ខេត្តស្វាយរៀង ៖ ក្មេងប្រុសអាយុ៣ឆ្នាំម្នាក់រអិលជើងធ្លាក់ទឹកស្រះលង់ស្លាប់ ខណៈកាន់ដងសន្ទួចស្ទួចត្រីឈរនៅមាត់ស្រះ ខាងជើងផ្ទះចម្ងាយ១៥ម៉ែត្រ បានរអិលជើងធ្លាក់ចូលក្នុងទឹកស្រះគ្មានអ្នកដឹង បណ្តាលឲ្យលង់ទឹកស្លាប់តែម្តង ។ ករណីក្មេងលង់ទឹកស្លាប់បានកើតឡើងកាលពីវេលាម៉ោង២និង៣០នាទីរសៀលថ្ងៃទី១៣ ខែមិនា ឆ្នាំ២០១៨ ស្ថិតក្នុងភូមិ ត្រពាំងស្បូវ ឃុំព្រៃតាអី ស្រុកស្វាយទាប ខេត្តស្វាយរៀង ។
បើតាមសមត្ថកិច្ចបានឲ្យដឹងថា នៅមុនពេលកើតហេតុកុមាររងគ្រោះខាងលើ បានកាន់ដងសន្ទួចស្ទួចត្រី ធ្វើអំពីជ័រដើរស្ទួចលេង ហើយឪពុកម្តាយមិនបានចាប់អារម្មណ៍ដោយសារ រវល់ការងារផ្ទះ ហើយនៅម៉ោងប្រមាណជា៤និង១០នាទីរសៀល ទើបបានដឹងថា បាត់កូនក៏នាំគ្នាដើររក ប៉ុន្តែដើររកមិនឃើញក៏មានការសង្ស័យថា ក្រែងដើរធ្លាក់ស្រះទឹកខាងជើងផ្ទះក៏បានរកអ្នកជិតខាងឲ្យចុះរាវរកក្នុងស្រះ ទើបប្រទះឃើញសពក្មេងប្រុសស្លាប់នៅក្នុងបាតស្រះទឹកទៅហើយ ។
ក្រោយពីមានការភ្ញាក់ផ្អើលថា មានករណីលង់ទឹកស្លាប់សមត្ថកិច្ចបានចុះដល់ផ្ទះកើតហេតុខាងលើ ដើម្បីពិនិត្យសព ប៉ុន្តែពុំមានស្លាកស្នាមអ្វីនោះទេ គឺស្លាប់ដោយសារលង់ទឹកពិតប្រាកដមែន ទើបសមត្ថកិច្ចប្រគល់សពឲ្យទៅក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