ខេត្តមណ្ឌលគីរី ៖ ក្នុងរយៈពេលបីថ្ងៃរថយន្តប្រភេទសាំយ៉ុងដឹកអ្នកដំណើរចំនួនបីគ្រឿង ត្រូវបានជំនាញផ្នែករដ្ឋបាលព្រៃឈើ កែវសីមា បង្ក្រាបបានជាបន្តបន្ទាប់ ក្រោយមានបទបញ្ជារបស់ប្រធានគណៈកម្មការថ្នាក់ជាតិ ទប់ស្តាត់បង្ការ និងបង្ក្រាបបទល្មើស ព្រៃឈើ បានដាក់កម្លាំងជិត១០០នាក់ ទៅតំបន់ភូមិភាគឦសាន ដើម្បីរារាំងការជួញដូរឈើខុសច្បាប់ ។
ប្រភពបានឲ្យដឹងថា រថយន្តសាំយ៉ុងដឹកឈើដុំ នឹងទ្វាបង្អួចដែលកែច្នៃរួចបីគ្រឿង ត្រូវបាននាយសង្កាត់រដ្ឋបាលព្រៃឈើស្រែព្រះ ចុងផ្លាស់ និងនាយផ្នែករដ្ឋបាលព្រៃឈើកែវសីមា ចាប់ដាក់ស្នាក់ការជាបន្តបន្ទាប់ ខណៈក្រុមរថយន្តទាំងនោះ បានដឹកឈើចេញពីខេត្តមណ្ឌលគីរី ឆ្ពោះទៅរាជធានីភ្នំពេញ ដើម្បីលក់បន្ត ។ ករណីខាងលើបានធ្វើឡើងចាប់ពីថ្ងៃទី១០ មីនា រហូតដល់ថ្ងៃទី១៣ មីនា ២០១៨ នេះតាមបណ្តោយផ្លូវជាតិលេខ៧៦ ក្នុងភូមិសាស្ត្រឃុំស្រែខ្ទុម ស្រុកកែវសីមា ខេត្តមណ្ឌលគីរី ។
ក្រុមឈ្មួញរកស៊ីឈើបាននិយាយថា សព្វថ្ងៃឈើប្រណិតក្នុងខេត្តមណ្ឌលគីរី ត្រូវគេកាប់អស់ហើយ នៅសល់តែប្រភេទឈើកកោះ ឈើសុក្រំ ប៉ុណ្ណោះ ដែលដឹករាល់ថ្ងៃ ។ នៅពេលដឹកតាមរថយន្តកា ដោយកាត់មុខរដ្ឋបាលព្រៃឈើនោះ គឺត្រូវបង់លុយឲ្យ លោកនាយសង្កាត់ឈ្មោះ ស្រ៊ុនឈួន និងនាយផ្នែកឈ្មោះ ជុយ សុឃាង រួចរាល់ទើបអាចដឹកបាន តែមិនអ៊ីចឹងជាប់អន្ទាក់មិនខាន ។
ទោះជាយ៉ាងណាគិតត្រឹមវេលាម៉ោង២រសៀលថ្ងៃទី១៣ មិនា អ្នកយកព័ត៌មានមិនទាន់អាចសុំព័ត៌មានលម្អិតពីករណីចាប់រថយន្តដឹកឈើទាំងបីគ្រឿងខាងលើនោះបានទេ ពីមន្ត្រីជំនាញរដ្ឋបាលព្រៃឈើ ព្រោះមន្ត្រីទាំងនោះហាក់មានការទើសទាល់ក្នុងការផ្តល់ព័ត៌មានដល់អ្នកកាសែត ។
សេចក្តីរាយការណ៍ដាច់ដោយឡែកមួយទៀតពីស្រុកពេជ្រាដា នឹងស្រុកកោះញែកបានឲ្យដឹងថា សព្វថ្ងៃគេឃើញមានរោងសិប្បកម្មកែច្នៃឈើខុសច្បាប់ជាច្រើន កំពុងធ្វើសម្មភាពក្នុងទឹកដីស្រុកទាំងពីរ ។ ប្រភពថា ស្ទើរតែ១០០% ទៅហើយ រាល់សិប្បកម្ម ក្នុងខេត្តមណ្ឌលគីរី គឺភាគច្រើនកន្លែងធំបន្លំដេក ។ ខណៈច្បាប់សិប្បកម្មរដ្ឋកំណត់ត្រឹមមួយច្បាប់សិប្បកម្មមួយអាចមានលទ្ឋភាព ធ្វើទ្វារ បង្អូច ក្នុងរង្វង់ឈើប្រមាណ៥ទៅ៧ម៉ែត្រគូបប៉ុណ្ណោះ ហើយត្រូវមានក្រុមហ៊ុនដីសម្បទានជាអ្នកផ្តត់ផ្គង់ ។
តែជាក់ស្តែងរាល់សិប្បកម្មនៅមណ្ឌលគីរី បែរជាមានឈើសម្រាប់កែច្នៃមិនចេះអស់នោះទេ ដោយគេដឹងថា ម្ចាស់សិប្បកម្មបានចូលទិញឈើខុសច្បាប់ពីក្រុមឈ្មួញ ដែលចូលទៅកាប់ឈើក្នុងដែនជម្រកសត្វព្រៃស្រែពក អ៊ីចឹងហើយទើបមានឈើសម្រាប់កែច្នៃមិនចេះអស់នោះ ៕
ចែករំលែកព័តមាននេះ