រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងថា រាជរដ្ឋាភិបាលដឹកនាំប្រទេសមិនយកគំរូតាមបណ្តាណាមួយនោះទេ ព្រោះកម្ពុជាអធិបតេយ្យភាពរបស់ខ្លួន ហើយធ្លាប់ឆ្លងកាត់ប្រវត្តិសាស្ត្រដ៏ជូរចត់អស់ហើយ ។ ការលើកឡើងរបស់អ្នកនាំពាក្យគណបក្សកាន់អំណាចនេះ…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងថា រាជរដ្ឋាភិបាលដឹកនាំប្រទេសមិនយកគំរូតាមបណ្តាណាមួយនោះទេ ព្រោះកម្ពុជាអធិបតេយ្យភាពរបស់ខ្លួន ហើយធ្លាប់ឆ្លងកាត់ប្រវត្តិសាស្ត្រដ៏ជូរចត់អស់ហើយ ។ ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីឃើញរូបភាពមានការលូកដៃចូលកិច្ចការផ្ទៃក្នុងពីបណ្តាមួយចំនួនតាមរយៈ អតីតបក្សប្រឆាំងដែលយកធ្វើជាបង្អែកពីក្រោយខ្នង ។
លោកសុខ ឥសានបានឲ្យនៅថ្ងៃទី១១ ខែមីនា ឆ្នាំ២០១៨ថា តាមស្មារតីនៃកិច្ចព្រមព្រៀងទីក្រុងប៉ារីសថ្ងៃ២៣ តុលា ១៩៩១ និងខ្លឹមសារនៃរដ្ឋធម្មនុញ្ញព្រះរាជាណាចក្រកម្ពុជា រាជរដ្ឋាភិបាលកម្ពុជារបស់គណបក្សប្រជាជនកម្ពុជា បានប្រកាន់ខ្ជាប់នូវគោលការណ៍លទ្ធិប្រជាធិបតេយ្យ និងនីតិរដ្ឋក្នុងការគ្រប់គ្រង និងដឹកនាំប្រទេស ដើម្បីធានាថែរក្សាសន្តិភាព ស្ថេរភាពនយោបាយ សេចក្តីសុខសុវត្ថិភាពរបស់ប្រជាជនកម្ពុជា ។
លោកបន្តថា ទន្ទឹមនឹងនេះរាជរដ្ឋាភិបាលកម្ពុជាក៏ចាំបាច់ចាត់វិធានការណ៍ ផ្លូវច្បាប់ ចំពោះគណបក្សប្រឆាំងដែលបានឃុបឃឹតជាមួយបរទេសក្នុងការចង់ផ្តួលរំលំរាជរដ្ឋាភិបាលកម្ពុជាស្របច្បាប់ ។ ជាមួយគ្នានោះដែរ លោកសុខ ឥសានក៏បានឲ្យដឹងថា បោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ២០១៨ នឹងប្រព្រឹត្តទៅតាមការគ្រោងទុក ដោយគ្មានវត្តមានអតីតបក្សប្រឆាំង ដែលត្រូវបានរំលាយដោយតុលាការកំពូលរួចហើយ ។ ប្រជាជកម្ពុជាដែលបានចុះឈ្មោះបោះឆ្នោតជាង៨៤ ភាគរយដែលនឹងអញ្ជើញទៅបោះឆ្នោត សម្តែងឆន្ទៈរបស់ខ្លួនដោយសេរី និងឯករាជ្យ ។ អតីតបក្សប្រឆាំង និងអានុភាពប្រតិកិរិយាទាំងក្នុង និងបរទេសគ្មានសិទ្ឋិជ្រៀតជ្រែក ក្នុងកិច្ចការផ្ទៃក្នុងកម្ពុជាជាដាច់ខាត ។
លោកបញ្ជាក់ថា «សូមបញ្ជាក់ថា ព្រះរាជាណាចក្រកម្ពុជាជារដ្ឋឯករាជ្យមានអធិបតេយ្យ និងបូរណភាពទឹកដី ស្មើសិទ្ធិ ស្មើភាពជាមួយប្រទេសនៅលើពិភពលោក ប្រជាជនកម្ពុជាមានសិទ្ធិស្វ័យសម្រេច ក្នុងកិច្ចការផ្ទៃក្នុងរបស់ខ្លួន ។ កម្ពុជាមិនរៀនសូត្រពីប្រទេសណាទេ ដោយសារកម្ពុជាមានបទពិសោធន៏គ្រប់គ្រាន់ក្នុងការឆ្លងកាត់ដំណាក់កាលប្រវត្តិសាស្ត្រជាច្រើនធ្លាប់រងទុក្ខវេទនាបង្ក ដោយបរទេសដែលតែងតែចង់បានកម្ពុជាជាភូមិសាស្ត្រន យោបាយរបស់ខ្លួន ។ ពួកមហាអំណាចចក្រពត្តិនិយមធ្លាប់លូកដៃប្រឡាក់ឈាមកម្ពុជាយ៉ាងឈឺចាប់ និងរងទុក្ខវេទនារាប់មិនអស់ទៅហើយ មិនបាច់មកប្រដៅកម្ពុជាទៀតទេ » ។
សូមរឮកថា ការប្រកាសជំហររបស់មន្ត្រីជាន់ខ្ពស់គណបក្សកាន់អំណាចនេះ បន្ទាប់ពីក្រុមអតីតបក្សប្រឆាំងបានកំពុងដើរកៀរគរឲ្យបណ្តាប្រទេសមហាអំណាចដាក់គំនាបមកលើរដ្ឋាភិបាលដែលដឹកនាំដោយសម្តេចតេជោហ៊ុនសែន ដោយក្រុមនេះចោទសម្តេចថា កំពុងរំលោភសិទ្ធិមនុស្ស មិនគោរពលទ្ធិប្រជាធិបតេយ្យ ។
យ៉ាងណាក្តីបើតាមអ្នកវិភាគប្រកាន់កណ្តាលនាំគ្នាលើកឡើងថា ការប្រកាសជំហររបស់បក្សកាន់អំណាចនេះ ដោយសារគណបក្សនេះធ្លាប់ដឹកនាំប្រទេសដោយបាតដៃទទេ រហូតដល់មានអភិវឌ្ឍន៍មកដល់ពេលបច្ចុប្បន្នមិនបានយកគំរូតាមបណ្តាប្រទេសណាមួយនោះទេ គឺពឹងលើកការចរចាគ្នា ។
អ្នកវិភាគក៏បានលើកឡើងថា បក្សប្រឆាំងតែងតែរកចំណុចវិជ្ជមានរបស់អ្នកដឹកនាំប្រទេសទៅធ្វើការផ្សព្វផ្សាយជាទន់ចង់បានប្រជាប្រិយភាពសម្រាប់ការចូលរួមបោះឆ្នោតម្តងៗ ។ ប្រសិនបើបក្សប្រឆាំងយកគំនិតល្អៗ សម្រាប់អភិវឌ្ឍន៍ជាការល្អណាស់ ៕
ចែករំលែកព័តមាននេះ