ខេត្តព្រះសីហនុ ៖ យុវជនវ័យក្មេងម្នាក់ត្រូវបានបាត់បង់ជីវិតនៅក្នុងមន្ទីពេទ្យ និង២នាក់ទៀតរងររបួសធ្ងន់ និងស្រាល ក្រោយពីពួកគេបានជិះម៉ូតូវ៉ាជែងរថយន្តហើយជ្រុលចង្កូតទៅបុករថយន្តមួយគ្រឿងទៀត ដែលបើកបរក្នុងទិសដៅបញ្ច្រាសទិសគ្នា នេះបើយោងតាមប្រភពសាក្សី ដែលបានឃើញហេតុការណ៍នៅនឹងកន្លែងកើតហេតុ ។ ហេតុការណ៍នេះបានកើតឡើងនៅវេលាម៉ោង១៥និង១០នាទីរសៀល ថ្ងៃទី១២ ខែមីនា ឆ្នាំ២០១៨ ត្រង់ចំណុចមុខក្រុមហ៊ុនលាយបេតុង ស្ថិតក្នុងភូមិ០១ សង្កាត់លេខ០១ ក្រុងព្រះសីហនុ ។
ទាក់ទិនទៅនឹងករណីគ្រោះថ្នាក់ចរាចរដ៏រន្ធត់នេះ លោកឧត្តមសេនីយ៍ត្រី អ៊ី សុខា ស្នងការរងទទួលផែនសណ្តាប់ធ្នាប់ នៃស្នងការដ្ឋាននគរបាលខេត្តព្រះសីហនុថ្លែងបញ្ជាក់ថា វាពិតជាគួរឲ្យសោកស្តាយបំផុតនៅពេលបានទទួលដំណឹងថា មានករណីគ្រោះថ្នាក់ចរាចរមួយកើតឡើងដែលបណ្ដាលយុវសិស្សម្នាក់បានបាត់បង់ជិវិត និង២នាក់ទៀតរងរបួសធ្ងន់ និងស្រាល ក្រោយពីពួកគេទាំង៣នាក់បើកបរម៉ូតូក្នុងល្បឿនលឿន ហើយពុំមានពាក់មួកសុវត្តិភាព ជ្រុលចង្កូតទៅបុករថយន្តមួយគ្រឿងផ្សេងទៀត ដែលបានបើកបរបញ្ច្រាសទិសគ្នា ។ ករណីគ្រោះថ្នាក់ចរាចរណ៍នេះ សមត្ថកិច្ចរបស់លោក នៅពុំអាចកំណត់ថា ភាគីណាជាអ្នកខុសភាគីណាជាអ្នកត្រូវនោះទេ តែបើយើងពិនិត្យទៅលើស្នាមគំនូសជាក់ស្តែងនៅកន្លែងកើតហេតុ បានបញ្ជាក់ថា ចំណុចកើតហេតុ (ចំណុចប៉ះ) ស្ថិតក្នុងគន្លងនៃរថយន្ត (ខាងស្តាំដៃ) ម៉ាកហ៊ីយ៉ាន់ដាយ២តោនកន្លះ ពណ៌ខៀវ គ្មានផ្លាកលេខ ដែលបានបើកបរចេញពីក្រុងព្រះសីហនុ ក្នុងទិសដៅពីលិចទៅកើតហេតុខណៈពេលម៉ូតូម៉ាកសង់ ពណ៌ខ្មៅ គ្មានផ្លាកលេខ របស់ក្រុមយុវសិស្សរងគ្រោះមានទិសដៅពីកើតទៅលិច ហើយបានរេចង្កូតមកក្នុងគន្លងនៃរថយន្ត បណ្ដាលឲ្យបុករថយន្តពេញទំហឹង ជាហេតុធ្វើឲ្យយុវសិស្សម្នាក់បោកក្បាលជាមួយនឹងរថយន្តធ្លាយខួចេញមកក្រៅ ហើយត្រូវបានរថយន្តដឹកមកកាន់មន្ទីពេទ្យបង្អែកចំការចេក ហើយបានស្លាប់ក្រោយមកដល់តែ១៥នាទី បើទោះបីជាក្រុមគ្រួពេទ្យខិតខំជួយសង្គ្រោះយ៉ាងណាក៏ដោយ ។
