ខេត្តកំពង់ឆ្នាំង ៖ ហេតុការណ៍គ្រោះថ្នាក់ចរាចរមួយបានកើតឡើងបង្កការភ្ញាក់ផ្អើលនៅវេលាម៉ោង០៩និង៣៥នាទីយប់ ថ្ងៃទី១២ ខែមីនា ឆ្នាំ២០១៨ នេះ ដោយសារតែរថយន្តបាឡែន ពណ៌ស ពាក់ផ្លាកលេខ…
ខេត្តកំពង់ឆ្នាំង ៖ ហេតុការណ៍គ្រោះថ្នាក់ចរាចរមួយបានកើតឡើងបង្កការភ្ញាក់ផ្អើលនៅវេលាម៉ោង០៩និង៣៥នាទីយប់ ថ្ងៃទី១២ ខែមីនា ឆ្នាំ២០១៨ នេះ ដោយសារតែរថយន្តបាឡែន ពណ៌ស ពាក់ផ្លាកលេខ ភ្នំពេញ ២G-៩៩១៩ ដឹកឈើប្រណិត បុករថយន្តព្រូស ពណ៌ស ពាក់ផ្លាកលេខ ភ្នំពេញ ២V-៤៨៤០ ផ្ទប់នឹងដើមឈើមួយដើមធំ ។ ហេតុការណ៍ខាងលើនេះបានកើតឡើងនៅចំណុចផ្លូវបំបែកជាបួន មុខមន្ទីរសាធារណៈការ និងដឹកជញ្ជូនខេត្តកំពង់ឆ្នាំង ស្ថិតក្នុងភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេឃើញរថយន្តបាឡែនមួយគ្រឿងពណ៌ស ធ្វើដំណើរពីទិសខាងជើងទៅត្បូង ចំណែកឯរថយន្តព្រូសធ្វើដំណើរពីខាងលិចទៅខាងកើត ក្នុងទិសដៅខ្វែងគ្នា ខណៈដល់ចំណុចកើតហេតុ រថយន្តបាឡែនបានបុករថយន្តព្រូសចំពាក់កណ្ដាលខ្លួនរុញផ្ទប់ទៅនឹងដើមឈើមួយដើមធំដែលដុះនៅជាប់នឹងរបងសាលាខេត្ត មុខមន្ទីរសាធារណៈការខេត្តកំពង់ឆ្នាំង ទៅមុខលែងរួច តែសំណាងល្អមិនបណ្ដាលឲ្យបាត់បង់អាយុជីវិតមនុស្សឡើយ ។
ប្រភពពីសមត្ថកិច្ចនៅកន្លែងកើតហេតុបានឲ្យដឹងថា ក្រោយកើតហេតុការណ៍គ្រោះថ្នាក់ចរាចរខាងលើនេះ អ្នកបើកបររថយន្តបាឡែនដឹកឈើខាងលើ ត្រូវបានសមត្ថកិច្ចឃាត់ចាប់ខ្លួនបានបញ្ជូនទៅឃុំខ្លួនបណ្ដោះអាសន្ននៅស្នងការដ្ឋាននគរបាលខេត្តកំពង់ឆ្នាំង ។ ក្រោយកើតហេតុ រថយន្តទាំងពីរគ្រឿងត្រូវបានសមត្ថកិច្ចស្ទូចយកទៅរក្សាទុក ដើម្បីត្រួតពិនិត្យ និងចាត់ការតាមផ្លូវច្បាប់ ៕
ចែករំលែកព័តមាននេះ