ខេត្តសៀមរាប ៖ អណ្តូងទឹកស្អាតមួយកន្លែង ស្ថិតនៅភូមិគោលស្នួល ឃុំគោកដូង ស្រុកអង្គរជុំ ខេត្តសៀមរាប (ជាអណ្ដូងស្នប់អាហ្វ្រីដេស៍) ឧបត្ថម្ភដោយ Veltinis…
ខេត្តសៀមរាប ៖ អណ្តូងទឹកស្អាតមួយកន្លែង ស្ថិតនៅភូមិគោលស្នួល ឃុំគោកដូង ស្រុកអង្គរជុំ ខេត្តសៀមរាប (ជាអណ្ដូងស្នប់អាហ្វ្រីដេស៍) ឧបត្ថម្ភដោយ Veltinis International Group (VIG) ត្រូវបានធ្វើការប្រគល់ជូនដល់ប្រជាពលនៅក្នុងសហគមន៍ ផ្តល់តាមរយៈសាខាកាកបាទក្រហមកម្ពុជា ខេត្តសៀមរាប កាលពីរសៀលថ្ងៃទី០៩ ខែមីនា ឆ្នាំ២០១៨ ក្រោមវត្តមានរបស់លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ផងដែរ ។
ក្នុងកិច្ចស្វាគមន៍របស់លោក លុក ផុស អភិបាល នៃគណៈអភិបាលស្រុកអង្គរជុំបានគូសបញ្ជាក់ថា នៅតាមបណ្តាភូមិមួយចំនួន កំពុងប្រឈមទៅនឹងការខ្វះខាតទឹកស្អាតប្រើប្រាស់ដែលកន្លងមកប្រជាពលរដ្ឋទាំងនោះបានប្រើប្រាស់ទឹកដែលគ្មានអនាម័យ ដូចជាអណ្តូងដៃតូចៗ ទឹកស្រះ និងទិញទឹកជាដើម ។
តាមសេចក្តីរាយការណ៍របស់លោក ស៊ុំ សំអន នាយកសាខាកាកបាទក្រហមកម្ពុជាខេត្ត បានគូសបញ្ជាក់ថា នេះជាអណ្តូងទឹកទី២៦ ហើយបន្ទាប់ពីអណ្តូងទី២៤ និង២៥ ដែលសាខាកាកបាទក្រហមកម្ពុជាខេត្ត ផ្តល់ជូនប្រជាពលរដ្ឋនៅស្រុកស្វាយលើ ហើយក៏ជាអណ្តូងទឹកទី១ ក្នុងស្រុកអង្គរជុំផងដែរ ដែលបានផ្តល់ផលប្រយោជន៍ដល់ប្រជាពលរដ្ឋអ្នកទទួលផល១៣គ្រួសារ មានសមាជិកសរុប៧៣នាក់ បានប្រើប្រាស់ទាំងប្រាំង និងវស្សា ដោយគ្មានការព្រួយបារម្ភដូចមុនឡើយ ។
មានប្រសាសន៍នាឱកាសនោះ លោកស្រី គួយ ណាលីន ឃឹម ប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានធ្វើការសំណេះសំណាល និងប្រគល់អណ្ដូងទឹកជូនបងប្អូនប្រជាពលរដ្ឋក្នុងភូមិគោកស្នួល ដែលខ្វះទឹកស្អាតសម្រាប់ប្រើប្រាស់ប្រចាំថ្ងៃ ។ ក្នុងនោះដែរ លោកស្រីក៏បានពាំនាំមកនូវប្រសាសន៍ផ្ដាំផ្ញើសួរសុខទុក្ខពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចលោកប្រធានគណៈកម្មាធិការសាខាកាកបាទក្រហមខេត្ត ដែលតែងតែយកចិត្តទុកដាក់គិតគូរចំពោះប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ អំពីសុខភាព និងអនាម័យ ។
លោកស្រី គួយ ណាលីន ឃឹម ប៊ុនសុង ក៏បានលើកឡើងថា បញ្ហាសុខភាព គឺជាកត្តាចម្បងសម្រាប់មនុស្សយើងគ្រប់រូប ដូច្នេះបញ្ហាទឹកស្អាត ក៏ជាកត្តាដ៏ចាំបាច់សម្រាប់មនុស្សជាតិយើងគ្រប់រូប ក្នុងការរស់នៅប្រចាំថ្ងៃ ដើម្បីបរិភោគប្រើប្រាស់ជាអចិន្ត្រៃយ៍ទឹកគឺជា ថាមពលចិញ្ចឹមសរីរាង្គកាយមនុស្ស សត្វ និងរុក្ខជាតិ ។ ម្យ៉ាងទៀតអណ្តូងទឹកនេះ ក៏ជាសមទ្ធិផលថ្មីសម្រាប់បងប្អូនប្រជាពលរដ្ឋនៅភូមិគោកស្នួល បានប្រើប្រាស់គ្រប់ៗគ្នា ដែលមិនបានចោទជាបញ្ហាការកង្វះខាតទឹកប្រើប្រាស់ទៀតឡើយ ទាំងរដូវប្រាំង និងវស្សា។
លោកស្រីក៏បានធ្វើការថ្លែងអំណរគុណ ចំពោះឧបត្ថម្ភដោយ Veltinis International Group (VIG) ដែលបានផ្តល់អណ្តូងទឹកនេះ ដល់ប្រជាជនក្នុងឃុំគោកដូង ស្រុកអង្គរជុំ ដែលសបញ្ជាក់នូវទឹកចិត្តដ៏សប្បុរសធម៌ ដើម្បីរួមចំណែក ជាមួយរាជរដ្ឋាភិបាលកម្ពុជា កាត់បន្ថយភាពក្រីក្ររបស់ប្រជាពលរដ្ឋ តាមរយៈការធ្វើឲ្យប្រសើរឡើងលើវិស័យប្រើប្រាស់ទឹកស្អាត និង ដើម្បីសុខុមាលភាពរបស់ប្រជាពលរដ្ឋ “ទឹកជាប្រភពនៃជីវិត” ។ លោកស្រីក៏បានធ្វើការផ្តាំផ្ញើដល់ប្រជាពលរដ្ឋក្នុងសហគមន៍ទាំងមូល ត្រូវមើលថែរក្សាអណ្តូងទឹកនេះឲ្យបានល្អ ដើម្បីជាប្រយោជន៍ប្រើប្រាស់បានយូរអង្វែងរបស់បងប្អូនទៅអនាគតផងដែរ ។
ក្នុងនោះដែរ លោកស្រី ក៏បាននាំយកអំណោយមួយចំនួនចែកជូនដល់បងប្អូនប្រជាពលរដ្ឋ ដែលបានចូល រួមក្នុងពិធីប្រគល់អណ្តូងនេះ ដោយម្នាក់ៗទទួលបាន សារុង១ និងថវិកា១ម៉ឺនរៀលផងដែរ ៕
ចែករំលែកព័តមាននេះ