រាជធានីភ្នំពេញ ៖ សេចក្តីរាយការណ៍បន្តឱ្យដឹងពាក់ព័ន្ធករណីរថយន្តម៉ាក GREAT WALLមួយគ្រឿង ក្នុងនោះ អ្នកបើកបរត្រូវបានស្គាល់ថា ជាអតីតសាស្ត្រាចារ្យម្នាក់ហើយត្រូវពលរដ្ឋនាំគ្នាព្រួតវាយដោយដុំថ្មវាយក្បាលនិងវាយកម្ទេចរថយន្តគាត់ ក្រោយចោទថា បានបង្កគ្រោះថ្នាក់ចរារណ៍នោះ គិតមកដល់វេលាម៉ោង១០ព្រឹកថ្ងៃទី១២ មីនា នេះ គឺត្រូវលោកអគ្គស្នងការនគរបាលរាជធានីភ្នំពេញ ចេញបញ្ជាឱ្យកម្លាំងសមត្ថកិច្ចទាំងអស់ ត្រូវស្រាវជ្រាវរកជនដែលបង្កហិង្សា ដូចដែលមានសកម្មភាពនៅក្នុងវីដេអូបានបង្ហោះនោះ ដើម្បីឱ្យមកទទួលខុសត្រូវតាមផ្លូវច្បាប់ ។ ការចេញបញ្ជាបែបនេះ គឺបន្ទាប់ពីកងកម្លាំងបានស្រាវជ្រាវរកឃើញថា គឺមានមនុស្សតែម្នាក់ប៉ុណ្ណោះដែលត្រូវរថយន្ត GREAT WALL នេះបុកពីក្រោយបណ្តាលឱ្យរងរបួសធ្ងន់ ស្ថិតត្រង់ចំណុចផ្លូវ១៦០ ក្នុងសង្កាត់ទឹកល្អក់ទី២ ខណ្ឌទួលគោក ខណៈរថយន្តនេះ បើកគេចពីការដេញតាមរបស់ម៉ូតូជាច្រើនគ្រឿងចាប់ពីចំណុចខណ្ឌប្ញស្សីកែវមក ។
បុរសរងគ្រោះនិងជាជនជាប់ចោទបង្កគ្រោះថ្នាក់ចរារណ៍នេះ ឈ្មោះស៊ុយ សារ៉េត អាយុ៥២ឆ្នាំ បច្ចុប្បន្នជាបុគ្គលិកក្រុមហ៊ុន និងជាអតីតសាស្ត្រាចារ្យម្នាក់ បានបើករថយន្តម៉ាក GREAT WALL ពណ៌ខ្មៅ ពាក់ស្លាកលេខភ្នំពេញ 2AP-9719 (រងរបួសធ្ងន់ បានបញ្ជូនទៅសង្គ្រោះនៅមន្ទីរពេទ្យវៀតណាម) ។ ដោយឡែក ភាគីខាងម៉ូតូជនរងគ្រោះកាន់ សឹសេង អាយុ៥៩ឆ្នាំ ជាអ្នកទិញអេតចាយ មានទីលំនៅផ្ទះលេខ60C ផ្លូវលេខ២២៧ ភូមិ៩ សង្កាត់ផ្សារដើមគរ ខណ្ឌទួលគោក (រងរបួសធ្ងន់ កំពុងសម្រាកព្យាបាលនៅគ្លីនិកឯកជនមួយ) ។
ទាក់ទិនករណីគ្រោះថ្នាក់ចរាចរណ៍នេះផងដែរ ចំពោះព័ត៌មានដែលបានអះអាងថា មុនពេលកើតហេតុដំបូង គឺរថយន្តម៉ាកGREAT WALLខាងលើ បានបង្កគ្រោះថ្នាក់នៅខណ្ឌប្ញស្សី ធ្វើឱ្យមនុស្សម្នាក់រងរបួសនោះ គឺកម្លាំងនគរបាលរកមិនឃើញអ្នករបួសនោះទេ ហើយក៏មិនមានពាក្យបណ្តឹងពីខាងជនរងគ្រោះនោះដែរ ។ ដោយឡែក ដែលថារថយន្ត GEAT WALL នេះ ពេលកំពុងបើកគេចបានបុកគេមួយកន្លែងទៀត នៅចំណុចសង្កាត់ផ្សារថ្មីនោះ ក៏រកមិនឃើញអ្នករងរបួសដែរ ប៉ុន្តែនៅពេលដែលរថយន្តនេះបើករត់ដល់ចំណុចផ្លូវ១៦០ ក្នុងសង្កាត់ទឹកល្អក់២នោះ គឺបានបើកបុកម៉ូតូជនរងគ្រោះម្នាក់ពីក្រោយមែន ។
