គោរពវិញ្ញាណក្ខន្ធសពឧត្តមសេនីយ៍ឯក គង់ ផា មេបញ្ជាការរងយោធភូមិភាគទី៤
- សៀមរាប
ខេត្តសៀមរាប ៖ នៅព្រឹកថ្ងៃទី១២ ខែមីនា ឆ្នាំ២០១៨ នេះ លោកឧត្តមសេនីយ៍ឯក សៅ សារឿន អគ្គនាយករង…
ខេត្តសៀមរាប ៖ នៅព្រឹកថ្ងៃទី១២ ខែមីនា ឆ្នាំ២០១៨ នេះ លោកឧត្តមសេនីយ៍ឯក សៅ សារឿន អគ្គនាយករង…
ខេត្តសៀមរាប ៖ នៅព្រឹកថ្ងៃទី១២ ខែមីនា ឆ្នាំ២០១៨ នេះ លោកឧត្តមសេនីយ៍ឯក សៅ សារឿន អគ្គនាយករង អគ្គនាយកដ្ឋានយុទ្ធសេវា និងជានាយក នាយកដ្ឋានកិច្ចការយោធា និងស៊ីវិល តំណាងឲ្យក្រសួងការពារជាតិ បានដឹកនាំប្រតិភូក្រសួងការពារជាតិ ចូលរួមគោរពវិញ្ញាណក្ខន្ធ និងជួយចែករំលែកទុក្ខដល់ក្រុមគ្រួសារ នៃសពលោកឧត្តមសេនីយ៍ឯក គង់ ផា មេបញ្ជាការរងយោធភូមិភាគទី៤ ដែលបានទទួលមរណៈភាព កាលពីវេលាម៉ោង១១ព្រឹក ថ្ងៃទី០៨ ខែមីនា ឆ្នាំ២០១៨ ក្នុងជន្មាយុ៦២ឆ្នាំ ដោយរោគាពាធ ហើយសពត្រូវបានតម្កល់ទុកធ្វើទក្ខិណាទានទៅតាមគន្លងប្រពៃណីព្រះពុទ្ធសាសនា នៅគេហដ្ឋាននៃសព ភូមិស្វាយដង្គំ សង្កាត់ស្វាយដង្គំ ក្រុងសៀមរាប ខេត្តសៀមរាប ។
នៅក្នុងឱកាសដ៏ក្រៀមក្រំនោះ លោកឧត្តមសេនីយ៍ឯក សៅ សារឿន អគ្គនាយករង អគ្គនាយកដ្ឋានយុទ្ធសេវា និង ជានាយក នាយកដ្ឋានកិច្ចការយោធា និងស៊ីវិល ក្នុងនាមតំណាងឲ្យក្រសួងការពារជាតិ បានធ្វើការបំពាក់ឋានន្តរស័ក្តិជាកិច្ចបច្ឆាមរណៈថ្នាក់ឧត្តមសេនីយ៍ទោ ជូនដល់សពលោកឧត្តមសេនីយ៍ឯក គង់ ផា និងបានធ្វើការស្មឹងស្មាតគោរពវិញ្ញាណក្ខន្ត និងបូជាទៀនធូបដើម្បីឧទ្ទិសជូនដល់វិញ្ញាណក្ខន្តរបស់សពលោក ឧត្តមសេនីយ៍ឯក គង់ ផា ព្រមទាំងបានធ្វើការចូលរួមសម្តែង និងចូលរួមរំលែកទុក្ខក្រៀមក្រំក្នុងចិត្ត ដោយឥតឧបមា ក្នុងការបាត់បង់ស្វាមី បីតា ជីតា ដ៏ឧត្តុង្គឧត្តមនៃគ្រួសារដែលប្រកបដោយព្រហ្មវិហារធម៌ និងជាទីស្រឡាញ់របស់គ្រួសារនៃសព ក៏ដូចជាការបាត់បង់វីរជនដ៏ឆ្នើម ក្នុងការបញ្ជាដឹកនាំការពារជាតិមាតុភូមិ ដែលមានស្នាដៃក្នុងការបម្រើជាតិមាតុភូមិកម្ពុជា និងបានរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ក្នុងទិសដៅបម្រើឧត្តមប្រយោជន៍ជូនជាតិមាតុភូមិ ព្រមទាំងបានលះបង់កម្លាំងកាយចិត្ត ពេលវេលានៅគ្រប់កាលៈទេសៈក្នុងការអភិវឌ្ឍន៍ប្រទេសជាតិមាតុភូមិ ក្នុងមួយជីវិតរបស់លោក ។
លោកក៏បានបញ្ជាក់ថា ទោះបីនៅពេលនេះរូបកាយវិញ្ញាណរបស់លោកឧត្តមសេនីយ៍ឯក គង់ ផា បានរលត់ចាកឆ្ងាយពីលោកនេះទៅកាន់ទីភពថ្មីដ៏សែនឆ្ងាយ ដែលគ្មានថៃ្ងវិលត្រលប់មកវិញជារៀងរហូត ។ ក៏ប៉ុន្តែចំពោះកិត្តិស័ព្ទកេរ្តិ៍ឈ្មោះរបស់លោក ក៏បានដកជាប់នូវក្នុងក្រអៅបេះដូងរបស់កូនចៅ ថ្នាក់ដឹកនាំ និងយុទ្ធមិត្តរួមអាវុធ ញាតិមិត្តរួមការងារ ដែលធ្វើឲ្យគ្មានថ្ងៃបំភ្លេចបានឡើយ ។ លោកឧត្តមសេនីយ៍ឯក សៅ សារឿន ក៏បានធ្វើការបួងសួងសូមឲ្យដួងវិញ្ញាណក្ខន្ធរបស់លោកឧត្តមសេនីយ៍ឯក គង់ ផា បានទៅកាន់សុខគតិភពថ្មី កុំបីឃ្លាងឃ្លាតឡើយ ។
បន្ទាប់ពីក្រុមប្រតិភូមេបញ្ជាការ បញ្ជាការរងយោធភូមិភាគទី៤ ធ្វើការគោរពគារវកិច្ច នៃសពរួចមក ក្នុងពិធីគោរពវិញ្ញាណក្ខន្ធនោះដែរ ក៏មានក្រុមប្រតិភូខេត្តដឹកនាំដោយលោក ពិន ប្រាកដ អភិបាលរង នៃគណៈអភិបាលខេត្តសៀមរាប និងលោក អ៊ឹង ហឿន សមាជិកក្រុមប្រឹក្សាខេត្ត រួមទាំងលោក លោកជំទាវជាសមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ មន្ត្រីរាជការជុំវិញខេត្ត ព្រមទាំងអស់លោកជាមេបញ្ជាការតំបន់ប្រតិបត្តិការសឹករង និងកងពលចំណុះឲ្យយោធភូមិភាគទី៤ បានគោរពវិញ្ញាណក្ខន្ធ រំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសពលោកឧត្តមសេនីយ៍ឯក គង់ ផា មេបញ្ជាការរងយោធភូមិភាគទី៤ ជាកិច្ចចុងក្រោយ ទៅតាមផែននៃអង្គភាពនីមួយៗផងដែរ ៕
ចែករំលែកព័តមាននេះ