ខេត្តសៀមរាប ៖ នគរបាលខេត្តសៀមរាប នៅវេលាម៉ោង0៤និង៣០នាទីរសៀល ថ្ងៃទី០៩ ខែមីនា ឆ្នាំ២០១៨ បានធ្វើសន្និសីទកាសែតបង្ហាញមុខជនឆបោកម្នាក់ ដែលបានជួលរថយន្តរបស់បងប្អូនប្រជាពលរដ្ឋក្នុងខេត្តសៀមរាប យកទៅលក់អស់ជាង៣០គ្រឿង និងបានដកហូតបានរថយន្តចំនួន១០គ្រឿងមកវិញហើយ ប៉ុន្តែនៅមួយចំនួនធំទៀតកំពុងស្រាវជ្រាវ ។
លោកឧត្តមសេនីយ៍ត្រី ភឹង ចន្តារ៉េត ស្នងការរងទទួលបន្ទុកកណ្តាលយុត្តិធម៌ នៃស្នងការដ្ឋាននគរបាលខេត្តសៀមរាបបានឲ្យដឹងថា កម្លាំងនគរបាលខេត្តសៀមរាប បានធ្វើការឃាត់ខ្លួនជនសង្ស័យម្នាក់ ទៅតាមបណ្តឹងជនរងគ្រោះ ករណីជួលរថយន្តរបស់បងប្អូនប្រជាពលរដ្ឋក្នុងតម្លៃខ្ពស់រួចយកទៅលក់នៅតាមបណ្តាខេត្តមួយចំនួន ។
លោកបន្តថា ជនសង្ស័យរូបនេះមានឈ្មោះ អៀង វាសនា ភេទប្រុស អាយុ២៥ឆ្នាំ ទីលំនៅភូមិជ្រៃ ឃុំកណ្តែក ស្រុកប្រាសទបាគង ខេត្តសៀមរាប ។ លោកបន្តថា បច្ចុប្បន្ននេះ ខាងលោកទទួលបានបណ្តឹងរបស់ជនរងគ្រោះបានចំនួន២៨នាក់ ដែលមានរថយន្តសរុបចំនួន៣១គ្រឿង ។
លោកបន្តថា ជនសង្ស័យរូបនេះ បានឆបោកជនរងគ្រោះ ដោយនិយាយថា គាត់ជួលរថយន្តទាំងនេះយកទៅជួលបន្តឲ្យជនជាតិចិនក្នុង១ខែតម្លៃចាប់ពី៤០០ទៅ៦០០ដុល្លារ ។ ក្នុងនោះជនសង្ស័យ ក៏បានប្រើល្បិចលើកទឹកចិត្តបង់លុយ២មុនខែ ដើម្បីឲ្យម្ចាស់ទុកចិត្ត ។
លោកបានបន្តថា រហូតមកទល់ពេលនេះ កម្លាំងនគរបាលជំនាញ នៃស្នងការដ្ឋានខេត្តសៀមរាប រកឃើញរថយន្តទំនើបៗបានមកវិញចំនួន១០គ្រឿង និងរក្សាទុក៥គ្រឿង នៅការ៉ាស់សិន រង់ចាំតុលាការសម្រេច ហើយក៏កំពុងបន្តស្រាវជ្រាវស្វែងរកបន្ថែមទៀត ។
លោកបានសំណូមពរឲ្យបងប្អូនប្រជាពលរដ្ឋទាំងអស់មេត្តាប្រុងប្រយ័ត្នឲ្យបានខ្ពស់ចំពោះការទិញ ឬក៏លក់ដូរផ្សេងៗ ក្នុងនោះត្រូវតែពិនិត្យឯកសារឲ្យបានត្រឹមត្រូវផង ។ លោកបញ្ជាក់ថា ចំពោះកន្លែងដែលបានទិញរបស់ចោរកម្មនោះ គឺសម្រេចលើខាងតុលាការ ។
បន្ទាប់ពីនគរបាលជំនាញសាកសួររួច ជនសង្ស័យបានសារភាព ពីកំហុសរបស់ខ្លួន ហើយបច្ចុប្បន្ននេះកម្លាំងនគរបាលកំពុងរៀបចំសំណុំរឿងដើម្បីបញ្ជូនជនសង្ស័យទៅតុលាការចាត់ការតាមផ្លូវច្បាប់ ។ សូមរំឭកថា ការឃាត់ខ្លួនជនសង្ស័យរូបនេះធ្វើឡើងនៅថ្ងៃទី០៤ ខែមីនា ឆ្នាំ២០១៨ ស្ថិតនៅភូមិទ្សិណខាងត្បូង សង្កាត់គោកចក ក្រុងសៀមរាប បន្ទាប់ពីជនរងគ្រោះបានប្រទះឃើញរថយន្តរបស់គាត់ត្រូវបានគេដាក់រាំងលក់នៅម្តុំផ្លូវ៦០ម៉ែត្រ ។
ប្រភពមួយបានឲ្យដឹងថា ជនសង្ស័យខាងលើនេះបានទិញឈ្មោះចូលធ្វើប៉េអឹមនៅខេត្តបន្ទាយមានជ័យផងដែរ និងសុំផ្ទេរមកខេត្តសៀមរាប ប៉ុន្តែមិនទាន់បានសម្រេច ក៏ត្រូវនគរបាលចាប់បានតែម្តង ។ ប្រភពបន្តថា ជនស្ស័យបានជួលឡានយកទៅលក់អស់ជាច្រើនគ្រឿងនេះ គឺដើម្បីយកលុយទៅលេងល្បែងនៅកាស៊ីណូក្នុងក្រុងប៉ោយប៉ែត ខេត្តបន្ទាយជ័យ ៕
ចែករំលែកព័តមាននេះ