ខេត្តស្ទឹងត្រែង ៖ រយៈពេល៧ឆ្នាំហើយ មិនដែលឃើញមានវត្តមានសត្វផ្សោតថ្មីនៅចំណុចអន្លង់ឈើទាល ភូមិអន្លង់ស្វាយ ឃុំព្រះរំកិល ស្រុកថាឡាបរិវ៉ាត់នោះទេ ស្រាប់តែថ្ងៃទី១០ មីនានេះ ប្រទះឃើញកូនផ្សោត១ងាប់អណ្តែតទឹក ។
បើតាមអ្នកនេសាទឱ្យដឹងថា មានកូនផ្សោត១ក្បាលទម្ងន់ជាង៩គីឡូក្រាមស្លាប់ ខណៈនោះអ្នកនេសាទបានជូនដំណឹងដល់មន្ត្រីរដ្ឋបាលជលផលដើម្បីពិនិត្យតែម្តង។
លោក ទុំ នីរ៉ូ ប្រធានរដ្ឋបាលជលផលស្ទឹងត្រែងឱ្យដឹងថា កូនផ្សោតទើបកើតនេះមានទំនង់៩គីឡូ៦ខាំ ត្រូវបានវេចខ្ចប់ និងក្លាសេរក្សាទុកឱ្យអង្គការ WWF ធ្វើការពិនិត្យថា តើកូនផ្សោតងាប់ ដោយមូលហេតុអ្វីពិតប្រាកដ?
លោកប្រធានរដ្ឋបាលជលផលបានឱ្យដឹងទៀតថា ផ្សោតនៅចំណុចអន្លង់ឈើទាលមានវត្តមានចំនួន៣ក្បាល តែរយៈពេល៧ឆ្នាំកន្លងមកហើយ មិនឃើញមានសត្វផ្សោតថ្មីនោះទេ ស្រាប់តែឥឡូវឃើញកូនផ្សោត១ក្បាលនេះស្លាប់អណ្តែកទឹក ដែលគេសង្ស័យថា មានផ្សោតថ្មីមករស់នៅទីនោះ ហើយបង្កាត់ពូជបាន១ក្បាល តែអកុសលត្រូវស្លាប់ទៅវិញ។ ហើយនៅអន្លង់ឈើទាលនេះ មានសត្វផ្សោត៣ក្បាលដែលគេសន្និដ្ឋានថា ញីសុទ្ធ ឬឈ្មោលសុទ្ធ ទើបរយៈពេល៧ទៅ៨ឆ្នាំ មិនមានកូនផ្សោតឡើយ តែពេលនេះវត្តមានកូនផ្សោត១ក្បាលដែលងាប់ធ្វើឱ្យសង្ស័យថា មានសត្វផ្សោតផ្សេងមករស់នៅ៕
ចែករំលែកព័តមាននេះ