ខេត្តបន្ទាយមានជ័យ ៖ ជនសង្ស័យម្នាក់ត្រូវបានកម្លាំងជំនាញកងរាជអាវុធហត្ថខេត្តបន្ទាយមានជ័យរៀបចំសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធីពីបទជួញដូរ និងប្រើប្រាស់គ្រឿងញៀន នៅថ្ងៃទី១១ ខែមីនា ឆ្នាំ២០១៨ ។
លោកវរសេនីយ៍ត្រី នួន នីណារ៉ូ បានឱ្យដឹងថា ក្រោយទទួលបានព័ត៌មានស្តីពីករណីជួញដូរគ្រឿង ថ្ងៃទី០៩ ខែមីនា ឆ្នាំ២០១៨ កងរាជអាវុធហត្ថក្រុងប៉ោយប៉ែតបានដឹកនាំកម្លាំងចុះប្រតិបត្តិការបង្ក្រាបករណីជួញដូរគ្រឿងញៀននៅចំណុចភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត និងបានឃាត់ខ្លួនជនសង្ស័យចំនួនម្នាក់ឈ្មោះ ឡុង ឆាយបៀង ភេទប្រុស អាយុ៥៣ឆ្នាំ បច្ចុប្បន្នរស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត និងដកហូតវត្ថុតាងរួមមានគ្រឿងញៀនមេតំហ្វេតាមីនទឹកកកចំនួន០៥កូនថង់តូច ជញ្ជីងថ្លឹងគ្រឿងញៀនចំនួន០១ ទូរស័ព្ទដៃម៉ាកណូគាចុចពិលចំនួន០១គ្រឿង និងសម្ភារសម្រាប់ច្រកគ្រឿងមួយចំនួន ។
លោកវរសេនីយ៍ត្រីបានបញ្ជាក់ថា ក្រោយធ្វើការឃាត់ខ្លួន និងសាកសួរជនសង្ស័យបានសារភាពថា រូបគេ(ជនសង្ស័យ)បានរកស៊ីជួញដូរគ្រឿងញៀនអស់រយៈពេលជាងមួយឆ្នាំមកហើយ ។ ក្រោយទទួលបានចម្លើយសារភាពរបស់ជនសង្ស័យកងរាជអាវុធហត្ថក្រុងប៉ោយប៉ែតបានកសាងសំណុំរឿងបញ្ជូនជនសង្ស័យ រួមជាមួយវត្ថុតាងទៅទីបញ្ជាការកងរាជអាវុធហត្ថខេត្តដើម្បីចាត់ការបន្តទៅតាមនីតិវិធី ៕
ចែករំលែកព័តមាននេះ