រាជធានីភ្នំពេញ ៖ តារាចម្រៀងនាងអ៊ី វ៉ា បានធ្វើឲ្យអ្នកគាំទ្រជាច្រើននាក់ខកចិត្តយ៉ាងខ្លាំង ព្រោះនាងមិនបានចូលរួមសម្តែងតាមការគ្រោងទុកនៅក្លឹបកម្សាន្តមួយនៅខេត្តសៀមរាប ។
ក្លឹបកម្សាន្តនោះបានប្រកាសពីវត្តមានសម្តែងរបស់កញ្ញាអ៊ី វ៉ា នៅថ្ងៃទី៨ មីនា ២០១៨ ដែលជាថ្ងៃសិទ្ធនារី ជាមួយការភ្ជាប់រូបPoster របស់នាងថែមទៀតផង ។
លុះដល់ពេលកំណត់តារាចម្រៀងអ៊ី វ៉ា មិនបានចូលរួមសម្តែងតាមការផ្សព្វផ្សាយរបស់ក្លឹបកម្សាន្តនោះទេ ជាហេតុធ្វើឲ្យអ្នកគាំទ្រនាងជាច្រើននាក់ខកចិត្តយ៉ាងខ្លាំង ។
រឿងរ៉ាវមួយនេះកើតឡើងបន្ទាប់ពីកន្លងមកអ៊ី វ៉ា ធ្លាប់មានការរិះគន់ថា នាងវាយឫកនៅពេលក្លាយជាតារាចម្រៀងល្បី ។ ប៉ុន្តែអ៊ី វ៉ា នៅតែទទួលបានការគាំទ្រច្រើនដដែលពីយុវវ័យ ហើយនាងតែងតែបង្ហាញខ្លួនច្រៀងរាំតាមឆាកតន្ត្រីនានាស្ទើរមិនដាច់សូរ មិនថាក្នុងរាជធានីភ្នំពេញ និងតាមបណ្តាខេត្តនានានោះឡើយ ។
នៅមិនទាន់មានការបកស្រាយពីម្ចាស់ក្លឹបកម្សាន្តនោះចំពោះការមិនមានវត្តមានសម្តែងរបស់អ៊ី វ៉ា ដូចការផ្សព្វផ្សាយរបស់ខ្លួននោះនៅឡើយទេ ។
ផ្ទុយទៅវិញសម្រាប់តារាចម្រៀងកញ្ញាអ៊ី វ៉ា បានបដិសេធថា មិនមែនជាកំហុសចំពោះការអវត្តមានសម្តែងរបស់នាងទេ ពោលគឺនាងមិនបានទទួលការទាក់ទងឲ្យទៅសម្តែងពីម្ចាស់ក្លឹបកម្សាន្តនោះឡើយ ។ អ៊ី វ៉ា បញ្ជាក់ថា កាលថ្ងៃទី៨មីនាក្លឹប Temple Contaner Pub Zone &Classic Hip Hop Club នៅខេត្តសៀមរាប បានប្រកាស និងផុសរូបថា នាងទៅច្រៀងនៅទីនោះទាំងមិនបានទាក់ទងមកនាងសោះ ។
ក្នុងករណីនេះអ៊ី វ៉ា បានស្នើសុំឲ្យអ្នកគាំទ្រកុំយល់ច្រឡំថា កំហុសមកពីនាងមិនបានទៅច្រៀង។ ទោះជាយ៉ាងណាក្តីនាងថ្លែងអំណរគុណដល់អ្នកគាំទ្រទាំងអស់ដែលនៅរង់ចាំនាង។ ទន្ទឹមនេះនាងសូមឲ្យ Tample Contaner Pub Zone &Classic Hip Hop Club ជួយដោះស្រាយបញ្ហានេះ ។
តារាចម្រៀងវ័យក្មេងកញ្ញាអ៊ី វ៉ា បានបញ្ចប់កិច្ចសន្យាច្រៀងនៅផលិតសាន់ដេហើយ តែរហូតមកដល់ពេលនេះនាងនៅមិនទាន់បញ្ជាក់ថា នាងនឹងបន្តអាជីពចម្រៀងនៅផលិតកម្មណាមួយឡើយ ។
មានផលិតកម្មធំពីរ គឺផលិតកម្មហង្សមាស និងថោន ដែលគេរំពឹងថា មានភាគរយខ្ពស់សម្រាប់អ៊ី វ៉ា ប៉ុន្តែនាងមិនបានបញ្ចេញឲ្យដឹងឡើយ ដោយទុកឲ្យទស្សនិកជនមានការភ្ញាក់ផ្អើល ៕
ចែករំលែកព័តមាននេះ