រាជធានីភ្នំពេញ ៖ ប្រលាយបង្ហូរទឹកសម្អុយដ៏ធំមួយខ្សែ លាតសន្ធឹងពីប្រព័ន្ធបង្ហូរទឹកស្ថានីយ៍បឹងសាឡាង រហូតដល់ស្ថាននីយ៍ប៊ូមទឹកបឹងទំពុន បច្ចុប្បន្នត្រូវបានគេសង្គេតឃើញអ្នកស្រុករស់នៅជុំវិញសងខាងមាត់ប្រលាយបានបោះសំរាមចូលនៅក្នុងប្រលាយគរកកស្ទះណែនណាន់តាន់តាប់ ហើយគ្មានមន្ត្រីជំនាញណាចុះស្តារ ឬក៏ប្រមូលសំរាមទាំងនោះចោលបានទៀងទាត់ឡើយ ។ ជាក់ស្តែងដូចជានៅចំណុចស្ពានទី៣…
រាជធានីភ្នំពេញ ៖ ប្រលាយបង្ហូរទឹកសម្អុយដ៏ធំមួយខ្សែ លាតសន្ធឹងពីប្រព័ន្ធបង្ហូរទឹកស្ថានីយ៍បឹងសាឡាង រហូតដល់ស្ថាននីយ៍ប៊ូមទឹកបឹងទំពុន បច្ចុប្បន្នត្រូវបានគេសង្គេតឃើញអ្នកស្រុករស់នៅជុំវិញសងខាងមាត់ប្រលាយបានបោះសំរាមចូលនៅក្នុងប្រលាយគរកកស្ទះណែនណាន់តាន់តាប់ ហើយគ្មានមន្ត្រីជំនាញណាចុះស្តារ ឬក៏ប្រមូលសំរាមទាំងនោះចោលបានទៀងទាត់ឡើយ ។
ជាក់ស្តែងដូចជានៅចំណុចស្ពានទី៣ ស្ថិតក្នុងភូមិសន្សំកុសលទី៥ សង្កាត់បឹងទំពុន១ ព្រុំប្រទល់ជាមួយសង្កាត់បឹងទំពុន២ ខណ្ឌមានជ័យ ប្រលាយទាំងមូលកំពុងក្លាយទៅជាគំនរសំរាមគរដូចកន្លែងសម្រាប់ចោលសំរាម ដែលក្រឡេកមើលទៅលែងមើលឃើញផ្ទៃទឹក ក៏ដូចជាផ្ទៃប្រលាយទាំងមូលទៅហើយ ។ ដែលបញ្ហានេះ គឺជាកត្តាប្រឈមធ្ងន់ធ្ងរដល់ចរន្តប្រព័ន្ធបង្ហូរទឹកសម្អុយមិនអាចហូរបាន ពិសេសប៉ះពាល់ធ្ងន់ធ្ងរដល់បរិស្ថានអនាម័យ បង្កជាភាពគ្មានសោភ័ណភាពល្អសម្រាប់ទីក្រុងភ្នំពេញ ។
លោកស្រី ខឹម វណ្ណី នាយករងរដ្ឋបាលសាលខណ្ឌ ទទួលបន្ទុកបរិស្ថាន ឲ្យដឹងថា ការស្តារប្រលាយលូ គឺជាតួនាទីរបស់មន្ទីរសាធារណៈការរាជធានីភ្នំពេញ មិនមែនថ្នាក់ខណ្ឌ ឬសង្កាត់ឡើយ ។ ប៉ុន្តែទន្ទឹមនឹងនោះលោកស្រីសោកស្តាយដែលបងប្អូនពលរដ្ឋយើងតែងនាំគ្នាយកសំរាមទៅចោលក្នុងប្រលូយលូបង្ហូរទឹកនោះជាបន្តបន្ទាប់រហូត បើទោះបីជាអាជ្ញាធរព្យយាមពន្យល់ណែនាំ ។ ជាមួយគ្នានេះដែរ អាជ្ញាធរក៏មានការសំណូមពរទៅដល់អ្នករស់នៅប្របសងខាងមាត់ប្រលាយលូបង្ហូរទឹក គួរតែនាំគ្នាវេចខ្ចប់សំរាមគរទុកដើម្បីក្រុមហ៊ុនប្រមូលសំរាមយកទៅចោលទៅតាមជើងប្រមូលរបស់រថយន្តប្រមូលសំរាមឲ្យបានទៀងទាត់ ចៀសវាងការបោះចោលលើផ្ទៃប្រលាយធ្វើឲ្យកកស្ទះទឹកសម្អុយដែលហូរចេញពីលំនៅឋានរបស់បងប្អូន បង្កឲ្យមានការជន់លិចជាអន្លើៗនៅតំបន់ជាយក្រុង ពិសេសភូមិសាស្ត្រតំបន់សង្កាត់បឹងទំពុន និងសង្កាត់ស្ទឹងមានជ័យ ខណ្ឌមានជ័យខាងលើផងដែរ ។
សូមបញ្ជាក់ថា កាលពីពេលកន្លងទៅ គេក៏ធ្លាប់សង្កេតឃើញមានក្រុមមន្ត្រីជំនាញចុះស្ដារសំរាមចេញពីតំបន់ខាងលើដែរ ប៉ុន្តែស្ដារមិនបានស្រួលបួលប៉ុន្មានផង ទីតាំងផ្ទៃប្រលាយទាំងក៏ប្រែក្លាយមកជាគំនរសំរាមដូចដើមវិញទៅហើយដែរ ជាក់ស្ដែងដូចដែលរូបភាពបានបង្ហាញជូន ។ ជុំវិញបាតុភាពខាងលើនេះ មជ្ឈដ្ឋានទូទៅក៏សុំសំណូមពរដល់សាលារាជធានីភ្នំពេញ ពិសេសមន្ទីរសារធារណៈការរាជធានីភ្នំពេញ មេត្តាចុះមកពិនិត្យ និងស្តារសម្រាមដ៏ស្អុយរលួយខួបប្រាំងខួបវស្សានេះ ចេញពីប្រលាយខាងលើឲ្យបានស្អាតល្អផង ដើម្បីប្រព័ន្ធចរន្តបង្ហូរទឹកអាចហូរកាត់បានស្រួលពេលមានភ្លៀងធ្លាក់ ឬជន់លិចម្តងៗ ហើយអ្វីដែលពិសេសនោះ គឺដើម្បីធានារក្សាបាននូវបញ្ហាអនាម័យល្អ សម្រាប់ទីក្រុងផងដែរ ៕
ចែករំលែកព័តមាននេះ