ខេត្តព្រះសីហនុ ៖ ស្របពេលកំណើនភ្ញៀវទេសចរជាតិ និងអន្តរជាតិ ទៅទស្សនាកម្សាន្ដនៅខេត្តព្រះសីហនុកាន់តែច្រើនឡើងៗពីមួយឆ្នាំទៅមួយឆ្នាំ ធ្វើឲ្យការផ្គត់ផ្គង់បន្ទប់ស្នាក់នៅក្នុងខេត្តមួយនេះខ្វះខាត ព្រោះសណ្ឋាគារ និងផ្ទះសំណាក់មានចំនួនតិច ហើយថែមទាំងធ្វើឲ្យតម្លៃបន្ទប់កើនឡើងដែរ ពិសេសនៅពេលមានពិធីបុណ្យប្រពៃណីជាតិសំខាន់ៗ…
ខេត្តព្រះសីហនុ ៖ ស្របពេលកំណើនភ្ញៀវទេសចរជាតិ និងអន្តរជាតិ ទៅទស្សនាកម្សាន្ដនៅខេត្តព្រះសីហនុកាន់តែច្រើនឡើងៗពីមួយឆ្នាំទៅមួយឆ្នាំ ធ្វើឲ្យការផ្គត់ផ្គង់បន្ទប់ស្នាក់នៅក្នុងខេត្តមួយនេះខ្វះខាត ព្រោះសណ្ឋាគារ និងផ្ទះសំណាក់មានចំនួនតិច ហើយថែមទាំងធ្វើឲ្យតម្លៃបន្ទប់កើនឡើងដែរ ពិសេសនៅពេលមានពិធីបុណ្យប្រពៃណីជាតិសំខាន់ៗ ។
លោក យន្ត មីន អភិបាលខេត្ត បានឲ្យដឹងថា ផ្អែកលើសក្ដានុពលដ៏ធំធេងក្នុងការអភិវឌ្ឍវិស័យទេសចរណ៍ធម្មជាតិតំបន់ឆ្នេរ បានជំរុញឲ្យខេត្តព្រះសីហនុមានការអភិវឌ្ឍរីកចម្រើនឥតឈប់ឈរ ។ លោកថា ៖« ក្នុងឆ្នាំ២០១៧កន្លងទៅនេះ ខេត្តទទួលបានភ្ញៀវទេសចរសរុបជិត២លាននាក់ ក្នុងនោះភ្ញៀវជាតិមានចំនួន១,៥លាននាក់ និងភ្ញៀវទេសចរអន្តរជាតិជិត៥០ម៉ឺននាក់ » ។
លោកលើកឡើងថា ៖« កន្លងមក នៅរៀងរាល់ថ្ងៃឈប់សម្រាកធំៗ សណ្ឋាគារ និងផ្ទះសំណាក់ តែងតែមានការកក់ពេញៗ ហើយយើងទទួលស្គាល់ថា នៅពេលនោះ សណ្ឋាគារ និងផ្ទះសំណាក់ពិតជាឡើងថ្លៃ ដោយសារតែបន្ទប់មួយត្រូវស្នាក់នៅគ្នា៤ទៅ៦នាក់ ពេលខ្លះឈានទៅ៧ឬ៨នាក់ និងបានប្រើប្រាស់ទឹកភ្លើងអស់ច្រើន អីចឹងហើយទើបម្ចាស់សណ្ឋាគារ និងផ្ទះសំណាក់ ត្រូវតែដំឡើងថ្លៃឲ្យសមនឹងប្រើប្រាស់របស់ភ្ញៀវ » ។
ដើម្បីរួមចំណែកបំពេញតម្រូវការដែលកំពុងខ្វះខាតនេះ នៅរយៈពេល១ឆ្នាំខាងមុខ សណ្ឋាគារ១ដែលមានចំនួនជាង៤០០បន្ទប់ នឹងលេចរូបរាងឡើងនៅលើទឹកដីទេសចរណ៍មួយនេះ ដោយរំពឹងថានឹងចូលរួមកាត់បន្ថយកង្វះខាតបន្ទប់ស្នាក់បានមួយកម្រិត ព្រមទាំងចូលរួមផ្ដល់ការងារជូនពលរដ្ឋខ្មែរប្រមាណ១ពាន់នាក់ ។
បើតាមម្ចាស់ភាគហ៊ុនគម្រោងសណ្ឋាគារក្នុងខេត្តព្រះសីហនុនេះ បានឲ្យដឹងថា សណ្ឋាគារនេះមានបន្ទប់ចំនួន៤៥២ ហើយនៅពេលគម្រោងសណ្ឋាគារនេះសង់រួចរាល់ គឺអាចបង្កើតការងារធ្វើជាអចិន្ត្រៃយ៍ជូនប្រជាពលរដ្ឋរហូតដល់១ពាន់នាក់ ដើម្បីជាចំណែកមួយជួយកាត់បន្ថយភាពក្រីក្រ កសាងប្រទេសជាតិ និងបង្កើតធនធានមនុស្ស ជាពិសេស នៅក្នុងខេត្តព្រះសីហនុផ្ទាល់តែម្ដង ។
