ទីក្រុងប៉េកាំង ៖ រដ្ឋមន្ត្រីពាណិជ្ជកម្មចិន លោក Zhong Shan បានថ្លែងកាលពីថ្ងៃអាទិត្យថា រាល់ការធ្វើសង្គ្រាមពាណិជ្ជកម្មជាមួយសហរដ្ឋអាមេរិក គឺមានតែបង្កគ្រោះភ័យដល់សេដ្ឋកិច្ចសកលប៉ុណ្ណោះ ខណៈប្រទេសចិនបន្តរិះគន់អាមេរិកដែលបានដាក់ពន្ធលើផលិតផលនាំចូល ។
បន្ទាប់ពីទទួលបានសម្ពាធពីប្រទេសជាសម្ព័ន្ធមិត្តហើយ សហរដ្ឋអាមេរិកបានបើកផ្លូវសម្រាប់ការចរចារួចផុតពីពន្ធ២៥%លើដែកថែប និង១០%លើអាលុយមីញ៉ូម ដែលលោកប្រធានាធិបតី ដូណាល់ ត្រាំ បានប្រកាសកាលពីសប្តាហ៍មុន ។
កាលពីថ្ងៃសៅរ៍ សហភាពអឺរ៉ុប និងប្រទេសជប៉ុនបានជំរុញឲ្យសហរដ្ឋអាមេរិកអនុញ្ញាតឲ្យពួកគេរួចផុតពីពន្ធទាំងនេះ ។ ប៉ុន្តែគោលដៅសំខាន់របស់លោកត្រាំ គឺប្រទេសចិន ដែលបានបង្កើនការផលិតដែកថែបនិងជំរុញឲ្យដែកថែបកាន់តែលើសលប់ខ្លាំងនៅលើទីផ្សារសកល ។ ម្តងហើយម្តងទៀតប្រទេសចិនបានសន្យាថា នឹងការពារសិទ្ធិ និងអត្ថប្រយោជន៍របស់ខ្លួន ប្រសិនបើពួកគេស្ថិតក្នុងគោលដៅអាមេរិក ។
ទោះជាយ៉ាងណា លោក Zhong បាននិយាយថា ប្រទេសចិនមិនចង់មានសង្គ្រាមពាណិជ្ជកម្មទេ ។ លោកថា ៖« គ្មាននរណាឈ្នះឡើយក្នុងសង្គ្រាមពាណិជ្ជកម្ម ។ វាមានតែបង្កឲ្យមានគ្រោះភ័យដល់ប្រទេសចិន សហរដ្ឋអាមេរិក និងសកលលោកប៉ុណ្ណោះ »។
លោកបន្តថា ប្រទេសចិនអាចដោះស្រាយរាល់ឧបសគ្គ ហើយនឹងការពារអត្ថប្រយោជន៍
របស់ខ្លួន ប៉ុន្តែប្រទេសទាំងពីរនឹងបន្តការចរចាជាមួយគ្នា ។
ជាមួយគ្នានេះ កាលពីថ្ងៃសុក្រកន្លងមក វិស័យលោហៈធាតុរបស់ចិនបានជំរុញឲ្យរដ្ឋាភិបាលសងសឹកសហរដ្ឋអាមេរិកវិញ តាមរយៈធ្យូងថ្ម ។ ផ្នែកនេះមានសារសំខាន់ណាស់សម្រាប់មូលដ្ឋាននយោបាយរបស់លោកត្រាំ ដោយលោកបានសន្យាកាលពីពេលបោះឆ្នោតថា នឹងជួយឲ្យឧស្សាហកម្មអាមេរិក និងការងារក្នុងវិស័យនេះរីកចម្រើនឡើងវិញ ។
សហរដ្ឋអាមេរិកជាប្រទេសនាំចូលដែកថែបច្រើនជាងគេលើពិភពលោក ដែលបានទិញប្រមាណ៣៥លានតោននៃវត្ថុធាតុដើមក្នុងឆ្នាំ២០១៧ ។
ភាពតានតឹងផ្នែកពាណិជ្ជកម្មរវាងសហរដ្ឋអាមេរិក និងចិន បានកើនឡើងតាំងពីលោកត្រាំ ឡើងកាន់តំណែង ។ ប្រទេសចិននាំចេញដែកថែបទៅកាន់សហរដ្ឋអាមេរិកតែបន្តិចប៉ុណ្ណោះ ប៉ុន្តែផលិតកម្មរបស់ពួកគេបានជំរុញឲ្យដែកថែបលើទីផ្សារមានចំនួនលើសលប់ ហើយធ្វើឲ្យតម្លៃធ្លាក់ចុះ ៕
ចែករំលែកព័តមាននេះ