ខេត្តពោធិ៍សាត់ ៖ ផ្លូវជាច្រើនខ្សែក្នុងសង្កាត់ផ្ទះព្រៃ ក្រុងពោធិ៍សាត់ កំពុងតែជួសជុលនិងស្ថាបនាព្រមគ្នាដោយគម្រោងថវិកាមូលនិធិអភិវឌ្ឍឃុំ-សង្កាត់ឆ្នាំ២០១២ របស់រាជរដ្ឋាភិបាលតាមរយៈការដេញថ្លៃបានដោយក្រុមហ៊ុនឯកជន ។លោក សៅ ម៉ុង ចៅសង្កាត់ផ្ទះព្រៃឱ្យដឹងថា ផ្លូវដែលកំពុងស្ថាបនានេះជាផ្លូវក្រួសក្រហមសិនមិនទាន់ជាផ្លូវកៅស៊ូទេ មានចំនួន១៤ខ្សែ ប្រវែង១០,១៩៩មែ៉ត្រ ស្ថិតក្នុងភូមិចំនួន៥ក្នុងសង្កាត់ផ្ទះព្រៃ ភូមិពាលញែក២, ភូមិចំការចេកខាងជើង, ភូមិចំការចេកខាងត្បូង, ភូមិគក និងភូមិស្ថានីយ៍ ។
ផ្លូវទាំងអស់សុទ្ធតែជាផ្លូវចាស់ដែលត្រូវចាក់បំពេញដីសឡើងវិញ ស្ទើរតែទាំងស្រុង ធ្វើប្រព័ន្ធលូបង្ហូរទឹក លូកាត់ថ្នល់៥កន្លែង និងស្លាកសញ្ញា១១កន្លែង ។ មុនការស្ថាបនាយើងបានផ្តល់ព័ត៌មានដល់ប្រជាពលរដ្ឋឱ្យដឹងមុន ហើយពួកគាត់រីករាយយ៉ាងខ្លាំង ព្រមទាំងបានចូលរួមយ៉ាងសកម្មក្នុងការបង្ខិតរបងផ្ទះ កាប់ដើមឈើ និងមែកឈើជាដើម ដើម្បីសម្រួលដល់រថយន្តដឹកដី និងគ្រឿងចក្រឈូសឆាយ ។ លោកបន្តទៀតថា ក្នុងទីប្រជុំជនក្រុងពោធិ៍សាត់ផ្លូវកៅស៊ូមានតែភូមិពាលញែក១ និងភូមិពាលែញក២ទេ ឯភូមិចំការចេកខាងជើង និងភូមិចំការចេកខាងត្បូង ហើយក្រៅពីនេះមានតែផ្លូវដីស និងក្រួសក្រហមប៉ុណ្ណោះ ។ ដូច្នេះហើយទើបក្រុមប្រឹក្សាសង្កាត់លើកគម្រោងស្នើសុំថវិកា មកស្ថាបនាផ្លូវនាពេលនេះ ។
មន្ត្រីរដ្ឋបាលសាលាខេត្តឱ្យដឹងថា ឃុំ-សង្កាត់ទាំង៤៩របស់ខេត្តពោធិ៍សាត់ បានទទួលថវិការបស់រាជរដ្ឋាភិបាលតាមរយៈមូលនិធិអភិវឌ្ឍឃុំ-សង្កាត់ សម្រាប់យកទៅស្ថាបនាេហដ្ឋារចនាសម័្ពន្ធនានាក្នុងមូលដ្ឋានរបស់ខ្លួនដែលបម្រើសេចក្តីត្រូវការចាំបាច់របស់ប្រជាពលរដ្ឋតាមគម្រោងដែលស្នើសុំជារៀងរាល់ឆ្នាំ ។
នៅសង្កាត់ផ្ទះព្រៃ មានទឹកប្រាក់ប្រមាណជាង២០០លានរៀល សម្រាប់ស្ថាបនាផ្លូវក្រួសក្រហម ជាង១០គីឡូមែ៉ត្រ ស្ថិតនៅក្រុងពោធិ៍សាត់ ហើយផ្លូវទាំងនោះ ត្រូវស្ថាបនាជាផ្លូវកៅស៊ូនៅពេលខាងមុខនេះ ។ លោកមានប្រសាសន៍ថា ការអភិវឌ្ឍយើងធ្វើជាជំហានៗ ថ្វីដ្បិតពេលនេះបានត្រឹមក្រួសក្រហម ប៉ុន្តែខេត្តបានធ្វើសំណើទៅសម្តេចតេជោនាយករដ្ឋមន្ត្រីសុំផ្លូវកៅស៊ូប្រវែង៣៨គីឡូមែ៉ត្រ សម្រាប់ខេត្តពោធិ៍សាត់ផងដែរ ៕
ចែករំលែកព័តមាននេះ