លោកឧកញ៉ា តាំង គួង ម្ចាស់ភាគហ៊ុនរូបនេះបញ្ជាក់ថា ៖« សណ្ឋាគារនេះអាចនឹងសង់រួចរាល់នៅរយៈពេល១ឆ្នាំទៀត។ ដូចនេះ នៅក្រោយពេលសង់រួច វាអាចផ្ដល់សេវាកម្មបន្ទប់ស្នាក់នៅដល់ភ្ញៀវដែលមកកម្សាន្តនៅខេត្តបានច្រើនផងដែរ » ។
បើតាមលោក យន្ដ មីន អភិបាលខេត្ត បញ្ជាក់ថា បច្ចុប្បន្នខេត្តព្រះសីហនុមានមូលដ្ឋានអាជីវកម្ម និងសេវាកម្មទេសចរណ៍សរុបចំនួន៨១០ទីតាំង ក្នុងនោះមានសណ្ឋាគារចំនួន៧៣, ផ្ទះសំណាក់៣១៦, ភោជនីយដ្ឋាន២៥៩ និងកាស៊ីណូកំពុងដំណើរការ៣២ទីតាំង។
យោងតាមរបាយការណ៍របស់រដ្ឋបាលខេត្តមួយនេះបានបញ្ជាក់ដែរថា ក្នុងរយៈពេលប៉ុន្មានឆ្នាំចុងក្រោយនេះ ខេត្តព្រះសីហនុ មានក្រុមហ៊ុនវិនិយោគជាតិ និងអន្តរជាតិធំៗជាច្រើនបាននិងកំពុងវិនិយោគ និងបណ្ដាក់ទុនរកស៊ីលើវិស័យសំណង់ កសិកម្ម រោងចក្រ សិប្បកម្មកែច្នៃ ផលិតផលសម្រេច និងពាក់កណ្ដាលសម្រេច រោងចក្រកាត់ដេរ ឧស្សាហកម្ម ទេសចរណ៍ មជ្ឈមណ្ឌលពាណិជ្ជកម្ម និងតំបន់សេដ្ឋកិច្ចពិសេស ។
របាយការណ៍ដដែលបង្ហាញថា ក្នុងខេត្តព្រះសីហនុ មានតំបន់សេដ្ឋកិច្ចពិសេសធំៗចំនួន៣ រួមមាន តំបន់សេដ្ឋកិច្ចពិសេសក្រុងព្រះសីហនុ, តំបន់សេដ្ឋកិច្ចអ៊ែតវូត ស្រុកស្ទឹងហាវ និងតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ ។
បើតាមភ្នាក់ងារវាយតម្លៃអចលនវត្ថុកម្ពុជាជាច្រើនបានឲ្យដឹងស្រដៀងគ្នាថា ក្រោយពេលមានវត្តមានវិនិយោគិនចិនមកកាន់កម្ពុជា ជាពិសេស ខេត្តព្រះសីហនុ បានធ្វើឲ្យតម្លៃដីធ្លីក្នុងខេត្តមាត់សមុទ្រនេះឡើងខ្ពស់ជា២ជា៣ និងមានការអភិវឌ្ឍជាបន្តបន្ទាប់ដូចជា សណ្ឋាគារ ខុនដូ និងកាស៊ីណូ ជាដើម ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងថា តម្លៃដីឡើងថ្លៃ ដោយសារតែមានតម្រូវការ។ បច្ចុប្បន្ននេះ តម្រូវការដីធ្លីនៅខេត្តព្រះសីហនុមានច្រើន ហើយអ្នកទិញ និងអ្នកលក់ភាគច្រើនជាជនជាតិចិន លោកបារម្ភខ្លាចថ្ងៃណាមួយ ចិនមានវិបត្តិអ្វីកើតឡើងនោះ វាអាចនឹងធ្វើឲ្យវិបត្តិដីធ្លីកើតឡើងដូចកាលពីវត្តមានកូរ៉េនៅកម្ពុជាច្រើនដូច្នេះដែរ ។
លោក សន សៀប អគ្គនាយកក្រុមហ៊ុនវាយតម្លៃអចលនវត្ថុ Key Real Estate Co., Ltd. បានឲ្យដឹងថា រហូតមកដល់ពេលនេះ លំហូរវិនិយោគិនបរទេសមកកម្ពុជា បានផ្ដល់ប្រយោជន៍ជាច្រើនដល់ប្រទេស ជាពិសេស ដល់ពលរដ្ឋតែម្ដង ។ លោកថា ៖« បច្ចុប្បន្ន យើងត្រូវការឲ្យវិនិយោគិនបរទេសមកអភិវឌ្ឍន៍ប្រទេសយើង ដើម្បីឲ្យប្រទេសយើងមានភាពរីកចម្រើនដូចបណ្ដាប្រទេសដទៃទៀត ។ ជាក់ស្ដែងយើងត្រូវការអគារខ្ពស់ៗ និងសណ្ឋាគារ ជាដើម» ៕
ចែករំលែកព័តមាននេះ