គួររំលឹកទៀតថា កាលពីល្ងាចថ្ងៃទី១១ មីនា នោះ រថយន្តម៉ាក GREAT WALLមួយគ្រឿង ត្រូវបានប្រជាពលរដ្ឋដែលធ្វើដំណើរតាមដងផ្លូវនាំគ្នា ដេញវាយកម្ទេច ហើយម្ចាស់រងរបួសធ្ងន់ពោរមុខ បែកក្បាល ខណៈដែលជួបគ្រោះថ្នាក់ចរាចរណ៍ ព្យាយាមបើករត់ និងបុកជាបន្តបន្ទាប់ទៀត ។ ហេតុការណ៍ភ្ញាក់ផ្អើលនេះ ស្ថិតនៅចំណុចផ្លូវលេខ១៥៦ កែងផ្លូវលេខ២៦៥ ក្នុងសង្កាត់ទឹកល្អក់ទី២ ខណ្ឌទួលគោក ។
តាមព័ត៌មានបានឲ្យដឹងថា នៅមុនពេលកើតហេតុរថយន្តនោះ បានជួបគ្រោះថ្នាក់ចរាចរណ៍នៅតាមផ្លូវទៅវត្តសន្តិវ័ន ហៅវត្តទួលអស់លោក ក្នុងខណ្ឌឫស្សីកែវ ។ នៅក្នុងការគ្រោះថ្នាក់នោះ គេពុំដឹងច្បាស់ថា មានមនុស្សរងរបួសឬយ៉ាងណានោះទេ ។ បន្ទាប់ពីគ្រោះថ្នាក់ រថយន្តGREAT WALLក៏បានព្យាយាមបើករត់មករង្វង់មូលគួចកាណុង ដោយមានប្រជាពលរដ្ឋធ្វើដំណើរនាំគ្នា ដេញតាមប្រសាច ។ ទោះបីជាយ៉ាងណារថយន្តនៅតែព្យាយាមបើករត់ហើយ ក៏បានជួបគ្រោះថ្នាក់បុកម៉ូតូនៅខាងជើងផ្សារថ្មីបណ្តាលឲ្យមនុស្សរងរបួសតែពុំទាន់ដឹងច្បាស់ឡើយហើយរថយន្ត ក៏បានព្យាយាមបើករត់បន្តទៀត ។ តាមព័ត៌មានឲ្យដឹងទៀតថា ខណៈនោះប្រជាពរដ្ឋ ក៏បាននាំគ្នាដេញកាន់តែច្រើន និងខ្លះ ក៏បានស្រែកថា រថយន្តបុកមនុស្សស្លាប់បើករត់ជាហេតុធ្វើឲ្យក្រុមអ្នកដេញតាមមានកំហឹង រឹតតែខ្លាំង។ នៅពេលធ្ចើដំណើរ មកដល់មូលដ្ឋានខណ្ឌទួលគោក ចំណុចផ្លូវលេខ១៦០ ក្បែរផ្លូវលេខ ២៦១ក្នុងសង្កាត់ទឹកល្អក់ទី២ ក៏បានបុកមូតូម៉ាកវ៉េវមួយគ្រឿងទៀត បណ្តាលឲ្យបុរសម្នាក់រងរបួស ហើយរថយន្តក៏បានបន្តដំណើរ ដោយមានប្រជាពលរដ្ននាំគ្នាដេញតាមពីក្រោយ។
តាមព័ត៌មានឲ្យដឹងទៀតថា នៅពេលដែលរថយន្តធ្វើដំណើរដល់ខាងត្បូងមន្ទីរពេទ្យ ព្រះកុសុះមះ ត្រង់ចំណុចផ្លូវលេខ១៥៦ កែងផ្លូវលេខ២៦៥ ក្នុងសង្កាត់ទឹកល្អក់ទី២ រថយន្តនោះបែកធុងទឹក ទៅមុខមិនរួច ក៏ត្រូវប្រជាពលរដ្ននាំគ្នាយកដុំថ្មវាយយកតែឈ្នោះដៃ រងរបួសធ្ងន់តែម្តង។ ភ្លាមៗ នោះនគរបាលរួមជាមួយសណ្តាប់ធ្នាប់ខណ្ឌទួលគោក ជួយអន្តរាគមន៍ ហើយ ហៅរថយន្តបញ្ជូនទៅកាន់មន្ទីរពេទ្យ។ ជុំវិញគ្រោះថ្នាក់នោះគេពុំទាន់ដឹងថា មានមនុស្សប៉ុន្មានរងរបួសឡើយ ?។ រថយន្តនោះត្រូវបាននគរបាលបញ្ជូនទៅកាន់ការិយាល័យ ចរាចរណ៍ផ្លូគោក ដើម្បីធ្វើការដោះស្រាយ ។
ចែករំលែកព័តមាននេះ