សម្រាប់សមាគមម្រេចកំពត បើសិនជាសមាគមខាងប្រទេសស្វ៊ីសអញ្ជើញមកដល់កន្លែងផ្ទាល់ ដើម្បីងាយស្រួលសិក្សាពីប្រវត្តិ និងភូមិសាស្ត្ររបស់ម្រេចកំពត ។
លោកថា ៖« សម្រាប់ម្រេចខេត្តកំពតយើង កន្លងមក គឺមានការនាំចេញតាមរយៈក្រុមហ៊ុនមួយទៅកាន់ប្រទេសស្វ៊ីសរួចហើយ តែបើសិនជាសមាគមរបស់ប្រទេសស្វ៊ីសមកពិនិត្យដល់កន្លែងបែបនេះមែន ខាងយើងពិតជារីករាយ និងស្វាគមន៍ជានិច្ច ដើម្បីឲ្យសមាគមនោះដឹងកាន់តែច្បាស់ពីម្រេចកំពត ឈ្វេងយល់ពីប្រវត្តិ និងភូមិសាស្ត្រ ងាយស្រួលនាំចេញទៅកាន់ទីផ្សារប្រទេសរបស់គេបន្ថែមទៀត » ។
បើតាមប្រធានសមាគមម្រេចកំពត កាលពីឆ្នាំ២០១៧ ផលិតផលម្រេចកំពត ផលិតបានចំនួន១០២តោន និងបាននាំចេញទៅទីផ្សារជាច្រើនប្រទេស ខណៈឆ្នាំ២០១៨នេះ លោកមើលឃើញថាទិន្នផលប្រហែលជាធ្លាក់ចុះជាងឆ្នាំមុនបន្ដិច ដោយសារនៅតាមកសិដ្ឋាននីមួយៗជួបហានិភ័យច្រើនទាក់ទងនឹងអាកាសធាតុ ។
លោកងួន ឡាយ បញ្ជាក់ថា សម្រាប់ឆ្នាំ២០១៨នេះ អាចថាផលិតបានត្រឹមតែ៧០ ទៅ៨០តោនប៉ុណ្ណោះ ។ ចំណែកតម្លៃ គឺនៅរក្សាដដែល ដោយម្រេចខ្មៅក្នុង១គីឡូក្រាម តម្លៃ១៥ដុល្លារ, ក្រហម២០ដុល្លារ និងម្រេចស តម្លៃ២៨ដុល្លារក្នុង១គីឡូក្រាម » ។
លោករដ្ឋមន្ត្រី ប៉ាន សូរស័ក្តិ បានគូសបញ្ជាក់ថា បើម្រេចកំពតត្រូវបានជ្រើសរើសជាធាតុផ្សំក្នុងការផលិតឈីសប្រភេទថ្មីបន្ថែមទៀតនោះ ទីផ្សារនាំចេញម្រេចកំពតនឹងកាន់តែរីកធំ ដែលនឹងចូលរួមចំណែកលើកស្ទួយការអភិវឌ្ឍសេដ្ឋកិច្ចជាតិកាន់តែប្រសើរឡើងមួយកម្រិតទៀត ។
គួរបញ្ជាក់ថា នៅក្នុងឆ្នាំ២០១៧ សមាគមម្រេចកំពត បាននាំចេញផលិតផលម្រេចចំនួន៦៨តោន ហើយទីផ្សារនាំចេញទៅក្រៅប្រទេសបានប្រហែល៧០% រួមមាន ទីផ្សារអឺរ៉ុប, អាមេរិក, កូរ៉េខាងត្បូង, តៃវ៉ាន់, ហុងកុង និងរុស្ស៊ី ។ នៅដើមឆ្នាំ២០១៨នេះ សមាគមមិនទាន់ចាប់ផ្ដើមប្រមូលទិន្នផលនៅឡើយទេ ប៉ុន្តែទោះជាយ៉ាងណា ក៏មានប្រទេសចិន ជប៉ុន និងអូស្ត្រាលី កំពុងចាប់អារម្មណ៍ និងកុម្មង់ជាបណ្ដើរៗហើយ ៕
ចែករំលែកព័តមាននេះ