សហរដ្ឋអាមេរិក ៖ អាជ្ញាធររាយការណ៍កាលពីថ្ងៃទី៩ មីនា ថា ការចាប់ចំណាប់ខ្មាំងរយៈពេលច្រើនម៉ោងក្នុងអគារមួយនៅកាលីហ្វ័រនីញ៉ា បណ្តាលឱ្យមនុស្សស្លាប់៤នាក់ ក្នុងនោះរួមមានជនសង្ស័យផងដែរ ។ អគារកើតមានរឿងនេះជាអគារសម្រាប់បណ្តាអតីតយុទ្ធជនកងទ័ពអាមេរិក ។
ការចាប់ចំណាប់ខ្មាំងប្រកបដោយសោកនាដកម្មនេះកើតមានមិនដល់១ខែផង ក្រោយពីយុវជនអាយុ១៩ឆ្នាំម្នាក់ ប្រើកាំភ្លើងវាយលុកមួយដើមបាញ់សម្លាប់មនុស្ស១៧នាក់ ក្នុងវិទ្យាល័យមួយនៃរដ្ឋផ្លរីដា ។
ព្រឹទ្ធសមាជិករដ្ឋកាលីហ្វ័រនីញ៉ា លោក BILL DODD ថ្លែងទៅកាន់ក្រុមអ្នកកាសែតថា ជនសង្ស័យជាអតីតយុទ្ធជនកងទ័ពដែលមានបញ្ហាសរសៃប្រសាទម្នាក់ ។ បណ្តាចំណាប់ខ្មាំងជានិយោជិតបម្រើការក្នុងអគារដ៏ធំនេះ ។ ទោះបីមានការខិតខំប្រឹងប្រែងយ៉ាងណាក្តី បណ្តាអ្នកចរចារបស់ប៉ូលិសនៅតែពុំអាចទាក់ទងបានជាមួយជនសង្ស័យក្រោយពីជននេះបាញ់តតាំងជាមួយនាយប៉ូលិសម្នាក់ ។
ស្ថិតនៅ YONTVILLE ភាគកណ្តាលនៃទីក្រុង NAPA VALLEY ចម្ងាយ៩៧គីឡូម៉ែត្រខាងជើងទីក្រុងសាន់ហ្វ្រាន់ស៊ីស្កូ ប្លុកអគារនេះជាប្លុកយ៉ាងធំមួយនៅសហរដ្ឋអាមេរិកសម្រាប់ការស្នាក់នៅរបស់បណ្តាអតីតយុទ្ធជន ។ អតីតយុទ្ធជនប្រមាណជា១.០០០នាក់ រស់នៅទីនោះ ។ ការចាប់ចំណាប់ខ្មាំងចាប់ផ្តើមនាវេលាម៉ោងប្រមាណជា១០និង៣០នាទីព្រឹកម៉ោងក្នុងស្រុក ហើយចប់ជិត១០ម៉ោងក្រោយមក ។
ពេលប៉ូលិសអាចចូលទៅដល់បន្ទប់កន្លែងចាប់ចំណាប់ខ្មាំងប្រទះឃើញសាកសពនារី៣នាក់ និងសាកសពខ្មាន់កាំភ្លើង ៕
ចែករំលែកព័តមាននេះ