ខេត្តក្រចេះ ៖ មនុស្សប្រុសស្រី៨នាក់ដែលអាជ្ញាធរកំណត់ថា ជាមេខ្យល់ក្នុងសកម្មភាព កៀងគរមនុស្សមកកាប់ទន្ទ្រានដីព្រៃខុសច្បាប់ និងត្រូវបានចាប់ខ្លួន និងនាំខ្លួនមកសាកសួរនៅសាលាដំបូងខេត្ត មានរយៈ៥ថ្ងៃរួចមកនោះ គឺត្រូវបានសម្រេចដោះលែងឲ្យនៅក្រៅឃុំវិញហើយ កាលពីរសៀលថ្ងៃទី១២…
ខេត្តក្រចេះ ៖ មនុស្សប្រុសស្រី៨នាក់ដែលអាជ្ញាធរកំណត់ថា ជាមេខ្យល់ក្នុងសកម្មភាព កៀងគរមនុស្សមកកាប់ទន្ទ្រានដីព្រៃខុសច្បាប់ និងត្រូវបានចាប់ខ្លួន និងនាំខ្លួនមកសាកសួរនៅសាលាដំបូងខេត្ត មានរយៈ៥ថ្ងៃរួចមកនោះ គឺត្រូវបានសម្រេចដោះលែងឲ្យនៅក្រៅឃុំវិញហើយ កាលពីរសៀលថ្ងៃទី១២ ខែមីនា ឆ្នាំ២០១៨ ។
មន្ត្រីតុលាការខេត្តក្រចេះ បានប្រាប់ឲ្យដឹងថា ក្រោយការសាកសួរជនទាំង៨នាក់បានឆ្លើយបដិសេធ និងបានព្រមប្រគល់ដីព្រៃដែលកាន់កាប់ខុសច្បាប់ប្រគល់មកឲ្យក្រុមហ៊ុនវិញ ។ ហើយក៏ការដោះលែងនេះដែរ ក៏ត្រូវបានធ្វើឡើងទៅតាមនីតិវិធី ការតព្វកិច្ចនៃការត្រួតពិនិត្យ តាមផ្លូវតុលាការតាមមាត្រា២២៣ នៃក្រមនីតិវិធីព្រហ្មទណ្ឌ ។
មនុស្សប្រុសស្រី៨នាក់ទាំងនេះ ត្រូវបានអាជ្ញាធរចាប់ខ្លួនពួកគេ កាលពីថ្ងៃទី០៨ ខែមីនា ឆ្នាំ២០១៨ នៅក្នុងហេតុការណ៍ប៉ះទង្គិចមួយរវាងអាជ្ញាធរកម្លាំងចម្រុះជាមួយនឹងក្រុមអ្នកតវ៉ាដីធ្លីជាង២០០គ្រួសារ ដែលពួកគេបាននាំគ្នាតវ៉ាបិទផ្លូវជាតិលេខ៧៦A ក្នុងនោះគ្រប់ដៃប្រដាប់ដោយអាវុធ និងមានចេតនាប៉ុនប៉ងប្រើហិង្សាមកលើអាជ្ញាធរនៅក្នុងគ្រានោះផងដែរ ។
អភិបាលស្រុកស្នួល លោក គង់ គឹមនី បានយល់ឃើញថា ការដោះលែងនេះជាសិទ្ធិរបស់តុលាការ ហើយការដោះលែងគឺធ្វើឡើងត្រឹមត្រូវតាមនីតិវិធី ។
ថ្លែងឲ្យដឹងនៅថ្ងៃទី១៣ ខែមីនា នេះ អភិបាលស្រុកស្នួល លោក គង់ គឹមនី បានឲ្យដឹងថា កន្លងទៅរយៈពេល៥ថ្ងៃមកនេះ គឺស្ថានភាពនៅកន្លែងធ្លាប់ផ្ទុះបាតុភាពពីក្រុមអ្នកតវ៉ាត្រូវបានស្ងប់ស្ងាត់ធម្មតា ។ ខណៈដែលពលរដ្ឋជាអ្នកតវ៉ាទាំងនោះ បានសម្រេចចាក់ចេញពីរោងខ្ទម ដែលសង់សម្រាប់ស្នាក់នៅបណ្ដោះអាសន្នដើម្បីកាប់ទន្ទ្រានដីព្រៃក្នុងបរិវេណក្រុមហ៊ុន បានត្រលប់ទៅលំនៅឋានរស់នៅអចិន្ត្រៃយ៍វិញ នៅតាមបណ្តាស្រុក ខេត្តផ្សេងៗរៀងៗខ្លួន ។
