ខេត្តបន្ទាយមានជ័យ ៖ ប្រជាពលរដ្ឋមួយក្រុមមានគ្នា៤៥នាក់ មកពី៧ស្រុក-ក្រុងនៃខេត្តបន្ទាយមានជ័យ តំណាងប្រជាពលរដ្ឋ៥២០នាក់ ដោយពួកគាត់អះអាងថា ជាអតីតយោធិនពិការ បាននាំប្រមូលផ្តុំ នៅខាងមុខសាលាខេត្តបន្ទាយមានជ័យ នៅថ្ងៃទី១១រោច ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១២ ខែមីនា ឆ្នាំ២០១៨នេះ ដើម្បីឱ្យលោកអភិបាលខេត្តអន្តរាគមន៍ដល់រាជរដ្ឋាភិបាលកម្ពុជា ជួយដោះស្រាយគោលរបបសន្តិសុខសង្គមយោធិនពិការប្រចាំខែ ជូនដល់ពួកគាត់ ដើម្បីយកមកផ្គត់ផ្គង់ ជីវភាព គ្រាដែលពួកគាត់អះអាងថា បានធ្វើជាយោធិនធ្លាក់ខ្លួនពិការ ហើយបាត់ឈ្មោះ។ ការមូលផ្តុំរបស់ ប្រជាពលរដ្ឋខាងលើគាត់បានអះអាងថា៖ ពួកគាត់ ជាយោធិនពិការនោះ។ បើតាមប្រភពព័ត៌មានពីមន្ត្រី សាលាខេត្តប្រាប់ឱ្យដឹងថា៖ ក្រុមប្រជាពលរដ្ឋទាំងនោះសរុប៥២០នាក់ ធ្លាប់មកសុំអន្តរាគមន៍លោក អភិបាលខេត្តម្តងរួចមកហើយកាលពីអំឡុងដើមឆ្នាំ២០១៧។
នៅពេលនោះអភិបាលខេត្តក៏បាន ធ្វើលិខិតមួយ ជម្រាបជូនទៅដល់លោកឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ សម្តេចពិជ័យសេនា ទៀ បាញ់ ដើម្បីពិនិត្យដោះស្រាយគោលរបបជូនដល់ពួកគាត់។ ប្រភពព័ត៌មានមន្ត្រីសាលាខេត្តដដែលឱ្យដឹងទៀតថា ក្រោយមកគណៈកម្មការបច្ចេកទេសក្រសួង ការពារជាតិ បានចុះមកស្រាវជ្រាវស៊ើបអង្កេតដល់មូលដ្ឋានប្រជាពលរដ្ឋខាងលើរស់នៅបច្ចុប្បន្ន ហើយបន្ទាប់មកគណៈកម្មការក្រសួងការពារជាតិក៏បានស្រាវជ្រាវរកឃើញថា ប្រជាពលរដ្ឋ ដែលអះអាងជាយោធិនពិការនោះមិនមានលក្ខណៈ និងអត្តសញ្ញាណគ្រប់គ្រាន់ជាយោធិនពិការ នោះឡើយ។ ក្រសួងការពារជាតិក៏បានចេញលិខិតលេខ២៤១សជណ ជម្រាបមកលោកអភិបាល ខេត្តវិញថា យោងតាមអនុក្រិត្យលេខ០៨ ចុះថ្ងៃទី២៦ ខែមករា ឆ្នាំ២០០៧ ស្តីពីរបបឧបត្ថម្ភចំពោះ យោធិនពលី មរណៈ បង្កស្លាប់ បាត់ខ្លួន និងពិការ គឺមុខសញ្ញាប្រជាពលរដ្ឋ ខាងលើ មិនអាចទទួល ស្គាល់ជាយោធិនពិការបានឡើយ។
លិខិតដដែលបានបញ្ជាក់ទៀតថា៖ បច្ចុប្បន្ននេះពុំទាន់មាន សេចក្តីណែនាំ ឬបទបញ្ជាពីរាជរដ្ឋាភិ បាលកម្ពុជាឱ្យប្រមូលមុខសញ្ញាខាងលើមកបញ្ចូលក្នុងក្របខណ្ឌ នៃកងយោធពលខេមរភូមិន្ទ ទទួលស្គាល់ជាយោធិនពិការដើម្បីផ្តល់គោលរបបឧបត្ថម្ភនោះឡើយ។ ក្នុងការប្រមូលផ្តុំពីប្រជាពលរដ្ឋអះអាងថា៖ ជាយោធិនពិការខាងលើនៅខាងមុខសាលាខេត្ត បន្ទាយមានជ័យនោះផងដែរ អាជ្ញាធរខេត្តក៏បានអនុញ្ញាតឱ្យតំណាងពួកគាត់ចូលជួប ដោយប្រាប់ដល់តំណាងប្រជាពលរដ្ឋនោះថា អាជ្ញាធរខេត្ត បានខិតខំជួយដោះស្រាយ ជូនដល់ពួកគាត់នោះហើយ ប៉ុន្តែបញ្ហាដែលបងប្អូនស្នើសុំនោះ គឺខាងក្រសួងការពារជាតិធ្វើការ បដិសេធ។ ដូច្នេះសុំបងប្អូនប្រជាពលរដ្ឋទាំងអស់វិត្រលប់ទៅលំដ្ឋានវិញចុះ។ ការតវ៉ានេះ មិនមានប្រើអំពើហិង្សាណាមួយទេ ក្រោយពីទទួលបានការណែនាំពីអាជ្ញាធរខេត្តហើយ ពួកគាត់ក៏បាននាំគ្នាត្រលប់ទៅលំនៅដ្ឋានរៀងៗខ្លួន៕
ចែករំលែកព័តមាននេះ