ជនរងគ្រោះទាំង៣នាក់មានឈ្មោះរួមមាន ទី១.ឈ្មោះ សាន វណ្ណារ៉ា ភេទប្រុស អាយុ១៤ឆ្នាំ រងរបួសធ្ងន់ ទី២.ឈ្មោះ ពោ នៅ ភេទប្រុស អាយុ១៧ឆ្នាំ រងរបួសស្រាល និងទី៣.ឈ្មោះ ផន សុភ័ត្រា ភេទប្រុស អាយុ១៧ឆ្នាំស្លាប់នៅក្នុងមន្ទីពេទ្យ អ្នកទាំង៣មានទីលំនៅភូមិ០១ សង្កាត់០១ ក្រុងព្រះសីហនុ ជាសិស្សថ្នាក់ទី៨នៃអនុវិទ្យាល័យហ៊ុនសែនឃ្លាំងលើ ។
ប្រភពដដែលបានបន្តថា ករណីគ្រោះថ្នាក់រហូតដល់បាត់បង់ជិវិតនេះ គឺបណ្ដាលមកពីក្រុមយុវសិស្សទាំង៣នាក់បើកបរពុំមានពាក់មួកសុវត្តិភាព ដូចនេះសូមបងប្អូនប្រជាពលរដ្ឋ ប្អូនៗ ក្មួយៗទាំងអស់នៅពេលបើកបរត្រូវគោរពច្បាប់ចរាចរ ពាក់មួកសុវត្តិភាពទាំងអស់គ្នា បើកបរក្នុងល្បឿនដែលបានកំណត់ មិនត្រូវបើកបរក្រោមឥទ្ធិពលនៃសារជាតិស្រវឹងនោះទេ ។
ដោយឡែក បើយោងតាមប្រភពសាក្សី ដែលបានឃើញហេតុការណ៍បានអះអាងថា វាពិតជារន្ធត់ខ្លាំងណាស់នៅពេលខណៈពេលបានឃើញយុវជនវ័យក្មេងចំនួន៣នាក់ ដេករណូករណែលនៅលើផ្លូវ ក្រោយពីពួកគេបានជិះម៉ូតូយ៉ាងលឿនក្នុងទិសដៅពីកើតទៅលិច ហើយនៅពេលមកដល់ចំណុចកើតហេតុ បានវ៉ារថយន្តមួយគ្រឿងដែលបើកស្របទិសគ្នា ខណៈពេលនោះ ក៏មានរថយន្តដឹកដី២តោនកន្លះ បើកមកពីទិសខាងលិច (ទិសដៅបញ្ច្រាសគ្នា) ជាហេតុធ្វើឲ្យក្រុមយុវសិស្សរងគ្រោះ ជ្រុលចង្កូតទៅបុកចង្កៀងរថយន្តផ្នែកខាងស្តាំ បោកក្បាលផ្ទប់ទៅនឹងក្បាលរថយន្ត បណ្ដាលឲ្យយុវសិស្សម្នាក់បែកក្បាលធ្លាយខួរមកក្រៅរងរបួសធ្ងន់ធ្ងរ ។
ក្រោយកើតហេតុ សាកសពត្រូវបានក្រុមគ្រូពេទ្យប្រគល់ជូនឪពុកម្តាយយុវសិស្សរងគ្រោះយកទៅធ្វើបុណ្យតាមប្រពៃណី ឬឯរថយន្ត និងម៉ូតូ ត្រូវបានសមត្ថកិច្ចនគរបាលចរាចរណ៍ផ្លូវគោកយកទៅរក្សាទុកនៅការិយាល័យចរាចរណ៍ផ្លូវគោករងចាំការដោះស្រាយតាមផ្លូវច្បាប់ ៕
ចែករំលែកព័តមាននេះ