សហរដ្ឋអាមេរិក ៖ គណៈកម្មការស៊ើបការណ៍របស់សភាអាមេរិកដែលពួកសាធារណរដ្ឋមានសំឡេងភាគច្រើនប្រកាសនាថ្ងៃទី១២ មីនា ថា ពុំបានរកឃើញភស្តុតាងណាមួយពីការឃុបឃិតគ្នារវាងក្រុមឃោសនាលោកដូណាល់ ត្រាំ និងរុស្ស៊ីឡើយអំឡុងពេលឃោសនាបោះឆ្នោតប្រធានាធិបតីអាមេរិកឆ្នាំ២០១៦ ។
បណ្តាសមាជិកគណៈកម្មការនេះនិយាយថា បានបញ្ចប់ការស៊ើបអង្កេតរបស់ខ្លួនលើការជ្រៀតជ្រែករបស់រុស្ស៊ី ហើយបានចេញផ្សាយការសន្និដ្ឋានសំខាន់នានារបស់ខ្លួន ។
សេចក្តីសន្និដ្ឋានទាំងនេះទទួលការតវ៉ាភ្លាមៗពី សំណាក់ពួកប្រជាធិបតេយ្យដែលយល់ថា មានគោលបំណងការពារប្រធានាធិបតីនៃគណបក្សសាធារណរដ្ឋ ។ ក្នុងចំណោមការសន្និដ្ឋានទាំងនេះ ប្រកាសកាលពីថ្ងៃទី១២ មីនា បណ្តាសមាជិកគណៈកម្មការជាអ្នកសាធារណរដ្ឋបដិសេធការសន្និដ្ឋានរបស់ភ្នាក់ងារស៊ើបការណ៍អាមេរិកកាលពីខែមករា ឆ្នាំ២០១៧ លើការជ្រៀតជ្រែករបស់លោកវ្ល៉ាឌីមៀរ ពូទីន ដើម្បីជួយលោកត្រាំ កាលពីឆ្នាំ២០១៦ យកឈ្នះលើលោកស្រីហ៊ីលឡារី គ្លីនតុន ។ បណ្តាអ្នកសាធារណរដ្ឋយល់ស្របពីការវាយប្រហារខាងព័ត៌មានវិទ្យាមួយចំនួនប្រឆាំងបណ្តាស្ថាប័ននយោបាយអាេមរិកក្នុងឆ្នាំ២០១៥ និង២០១៦ ពិសេសតាមរយៈបណ្តាបណ្តាញសង្គម ។ ក៏ប៉ុន្តែពួកគេរិះគន់ចម្លើយតបពុំសមស្របរបស់រដ្ឋការអាមេរិកមុនការបោះឆ្នោត ហើយនិយាយថាបានស៊ើបអង្កេតលើសំណុំរឿងស្រាវជ្រាវប្រឆាំងលោកត្រាំ ផ្តល់លុយកាក់ដោយក្រុមលោកស្រីគ្លីនតុន ៕
ចែករំលែកព័តមាននេះ