ខេត្តកណ្ដាល ៖ ជិត០៣ខែហើយ ដែលជនរងគ្រោះបីនាក់បានស្លាប់យ៉ាងអាណោចអាធម៌ ដោយបុរសម្នាក់បានបើករថយន្តបុកនៅក្រុងតាខ្មៅ ហើយប៉ូលិសបានកសាងសំណុំរឿងបញ្ជូនទៅតុលាការតែប៉ុណ្ណោះ ។ រីឯជនល្មើសកំពុងរស់នៅក្រៅសំណាញ់ច្បាប់នៅឡើយ ។
ប៉ូលិសបញ្ជាក់ថា សំណុំរឿងត្រូវបានបញ្ជូនទៅតុលាការហើយ ដែលបច្ចុប្បន្នលោកស្រី ស៊ូ សុជាតា ព្រះរាជអាជ្ញារងអមសាលាដំបូងខេត្តកណ្តាល កំពុងចាត់ការតាមនីតិវិធី ។ អ្វីដែលមជ្ឈដ្ឋានចាប់អារម្មណ៍ខ្លាំង គឺជនល្មើសពុំទាន់ត្រូវបានចាប់ខ្លួននៅឡើយទេ ទោះបីស្គាល់អត្តសញ្ញាណថា ឈ្មោះ សោម រតនៈ ក៏ដោយ ។
ជនល្មើសធ្លាប់ចរចារបញ្ចប់សំណុំរឿងជាមួយគ្រួសារនៃសព តែមិនបានសម្រេច ហើយសំណុំរឿងនេះក៏ស្ងាត់សូន្យឈឹងតែម្ដង ។ ប៉ូលិសបញ្ជាក់ថា ឈ្មោះ សោម រតនៈ ប្រឈមបទល្មើស រត់គេចពីការទទួលខុសត្រូវតាមមាត្រា៥៤៣ នៃក្រមព្រហ្មទណ្ឌ និងបទបើកបរដោយធ្វេសប្រហែស បណ្ដាលឱ្យស្លាប់អ្នកដទៃ តាមមាត្រា៨៥ និងមាត្រា៥៣ នៃច្បាប់ស្ដីពីចរាចរណ៍ផ្លូវគោក ។
សូមជម្រាបថា យុវជនបីនាក់បានខ្ទាតផ្លោងធ្លាក់ផ្លូវស្លាប់ភ្លាមៗ ក្រោយពេលរថយន្តនោះបានរត់ជាង១០០ម៉ែត្រ កាលពីវេលាម៉ោង៦និង១០នាទីល្ងាច ថ្ងៃសុក្រទី០៥ ខែមករា ឆ្នាំ២០១៨ នៅជិតវិទ្យាល័យខ្ពបវែង ស្ថិតក្នុងក្រុងតាខ្មៅ ។
មុនពេលកើតហេតុមានរថយន្តស៊េរីទំនើបមួយគ្រឿង ពណ៌ខ្មៅ ពាក់ផ្លាកលេខ ភ្នំពេញ 2U-6977 បើកបរល្បឿនលឿនដូចហោះ ក្នុងទិសដៅពីលិចទៅកើត លុះមកដល់ចំណុចកើតហេតុ បានជែងម៉ូតូមួយគ្រឿង ពណ៌ខ្មៅលាយស អត់ផ្លាកលេខ ។
ប៉ុន្តែមិនផុតក៏ជ្រុលបុកម៉ូតូយ៉ាងពេញទំហឹង បណ្តាលឱ្យយុវជនបីនាក់ ខ្ទាតផ្លោងធ្លាក់ចេញពីផ្លូវស្លាប់ម្នាក់ភ្លាមៗ និងពីរនាក់ទៀត បានដាច់ខ្យល់ស្លាប់ពេលដឹកបញ្ជូនទៅមន្ទីរពេទ្យ ។ ដោយឃើញហេតុការណ៍មិនស្រួល អ្នកបើកបររថយន្តបង្កបានបន្ថែមល្បឿន បើករត់គេចខ្លួនតាមផ្លូវលេខ១១៥ លុះដល់ស្តុបជិតកាកបាទក្រហមខេត្តកណ្ដាល ក៏បានប្លុងរថយន្តចោល រួចអ្នកបើកបរបានចុះរត់គេចខ្លួន ៕
ចែករំលែកព័តមាននេះ