ខេត្តព្រះសីហនុ ៖ ដើម្បីធានាប្រសិទ្ធភាព និងគុណភាពនៃការផ្ដល់សេវាសាធារណៈជូនអាជីវករ ពាណិជ្ជករខ្មែរ និងបរទេស ក្រសួងពាណិជ្ជកម្មបានបើកកិច្ចប្រជុំផ្សព្វផ្សាយស្ដីអំពីកាតព្វកិច្ច និងការអនុវត្ដលិខិតបទដ្ឋានច្បាប់ ទាក់ទងនឹងការប្រកបអាជីវកម្ម និងពាណិជ្ជកម្ម…
ខេត្តព្រះសីហនុ ៖ ដើម្បីធានាប្រសិទ្ធភាព និងគុណភាពនៃការផ្ដល់សេវាសាធារណៈជូនអាជីវករ ពាណិជ្ជករខ្មែរ និងបរទេស ក្រសួងពាណិជ្ជកម្មបានបើកកិច្ចប្រជុំផ្សព្វផ្សាយស្ដីអំពីកាតព្វកិច្ច និងការអនុវត្ដលិខិតបទដ្ឋានច្បាប់ ទាក់ទងនឹងការប្រកបអាជីវកម្ម និងពាណិជ្ជកម្ម នៅព្រះរាជាណាចក្រកម្ពុជា ដែលមានការចូលរួមពីអន្តរក្រសួង និងមន្ទីរស្ថាប័ននានាជុំវិញខេត្តព្រះសីហនុ ។
ថ្លែងក្នុងកិច្ចប្រជុំនៅឯសាលាខេត្ត នាថ្ងៃទី៦ មីនា កន្លងមក លោក សុខ សុភ័ក្ដ្រ អនុរដ្ឋលេខាធិការក្រសួងពាណិជ្ជកម្ម បានលើកឡើងពីគោលបំណងនៃកិច្ចប្រជុំផ្សព្វផ្សាយនេះ ដើម្បីផ្សព្វផ្សាយលិខិតបទដ្ឋានច្បាប់ និងការអនុវត្ដច្បាប់ជាធរមានលើករណីជនបរទេស និងអាជីវកម្មខ្មែរដែលកំពុងស្នាក់នៅ និងប្រកបអាជីវកម្មក្នុងខេត្ដព្រះសីហនុ ក្នុងគោលដៅចម្បងរក្សាបាននូវសណ្ដាប់ធ្នាប់ របៀបរៀបរយ សន្ដិសុខ និងនីត្យានុកូលដ្ឋាននៃការប្រកបអាជីវកម្ម ។
លោករដ្ឋលេខាធិការថ្លែងថា ៖« កិច្ចប្រជុំនេះ ក្នុងគោលបំណងពង្រឹងកាតព្វកិច្ចដោះស្រាយបញ្ហាប្រឈម និងត្រួតពិនិត្យពីភាពចន្លោះប្រហោងនៃការអនុវត្ដច្បាប់ដោយប្រការណាមួយរបស់មន្ត្រីមូលដ្ឋានមានសមត្ថកិច្ច ដើម្បីធានាប្រសិទ្ធភាព និងគុណភាពនៃការផ្ដល់សេវាសាធារណៈជូនអាជីវករខ្មែរ និងបរទេស » ។
លោក យន្ត មីន អភិបាលខេត្តព្រះសីហនុ បានមានប្រសាសន៍ផងដែរថា ការវិនិយោគផ្ទាល់ពីបរទេសនៅខេត្តព្រះសីហនុ មានកំណើនយ៉ាងគំហុកចាប់ពីឆ្នាំ២០១៧ និងដើមឆ្នាំ២០១៨នេះ លើវិស័យសំខាន់ៗជាច្រើន ។ ក្នុងនោះ ខេត្តក៏មានចំណុចខ្លាំង និងចំណុចខ្សោយរបស់រដ្ឋបាលខេត្ដដែរ ។
លោកអភិបាលខេត្តថ្លែងថា ៖« ចំណុចខ្លាំង គឺខេត្ដមានសក្តានុពលធនធានធម្មជាតិដ៏សម្បូរបែប ។ ការគ្រប់គ្រងសន្ដិសុខសុវត្ថិភាពបានល្អ ការអភិវឌ្ឍហេដ្ឋារចនាសម្ព័ន្ធនានាក្នុងខេត្ដបានច្រើន និងការវិនិយោគទុនពីជនជាតិបរទេសមានការកើនឡើងខ្ពស់ ។ យ៉ាងនេះក្ដី ខេត្តក៏មានចំណុចខ្វះចន្លោះមួយចំនួនដែរដែលត្រូវពង្រឹងបន្ថែម » ។
យោងតាមប្រកាសលេខ ០៨០ ព.ណ ច.ប.ព ស្ដីពីការគ្រប់គ្រង និងការចេញលិខិតអនុញ្ញាតប្រកបអាជីវកម្ម សេវាកម្ម ពាណិជ្ជកម្ម ដែលមាន៧ប្រការ ក្នុងនោះប្រការ១ ចែងថា គ្រប់ពាណិជ្ជករ អាជីវករ សេវាករ ដែលមានសញ្ជាតិខ្មែរ និងមិនស្ថិតនៅក្នុងការធ្វើចំណាត់ថ្នាក់អ្នកជាប់ពន្ធតាមរបបស្វ័យប្រកាស ដូចបានកំណត់ក្នុងប្រកាសលេខ ០២៥ សហរ.ប្រក.អពដ ចុះថ្ងៃទី២៤ ខែមករា ឆ្នាំ២០១៨ របស់ក្រសួងសេដ្ឋកិច្ច និងហិរញ្ញវត្ថុ ស្ដីពីការកែសម្រួលចំណាត់ថ្នាក់អ្នកជាប់ពន្ធតាមរបបស្វ័យប្រកាស ត្រូវមានកាតព្វកិច្ចមកសុំលិខិតអនុញ្ញាតប្រកបអាជីវកម្ម សេវាកម្ម ពាណិជ្ជកម្មពីមន្ទីរពាណិជ្ជកម្មរាជធានី-ខេត្ត ឬពីការិយាល័យច្រកចេញចូលតែមួយនៃរាជធានី ខេត្ដ ខណ្ឌ ក្រុង ស្រុក ។
ចំពោះពាណិជ្ជករ អាជីវករ សេវាករ មានសញ្ជាតិបរទេស ឬខ្មែរ ដែលស្ថិតនៅក្នុងការធ្វើចំណាត់ថ្នាក់អ្នកជាប់ពន្ធតាមរបបស្វ័យប្រកាស ត្រូវមានកាតព្វកិច្ចចុះឈ្មោះក្នុងបញ្ជីពាណិជ្ជកម្ម តាមប្រព័ន្ធស្វ័យប្រវត្ដកម្មរបស់ក្រសួងពាណិជ្ជកម្ម ៕
ចែករំលែកព័តមាននេះ