រាជធានីភ្នំពេញ ៖ មានមនុស្សប្រុសស្រី០៤នាក់ របួសធ្ងន់ស្រាល និង២នាក់ទៀតស្លាប់ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់រវាងម៉ូតូ២គ្រឿងបានទៅបុកជាមួយរថយន្តមួយគ្រឿង ករណីគ្រោះថ្នាក់ខាងលើនេះបង្កការភ្ញាក់ផ្អើលកាលពីម៉ោង១២និង២០នាទីរំលងអាធ្រាត្រឈានចូលថ្ងៃទី១១ ខែមិនានេះ នៅចំណុចមុខបុរីសែនមនោរម្យផ្លូវជាតិលេខ០៤ ព្រំប្រទល់សង្កាត់កន្ទោក និងសង្កាត់ចោមចៅ ខណ្ឌពោធិ៍សែនជ័យ ។
យុវជនដែលស្លាប់ឈ្មោះ ផុន ធារ៉ូ អាយុ១៨ឆ្នាំ ស្នាក់នៅភូមិត្រពាំងគង ឃុំត្រពាំងគង ស្រុកសំរោងទង ខេត្តកំពង់ស្ពឺ ។ ចំណែកស្ត្រីដែលស្លាប់នៅវត្តទឹកថ្លា អត់ទាន់រកសាច់ញាតិឃើញនៅឡើយទេ ។
សមត្ថកិច្ចបញ្ជាក់ប្រាប់ថា អ្នកស្លាប់ និងរងរបួសនៅមិនទាន់ស្គាល់អត្តសញ្ញាណនៅឡើយ ដោយពេលគ្រោះថ្នាក់ស្ត្រីវ័យក្មេងម្នាក់បានស្លាប់នៅនឹងកន្លែង យុវជនម្នាក់ទៀតបានស្លាប់តាមដងផ្លូវពេលរថយន្តដឹកទៅសង្គ្រោះ ។ ដោយឡែកស្ត្រី០៣នាក់ទៀតរងរបួសធ្ងន់ ដឹកទៅកាន់គ្លីនិកឯកជន ចំណែកបុរសម្នាក់ទៀតរបួសស្រាលគេចខ្លួន សរុបទាំងអស់មាន០៦នាក់ បុរស២នាក់ ស្ត្រី៤នាក់ តែពេលសមត្ថកិច្ចទៅដល់កន្លែងកើតហេតុ ឃើញតែស្ត្រី៤នាក់ស្លាប់ម្នាក់ របួសធ្ងន់០៣នាក់ និងបុរសម្នាក់ស្លាប់តាមដងផ្លូវ រីឯបុរសម្នាក់ទៀតមិនឃើញ ។
តាមសំដីសមត្ថកិច្ចដែលប្រចាំការគោលដៅក្បែរកន្លែងកើតហេតុបានប្រាប់ថា មុនមានហេតុការណ៍ខាងលើគាត់បានឃើញប្រុសស្រីខាងលើជិះម៉ូតូឌុបគ្នា បើកប្រដេញគ្នាតាមផ្លូវជាតិលេខ០៤ ក្នុងទិសដៅពីកើតទៅលិចក្នុងល្បឿនលឿនមួយសន្ទុះ ក្រោយមានគេរាយការណ៍ថា ក្រុមយុវជនខាងលើជិះម៉ូតូទៅបុកជាមួយរថយន្ត ពណ៌ទឹកប្រាក់ដែលបើកបញ្ជ្រាសគ្នាបណ្តាលឲ្យមានរបួស និងស្លាប់នៅចំណុចខាងលើទៅ
ហើយ ។
តាមសំដីស្ត្រីម្នាក់ឈ្មោះ សេង ស្រីរ៉ាត់ អាយុ២០ឆ្នាំ មុខរបរកម្មការនីរោងចក្រ ស្នាក់នៅភូមិស្លា ឃុំវ័ល្លិ៍ស ស្រុកសំរោងទង ខេត្តកំពងស្ពឺ ជាអ្នករួមដំណើរដោយ(ជិះម៉ូតូជាមួយអ្នកស្លាប់ទាំង២នាក់)ខាងលើ បានប្រាប់ថា មុនកើតហេតុពួកខ្លួនបាននាំគ្នាជិះម៉ូតូឌុបគ្នា មកលេងក្លិបនៅម្តុំផ្លូវវេងស្រេង ដោយជិះម៉ូតូចំនួន២គ្រឿងដោយមួយគ្រឿងៗមានគ្នា០៣នាក់ ខ្លួនជិះម៉ូតូហុងដាឌ្រីម ២០១៨ស្ត្រី២នាក់ ប្រុសម្នាក់ និងម៉ូតូមួយគ្រឿងទៀតម៉ាក ពណ៌ខៀវមានគ្នា០៣នាក់ស្ត្រី២នាក់ដូចគ្នា ចេញពីក្លិបគោលបំណងជិះទៅផ្ទះវិញក៏ជួបគ្រោះថ្នាក់ខាងលើតែម្តង តែសំណាងល្អរូបគាត់របួសបាក់ជើងឆ្វេងប៉ុណ្ណោះ ។
ក្រោយកើតហេតុសពប្រុសស្រីខាងលើរកសាច់ញាតិមិនទាន់ឃើញសមត្ថកិច្ចបានសម្រេចដឹកយកមករក្សាទុកនៅវត្តទឹកថ្លាបណ្តោះអាសន្ន សិនរង់ចាំសាច់ញាតិមកទទួលពេលក្រោយ ដោយឡែកអ្នករបួសស្ត្រីម្នាក់បានបញ្ជូនទៅមន្ទីពេទ្យ និងស្ត្រី២នាក់ទៀតសម្រាកនៅគ្លីនិកឯកជន ៕
ចែករំលែកព័តមាននេះ