ដោយលោកអភិបាលស្រុកស្នួល បានបញ្ជាក់ថា កន្លងមកអាជ្ញាធរស្រុក និងខេត្ត ដែលបានចុះទៅសម្របសម្រួលរឿងវិវាទដីធ្លីជាមួយនឹងពលរដ្ឋចំណាកស្រុកទាំងចំនួនជាង២០០គ្រួសារ ឲ្យពួកគាត់បញ្ឈប់ការចូលមកកាប់ទន្ទ្រានដីខុសច្បាប់ ដោយតម្រូវឲ្យពួកគាត់ទៅបញ្ជាក់ពីមូលដ្ឋានសាមីថា ពួកគាត់គាត់ពិតជាគ្មានដីពិតប្រាកដ និងស្នើរមកអាជ្ញាធរស្រុកស្នួល ដើម្បីឲ្យអាជ្ញាធររៀបចំដីសម្បទានសង្គមកិច្ចស្របច្បាប់ឲ្យទៅពួកគាត់បានកាន់កាប់ ។ តែផ្ទុយទៅវិញ ពួកគាត់ទាំងចំនួននោះហាក់មិនទទួលយកកាសម្របសម្រួលនូវគោលនយោបាយនេះពីអាជ្ញាធរនោះទេ គឺពួកគាត់នៅតែបន្តកើនមនុស្សចំណាកស្រុកនាំគ្នាចូលមកកាប់ទន្ទ្រានដីព្រៃរបស់ក្រុមហ៊ុន យ៉ាងគំហុក និងកាន់កាប់ខុសច្បាប់ទៅវិញដោយសកម្មភាពនេះ ក៏ត្រូវបានលោកអភិបាលស្រុកស្នួល ចាត់ទុកថាជាចេតនានយោបាយ ។
គួរំឭកថា បញ្ហាវិវាទដីធ្លីដ៏ចម្រូងចម្រាស់មួយបានកើតមានមានរយៈពេលជាច្រើនឆ្នាំមកហើយ ពីសំណាក់ប្រជាអ្នកតវ៉ាចំណាកស្រុកជាង២០០គ្រួសារ ជាមួយនឹងក្រុមហ៊ុនចម្ការកៅស៊ូមេមត់ ដែលមានជាក្រុមហ៊ុនមួយមានច្បាប់វិនិយោគដីសម្បទានសេដ្ឋកិច្ចមានទំហំជិត១ម៉ឺនហិកតានៅក្នុងភូមិសាស្ត្រស្រុកស្នួល ។ ការចម្រូងចម្រាស់រហូតឈានឲ្យមានការផ្ទុះបាតុភាពធ្ងន់ធ្ងរយ៉ាងក្តៅគគុកកាលពីថ្ងៃទី០៨ ខែមីនា កន្លងទៅ ។ នៅពេលប្រជាអ្នកតវ៉ាទាំងចំនួនជាង២០០គ្រួសារទាំងនោះ ប្រដាប់ដោយដោយអាវុធ រួមមាន ពូថៅ កាំបិត ដំបង ដបសាំង ជំពាមគ្រាប់កង់ ក៏ដូចជាកាំភ្លើងកែច្នៃ បានចេញមកតវ៉ាបិទផ្លូវជាតិលេខ៧៦A ហើយថែមទាំងប៉ុនប៉ងប្រើហិង្សាមកលើអាជ្ញាធរចម្រុះ នៅពេលដែលក្រុមហ៊ុនបានយកគ្រឿងចក្រចូលទៅឈូសឆាយប្រឡាយធ្វើក្រវាត់ព្រំដីក្នុងបរិវេណរបស់ក្រុមហ៊ុន ។ ជាមួយនឹងការតវ៉ានៅថ្ងៃនោះ ក្រុមអ្នកតវ៉ាបានអះអាងថា ការយកគ្រឿងចក្រចូលទៅឈូសឆាយនេះបានធ្វើឲ្យប៉ះពាល់ដីធ្លីរបស់ពួកគាត់ ដែលនៅមិនទាន់បានដោះស្រាយចប់សព្វគ្រប់ ។ ក្នុងស្ថានភាពដ៏តានតឹង និងក្តៅគគុកនាថ្ងៃនោះ កម្លាំងប្រដាប់អាវុធចម្រុះក៏បានបាញ់កាំភ្លើងឡើងលើអស់ជាច្រើនគ្រាប់ដើម្បីបំបែកហ្វូងក្រុមអ្នកតវ៉ា ទើបសភាពការមានភាពធូរស្រាល ។ ក្នុងសកម្មភាពនោះដែរ ក៏មានមនុស្សប្រុសស្រី៨នាក់ ដែលអាជ្ញាធរកំណត់ថាជាមុខសញ្ញាមេខ្យល់ ក៏ត្រូវបានចាប់ខ្លួន ។ ហើយហេតុការណ៍ប៉ះទង្គិចនៅថ្ងៃនោះ ក៏មិនបណ្តាលឲ្យប៉ះពាល់ដល់អាយុជីវិតនណាម្នាក់ ដូចទៅតាមការលើកឡើងជាការបំប៉ោងព័ត៌មាននោះទេ ៕
ចែករំលែកព័តមាននេះ