រាជធានីភ្នំពេញ ៖ សេចក្តីរាយការណ៍បន្តថា ករណីដែលផ្សែងភ្លើងហុយឡើងខ្មួលខ្មាញ់នោះ គឺបានកើតឡើងនៅទីលានចាក់សំរាម ស្ថិតក្នុងភូមិតាឡី សង្កាត់ដង្កោ ខណ្ឌដង្កោ ដែលឆាបឆេះយ៉ាងសន្ធោសន្ធៅ បង្កការភ្ញាក់ផ្អើល កាលពីម៉ោង០១ និង១០នាទីរសៀលថ្ងៃទី១៣ មីនា នេះ ។
បើយោងតាមអ្នករើសអេតចាយនៅក្បែរនោះបានឱ្យដឹងថា មុនពេលកើតហេតុ នៅទីលានចាក់សំរាមនេះពួកគាត់បានឮសម្លេងផ្ទុះកំប៉ុងហ្គាស មួយសន្ទុះក្រោយមក ក៏មានអគ្គិភ័យឆេះរាលដាលបែបនេះ ។ ប្រភពបន្ដថា នៅក្នុងហេតុការណ៍នេះ គ្មានការខាតបង់របស់របរមានតម្លៃទេ ដោយសារទីតាំងដែលឆេះនេះសុទ្ធតែសំរាម ។ បើយោងតាមលោក តុល តូនី នាយប៉ុស្ដិ៍នគបាលខណ្ឌដង្កោ ក៏ឱ្យដឹងដែរថា ភ្លើងឆេះសំរាមនេះ អាចបណ្ដាលមកពីថ្ងៃក្ដៅពេកទើបវាបណ្ដាលឲ្យផ្ទុះកំប៉ុងហ្គាស ដែលគេប្រមូលមពីក្រុងមកបោះចូលក្នុងទីលានចាក់សំរាមនេះ ។
គួររំលឹកថា ប្រមាណជា១ឆ្នាំមុនទីលានចាក់សំរាមនេះ ក៏មានការឆាបឆេះនេះកើតឡើងម្ដងដែរ ប៉ុន្ដែមិនអាចជួយពន្លត់បានទេ គឺបានទុកឆាបឆេះអស់រយៈពេល១សប្ដាហ៍ ទើបវារលត់ដោយខ្លួនឯងវិញ ។
ចែករំលែកព័តមាននេះ