រាជធានីភ្នំពេញ ៖ នៅឆ្នាំ២០១៨នេះ សមិទ្ធផលសំខាន់ៗរបស់រាជរដ្ឋាភិបាលជាច្រើន នឹងបញ្ចប់ដំណើរការសាងសង់ ហើយគ្រោងដាក់ឲ្យដំណើរការ ក្នុងនោះគម្រោងចំនួន២ ត្រូវបានកំណត់ថ្ងៃដាក់ឱ្យដំណើរការជាផ្លូវការជាក់លាក់ហើយ ។
បើតាមមន្ត្រីជាន់ខ្ពស់ក្រសួងសាធារណការ និងដឹកជញ្ជូន បានបញ្ជាក់ថា គម្រោងផ្លូវដែក ប៉ោយប៉ែត-ស៊ីសុផុន ដែលចម្ងាយ៤៨គីឡូម៉ែត្រ និងគម្រោងសេវាដឹកអ្នកដំណើរតាមផ្លូវទឹក ព្រែកព្នៅ-ក្រុងតាខ្មៅ នឹងចាប់ផ្តើមដំណើរការនៅដើមខែមេសា ខាងមុខនេះ ។ ការដាក់ឲ្យដំណើរការសេវាដឹកជញ្ជូនសំខាន់ៗទាំងពីរនេះ ត្រូវបានអ្នកស្រាវជ្រាវសេដ្ឋកិច្ចមើលឃើញថា បានចូលរួមជួយដល់សេដ្ឋកិច្ចយ៉ាងច្រើន ពិសេសគឺសម្រួលការកកស្ទះចរាចរណ៍ និងធ្វើឲ្យបរិយាកាសវិនិយោគនៅកម្ពុជាកាន់តែប្រសើរឡើងថែមទៀត ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍កាលពីថ្ងៃទី១០ មីនា ថា គម្រោងជួសជុល ឬស្តារឡើងវិញនូវកំណាត់ផ្លូវដែកពីប៉ោយប៉ែតមកស៊ីសុផុន ដែលមានចម្ងាយ៤៨គីឡូម៉ែត្រ នឹងដាក់ឱ្យដំណើរការជាផ្លូវការនៅថ្ងៃទី៤ ខែមេសា ហើយគម្រោងដឹកជញ្ជូនអ្នកដំណើរតាមផ្លូវទឹកពីព្រែកព្នៅទៅក្រុងតាខ្មៅ នឹងចាប់ផ្តើមថ្ងៃទី៦ មេសា គឺនៅមុនបុណ្យចូលឆ្នាំថ្មីប្រពៃណីជាតិខាងមុខ ។
លោកទេសរដ្ឋមន្ត្រីលើកឡើងថា ៖« ផ្លូវដែកដែលដាច់ដោយសង្គ្រាមនៅឆ្នាំ១៩៧៣ ពីប៉ោយប៉ែតមកស៊ីសុផុន ប្រវែង៤៨គីឡូម៉ែត្រ នេះ យើងបានស្ថាបនាឡើងវិញចប់សព្វគ្រប់ហើយ ។ អីចឹង នៅថ្ងៃទី៤ ខែមេសា យើងនឹងបើកឱ្យដំណើរការឡើងវិញសម្រាប់ដឹកអ្នកដំណើរ ហើយយើងអាចបន្តមកបាត់ដំបង និងមកដល់ភ្នំពេញ អាចបញ្ចប់នៅពេលខាងមុខឆាប់ៗនេះ » ។
លោកបានប្រកាសជាឱឡារិកថា ៖« ខ្ញុំសូមជម្រាបថា យើងបានពិភាក្សាជាមួយក្រុមហ៊ុន ថូល ដឹកអ្នកដំណើរតាមរថភ្លើងទាំងនៅភ្នំពេញ និងប៉ោយប៉ែត គឺឱ្យប្រជាពលរដ្ឋជិះដោយឥតយកលុយ រហូតដល់ថ្ងៃទី១ ខែសីហា » ។
ចំណែកគម្រោងដឹកអ្នកដំណើរតាមផ្លូវទឹក ពីព្រែកព្នៅ ទៅក្រុងតាខ្មៅ លោកទេសរដ្ឋមន្ត្រី គូសបញ្ជាក់ថា ៖« យើងនឹងបើកឱ្យដំណើរការនៅថ្ងៃទី៦ មេសា ខាងមុខនេះ នឹងមានទូកដឹកអ្នកដំណើរជំហានដំបូងចំនួន៣គ្រឿង ដែលទូកនីមួយៗអាចផ្ទុកអ្នកដំណើរបានលើសពី៥០នាក់ » ។
