រាជធានីភ្នំពេញ ៖ ក្នុងរយៈពេលជាង១ខែកន្លងមកនេះ រដ្ឋបាលរាជធានីភ្នំពេញ បានចុះត្រួតពិនិត្យ និងចាប់រថយន្តតទ្រុងខុសលក្ខណៈបច្ចេកទេស ដោយអនុត្តតាមបទបញ្ជា របស់រាជរដ្ឋាភិបាល រហូតមកដល់ពេលនេះបានជាង ៦.០០០គ្រឿង។ លោក ម៉េត មាសភក្តី អ្នកនាំពាក្យសាលា រាជធានីភ្នំពេញ បានឲ្យដឹងថា អនុត្តតាមបទបញ្ជាដ៏ខ្ពង់ខ្ពស់របស់សម្តេចតេជោ ហ៊ុន សែន លើចំណាត់វិធានការរថយន្តតទ្រុងខុសលក្ខណៈបច្ចេកទេស គណៈបញ្ជាការឯកភាពរាជធានីភ្នំពេញ បានបញ្ជាដល់កងកម្លាំងមានសមត្ថកិច្ច ស្នងការនគរបាល និងបញ្ជាការរាជអាវុធរាជធានី ភ្នំពេញ រដ្ឋបាលខណ្ឌទាំង១២ និងមន្ទីរសាធារណការ និងដឹកជញ្ជូនរាជធានី ភ្នំពេញ សហការគ្នាចុះត្រួតពិនិត្យ ចាប់ រថយន្តតទ្រុងខុសលក្ខណៈបច្ចេកទេស នៅតាមទីតាំងគោលដៅជាច្រើន កន្លែងនៅក្នុងរាជធានី ភ្នំពេញ។
ជាលទ្ធផលប្រតិបត្តិការ គិតមកដល់ថ្ងៃ០៨ មីនា ២០១៨ ត្រួតពិនិត្យរថយន្តធុនធ្ងន់ សរុបចំ នួន៦.០២២គ្រឿង ក្នុងនោះមានរថយន្តតទ្រុងខុស លក្ខណៈបច្ចេកទេស ចំនួន១៩៥ គ្រឿង។ លោកបញ្ជាក់ថា ក្នុងចំណោមរថយន្តឃាត់ទុកត្រួតពិនិត្យទាំង៦.០២២គ្រឿងនោះ មានរថយន្តល្មើស ច្បាប់ចរាចរណ៍ រថយន្តគ្មានឯកសារត្រឹមត្រូវតាមច្បាប់មួយចំនួនផងដែរ។ ប៉ុន្តែទោះយ៉ាងណាក្តី រថយន្ត ទាំងនោះ មិនបានឃាត់ទុកទេ គឺអាជ្ញាធរបានណែនាំឲ្យពួកគាត់ទៅបំពេញ បែបបទឲ្យស្របច្បាប់ បានត្រឹមត្រូវ ធ្វើអាជីវកម្មបន្តទៀត។ ដោយឡែក សម្រាប់រថយន្តដែលតទ្រុង ខុសលក្ខណៈបច្ចេកទេស ចំនួន១៩៥គ្រឿង បានឃាត់ទុក និងបានកាត់ទ្រុងតដែលលើសចោលតែម្តង។
គួររំលឹកថា ឆ្នាំ២០១៧ កន្លងមក រាជរដ្ឋាភិបាលបានត្រួតពិនិត្យរថយន្តធ្វើចរាចរណ៍ ចំនួន ៩២៣.៦៥៧គ្រឿង ក្នុងនោះ រថយន្ត ២.៩៥៣គ្រឿង ដឹកលើសទម្ងន់ចាប់ពី៤តោន រហូតដល់៤៣តោន និងបានផាកពិន័យជាទឹកប្រាក់ចំនួន ៥.៧៧៨.៨២០.០០០រៀល។ ក្នុងនោះសម្តេចតេជោ ហ៊ុន សែន បានដាក់ឱសានវាទឲ្យអាជ្ញាធរ គ្រប់លំដាប់ថ្នាក់ ចាប់ពីម៉ោង០០យប់ថ្ងៃទី៩កុម្ភៈ តទៅ គឺគ្មានវត្តមានឡានតទ្រុង លើដងផ្លូវទៀតឡើយ។ បើមាននៅតំបន់ណា ភូមិសាស្ត្រណា ចៅហ្វាយខេត្ត និងក្រុងនោះជាអ្នកទទួលខុសត្រូវ។ បើនរណាមកតវ៉ា ឬមានអ្នកកាង ទោះជាឋានៈណាក៏ដោយ ក៏ធ្លាក់បុណ្យស័ក្តិទាំងអស់ និងបញ្ចូល ព្រៃសតែម្តង៕
ចែករំលែកព័តមាននេះ