ខេត្តសៀមរាប ៖ ប៉ូលិសចរាចរណ៍ម្នាក់ ខណៈកំពុងជិះម៉ូតូបានដកកាំភ្លើងខ្លីបាញ់អស់ជាច្រើនគ្រាប់ នៅតាមដងផ្លូវមុខផ្សារកុងតឺន័រ ធ្វើឱ្យប្រជាពលរដ្ឋ និងភ្ញៀវទេសចរ ដែលកំពុងធ្វើដំណើរតាមដងផ្លូវសាធារណៈ មានការភ្ញាក់ផ្អើលពេញក្រុងសៀមរាប ។…
ខេត្តសៀមរាប ៖ ប៉ូលិសចរាចរណ៍ម្នាក់ ខណៈកំពុងជិះម៉ូតូបានដកកាំភ្លើងខ្លីបាញ់អស់ជាច្រើនគ្រាប់ នៅតាមដងផ្លូវមុខផ្សារកុងតឺន័រ ធ្វើឱ្យប្រជាពលរដ្ឋ និងភ្ញៀវទេសចរ ដែលកំពុងធ្វើដំណើរតាមដងផ្លូវសាធារណៈ មានការភ្ញាក់ផ្អើលពេញក្រុងសៀមរាប ។ ទោះបីជាបែបណា ត្រូវបានសមត្ថកិច្ចនគរបាលអន្តរាគមន៍ឃាត់ខ្លួនវាយខ្នោះ យកទៅធ្វើការសួរនាំនៅស្នងការដ្ឋាន ។ ហេតុការណ៍ប៉ូលិសចរាចរណ៍បាញ់បោះសេរី បានកើតឡើង នៅវេលាម៉ោង០៩ និង២០នាទីយប់ថ្ងៃទី១១ មីនា ស្ថិតនៅមុខផ្សារកុងតឺន័រ(ស្តាតចាស់) ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ។
ជុំវិញករណីខាងលើនោះ លោក ទិត្យ ណារ៉ុង ស្នងការខេត្តសៀមរាបបានប្រាប់ឱ្យដឹងនៅថ្ងៃទី១២ មីនា ថា ជនបាញ់បោះសេរីនេះ ជាមន្ត្រីប៉ូលិសចរាចរណ៍ដកកាំភ្លើងបាញ់មេឃលេងអស់ជាច្រើនគ្រាប់ នៅមុខផ្សារកុងតឺន័រ (ស្តាតចាស់) កាលពីយប់ថ្ងៃទី១១ មីនា ហើយលោកបានឱ្យមន្ត្រីជំនាញធ្វើការហើយ ប៉ុន្តែចំណាត់ការ ចំពោះជនរូបនេះយ៉ាងណានោះ លោកនៅមិនទាន់បានដឹងនៅឡើយទេ ដោយសារលោកជាប់ បេសកកម្មមកភ្នំពេញ ។ បើតាមប្រភពពីសមត្ថកិច្ចនគរបាលខេត្តសុំមិនបញ្ចេញឈ្មោះបានឱ្យដឹងថា មន្ត្រីប៉ូលិសចរាចរណ៍ដែលបាញ់បោះសេរី ផ្អើលក្រុងសៀមរាបនេះឈ្មោះ តាន់ ភីរម្យ ភេទប្រុស អាយុ៣៥ឆ្នាំ មាន
ឋាននរសក្តិជាអនុសេនីយ៍ត្រី នគរបាលចរាចរណ៍ផ្លូវគោក ។ ប្រភពបានបន្តថា មន្ត្រីនគរបាលចរាចរណ៍បាញ់បោះសេរីខាងលើត្រូវបានឃាត់ខ្លួនពេលទៅដល់ផ្ទះបញ្ជួនទៅសាកសួរនៅប៉ុស្តិ៍រដ្ឋបាលសង្កាត់គោកចក ។
បើតាមលោកវរសេនីយ៍ឯក ជឹម សុវណ្ណ ប្រធានការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបានប្រាប់តាមទូរស័ព្ទនៅវេលាម៉ោង២និង២៣នាទីរសៀលថ្ងៃទី១២ មីនាថា ជនដែលបាញ់បោះសេរីនៅតាមដងផ្លូវសាធារណៈនោះ គឺជាមន្ត្រីនគរបាលចរាចរណ៍ពិតមែន ។ លោកបានបន្តថា មន្ត្រីរូបនោះត្រូវបានលោកស្នងការឱ្យចាត់ការទៅតាមវិន័យរបស់នគរបាលជាតិ ប៉ុន្តែត្រូវប្រគល់ទៅឱ្យលោកវរសេនីយ៍ឯក ភឹង ចិន្តារ៉េត ស្នងការរង ទទួលបន្ទុកកណ្តាលយុត្តិធម៌នៃស្នងការដ្ឋាននគរបាលខេត្តសៀមរាប ចាត់ការបន្ត ឬ ធ្វើយ៉ាងណានៅលើគាត់ជាអ្នកសម្រេច ។
ជុំវិញករណីខាងលើនោះដែរ កោះសន្តិភាព មិនអាចសុំការពន្យល់ពីលោកវរសេនីយ៍ឯក ភឹង ចិន្តារ៉េត បានទេ នៅវេលាម៉ោង២និង៤២នាទីរសៀលនេះ ព្រោះទូរស័ព្ទចូលគ្មានអ្នកទទួល ។ មិនមានប្រភពព័ត៌មានណាមួយឱ្យដឹងថា មូលហេតុប៉ូលិសម្នាក់ដែលបាញ់មេឃផ្អើលគេផ្អើលឯងនេះ តើបណ្តាលមកពីមូលហេតុអ្វីឱ្យប្រាកដនៅឡើយទេ ព្រោះមេមួយឆ្លើយដាក់មួយឱ្យប្រាកដមិនបានសោះ?
ចែករំលែកព័តមាននេះ