លោកបន្តថា ទូក៣គ្រឿងនេះ នឹងធ្វើចរាចរណ៍ផ្តល់សេវាចេញដំណើរពីព្រែកព្នៅទៅក្រុងតាខ្មៅ ចម្ងាយសរុបប្រមាណ២៥គីឡូម៉ែត្រ ចំណាយពេលវេលាជាមធ្យម៣៤នាទី ដោយមានចំណតផែចំនួន៥ រួមមាន ចំណតផែព្រែកព្នៅ, ទីលានប្រជាធិបតេយ្យថ្មី, ផ្សាររាត្រី, កោះពេជ្រ និងក្រុងតាខ្មៅ ហើយលោកសង្ឃឹមថា ការដឹកជញ្ជូនអ្នកដំណើរតាមផ្លូវទឹកនេះ នឹងចូលរួមចំណែកយ៉ាងសំខាន់ក្នុងការដោះស្រាយការកកស្ទះ និងគ្រោះថ្នាក់ចរាចរណ៍ ព្រមទាំងធ្វើឲ្យចំណេញពេលវេលា និងចូលរួមកាត់បន្ថយកភាពក្រីក្រជូនប្រជាពលរដ្ឋផងដែរ ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណិ្ឌត្យសភាកម្ពុជា មានប្រសាសន៍ឱ្យដឹងកាលពីថ្ងៃទី១១ មីនា ម្សិលមិញថា ការដាក់ឱ្យដំណើរការគម្រោងពង្រីកផ្លូវនេះ ជាយុទ្ធសាស្ត្រដ៏ល្អរបស់រាជរដ្ឋាភិបាល ពិសេសសម្រួលចរាចរណ៍ ។ ការពង្រីកចរាចរណ៍ នៅតាមផ្លូវដែកប៉ោយប៉ែត ជាច្រកយុទ្ធសាស្ត្រយ៉ាងសំខាន់ ព្រោះកសិផល និងទំនិញឆ្លងកាត់ច្រកប៉ោយប៉ែតច្រើន ។ ដោយឡែក ការសម្រួលចរាចរណ៍ពីព្រែកព្នៅទៅក្រុងតាខ្មៅតាមផ្លូវទឹកនេះ វាជារឿងល្អមួយ និងថ្មី ដែលយើងមិនដែលបានប្រើ និងចាប់អារម្មណ៍ប្រើ ។
លោកបណ្ឌិតបន្តថា ៖« ការធ្វើដំណើរតាមផ្លូវទឹកនេះ នឹងជួយកាត់បន្ថយការកកស្ទះចរាចរណ៍ និងចំណេញពេលវេលាបានច្រើន។ ដូចនេះ បើសិនមានចរាចរណ៍ផ្លូវទឹកពីស្ពានលីយ៉ុងផាត់ ហើយយើងឆ្លងតាមស្ពានលីយ៉ុងផាត់ទៅផ្លូវជាតិលេខ៦ ឬផ្លូវផ្សេងទៀតនោះ គឺជួយសម្រួលចរាចរណ៍មែនទែន ។ អីចឹង គេអាចបែងចែកប្រព័ន្ធគ្រប់គ្រងនៅម្តុំព្រែកព្នៅ ដែលវាជារឿងល្អមួយបំផុតសម្រាប់ផ្លូវដែក ផ្លូវគោក និងផ្លូវទឹកផង គឺអាចបែងចែកចរាចរណ៍ទៅផ្លូវជាតិលេខ៤, ៥ និងលេខ៦ » ។
លោកបណ្ឌិតបន្តថា ៖« ខ្ញុំគិតថា គម្រោងដឹកជញ្ជូនតាមផ្លូវទឹកនេះ នឹងទទួលបានជោគជ័យ ទី១-នៅក្រុងតាខ្មៅ មានពង្រីកផ្លូវធ្វើចរាចរណ៍ ។ ទី២-មានគម្រោងធ្វើព្រលានយន្តហោះថ្មីមួយទៀតនៅខេត្តកណ្តាល និងទី៣-មានច្រកបែងចែកពីផ្លូវតាខ្មៅ ទៅផ្លូវជាតិលេខ១ លេខ២ រួមនឹងមានផ្លូវលេខ៦០ម៉ែត្រចូលមកទីក្រុងភ្នំពេញទៀត គឺជាការបង្កើតច្រកសេដ្ឋកិច្ចយ៉ាងច្រើន និងជួយសម្រួលចរាចរណ៍ និងកាត់បន្ថយហានិភ័យផ្សេងៗ » ។
លោកបណ្ឌិតថា ៖« គម្រោងដែលរាជរដ្ឋាភិបាលគ្រោងដាក់ឱ្យដំណើរការខាងមុខនេះ វាជាចរន្តមួយធ្វើឱ្យអ្នកវិនិយោគមិនមានការរារែកក្នុងការវិនិយោគទៀត ព្រោះអ្នកវិនិយោគមួយចំនួនត្រូវការវិនិយោគនៅតំបន់ឆ្ងាយ តែការដឹកជញ្ជូនមានការពិបាក ។ អីចឹង នៅពេលរាជរដ្ឋាភិបាលធ្វើផ្លូវជួយសម្រួលចរាចរណ៍នេះបាននោះ នឹងធ្វើឲ្យការវិនិយោគទៅក្រៅក្រុងនឹងកើតមានឡើង ព្រោះការវិនិយោគក្នុងក្រុង ថ្លៃជួលទីតាំងខ្ពស់ ។ ដូចនេះ វាបានសម្រួលបរិយាកាសវិនិយោគ សម្រួលឱ្យមានការងារធ្វើនៅតំបន់ជនបទ និងជួយកាត់បន្ថយគម្លាតរវាងជនបទ និងទីប្រជុំជន ។ អីចឹង របាយប្រជាជនស្មើគ្នា កំណើនសេដ្ឋកិច្ចនៅតាមជនបទនឹងងើបឡើងជាបណ្តើរៗបាន ៕
ចែករំលែកព័តមាននេះ