ខេត្តបាត់ដំបង ៖ សមត្ថកិច្ចបានឲ្យដឹងថា តូបលក់ដូរចំនួន២ដែលនៅក្បែរគ្នាត្រូវអគ្គិភ័យឆេះអស់គ្មានសល់ ហេតុការណ៍នេះកើតឡើងកាលពី៨និង៣០នាទីយប់ ថ្ងៃទី១០ ខែមីនា ឆ្នាំ២០១៨ ស្ថិតនៅភូមិព្រៃស្វាយ ឃុំព្រៃស្វាយ ស្រុកមោងឫស្សី ដែលគេសង្ស័យថា ទុស្សេខ្សែភ្លើង។
មន្ត្រីកងរាជអាវុធហត្ថបានឲ្យដឹងថា ម្ចាស់តូបលក់ដូរទាំង២នោះ មាន ១-ឈ្មោះ ស៊ី វ៉ាន់ថន ភេទប្រុស អាយុ៣៩ឆ្នាំ មុខរបរលក់ដូរ រស់នៅភូមិ-ឃុំកើតហេតុ មានតូបទំហំ៥x៧ម៉ែត្រ ធ្វើអំពីឈើប្រក់សង្ក័សី ត្រូវឆេះអស់ទាំងស្រុង និង២-ឈ្មោះហ៊ិន សាក់ ភេទប្រុស អាយុ៤៨ឆ្នាំ មុខរបរលក់ដូររស់នៅភូមិ-ឃុំកើតហេតុ តូបទំហំ៦x១០ម៉ែត្រ ធ្វើអំពីឈើប្រក់សង្ក័សី ឆេះអស់៥០%។
មន្ត្រីដដែលបានបន្តថា តូបរបស់ប្រជាពលរដ្ឋទាំង២នេះ ធ្វើនៅខាងមុខផ្ទះក្បែរគ្នា ហើយបានបាត់បង់អីវ៉ាន់លក់ដូរ និងទ្រព្យសម្បត្តិស្ទើរទាំងស្រុង ដោយសារជួយរំដោះមិនទាន់។ ចំណែកម្ចាស់តូបបានអះអាងថា អគ្គិភ័យបានកើតឡើងដោយសារទុស្សេខ្សែភ្នើង។
ពាក់ព័ន្ធនឹងករណីនេះ ជនរងគ្រោះនិយាយថា អគ្គិភ័យនោះកើតឡើងលឿនណាស់ ព្រោះមានតែអីវ៉ាន់ និងជញ្ជាំងឈើ ឬជ័រផ្លាស្ទិក។ ម្ចាស់តូបបញ្ជាក់ថា ពេលនោះអ្នកភូមិបានជួយអន្តរាគមន៍ពន្លត់ និងជួយរំដោះអីវ៉ាន់ដែរ តែដោយសារអណ្ដាតភ្លើងឆាបឆេះខ្លាំងពេក ទើបមិនអាចជួយបាន ហើយទំនិញ និងសម្ភារ:ស្ទើរទាំងស្រុងបានក្លាយជាចំណីព្រះអគ្គី។
បើតាមរបាយការណ៍មត្ថកិច្ចឲ្យដឹងថា ទ្រព្យសម្បត្តិរបស់ឈ្មោះហ៊ិន សាក់ ដែលខូចខាតមានទូឈើ៤ ទូទឹកកក១ តុបាយធំ១ឈុត ក្ដាងឿបេង៥ស្លឹក ស៊ីម៉ង់២តោន គ្រឿងសំណង់មួយចំនួន សម្ភារ:ផ្សាដែក សម្ភារ:ផ្ទះបាយ និងសម្លៀកបំពាក់មួយចំនួនទៀត ដែលសរុបជាទឹកប្រាក់អស់១០.០៥០ដុល្លារ និងប្រាក់ខ្មែរអស់ ២,៨លានរៀល។ ដោយឡែកម្ចាស់តូបឈ្មោះស៊ី វ៉ាន់ថន បានខូចខាតគិតជាទឹកប្រាក់អស់១៥០ដុល្លារ និងជាង១,៤លានរៀល ប៉ុន្តែមិនមានគ្រោះថ្នាក់ដល់មនុស្សទេ៕
ចែករំលែកព័តមាននេះ