លោកដូណាល់ ត្រាំ យល់ព្រមជួបជាមួយលោកគីម ជុងអ៊ុន មុនដំណាច់
សហរដ្ឋអាមេរិក-ប្រទេសកូរ៉េខាងជើង ៖ យោងតាម YONHAP ថា បេសកជនពិសេសកូរ៉េខាងត្បូង លោក CHUNG EUI YONG…
សហរដ្ឋអាមេរិក-ប្រទេសកូរ៉េខាងជើង ៖ យោងតាម YONHAP ថា បេសកជនពិសេសកូរ៉េខាងត្បូង លោក CHUNG EUI YONG អះអាងនាថ្ងៃទី៨ មីនា ថា ប្រធានាធិបតីអាេមរិក លោកដូណាល់ ត្រាំ និងមេដឹកនាំកូរ៉េខាងជើង លោកគីម ជុងអ៊ុន បានព្រមព្រៀងជួបគ្នាមុនដំណាច់ខែឧសភា ឆ្នាំ២០១៨នេះ ។
នេះជាការប្រកាសគួរឱ្យភ្ញាក់ផ្អើលមួយ ដែលកើតមានក្រោយការជួបគ្នារវាងគណៈ
ប្រតិភូជាន់ខ្ពស់កូរ៉េខាងត្បូងមួយ និងលោកគីម ជុងអ៊ុន បន្ទាប់ពីភាពតានតឹងខ្លាំងបំផុតរយៈពេល២ឆ្នាំទាក់ទិននឹងកម្មវិធីនុយក្លេអ៊ែរ និងបាលីស្ទិករបស់កូរ៉េខាងជើង ។
ក្នុងសង្កថាយ៉ាងខ្លីមួយឯវិមានប្រធានាធិបតីកូរ៉េខាងត្បូង លោក CHUNG EUI YONG ទីប្រឹក្សាសន្តិសុខជាតិកូរ៉េខាងត្បូងប្រកាសថា លោកត្រាំ បានយល់ព្រមទទួលយកការអញ្ជើញរបស់លោកគីម ជុងអ៊ុន ហើយសន្យាជួបលោកនាចុងខែឧសភា ។ សេតវិមានក៏អះអាងដែរថា ប្រធានាធិបតីអាមេរិក បានទទួលយកសេចក្តីអញ្ជើញនេះ ។ ទីកន្លែងនៃការជួបគ្នាបែបនេះរវាងប្រធានាធិបតីទី៤៥របស់សហរដ្ឋអាមេរិក និងមេដឹកនាំកូរ៉េខាងជើងដែលកន្លងទៅលោកចាត់ទុកថាជាមនុស្សឆ្កួតនៅពុំទាន់បញ្ជាក់នៅឡើយ ។
លោក CHUNG បញ្ជាក់ម្យ៉ាងទៀតថា លោកគីម ជុងអ៊ុន សន្យាអនុវត្តការរំសាយនុយក្លេអ៊ែរនៅឧបទ្វីបកូរ៉េ ហើយក៏បានសន្យាបញ្ឈប់រាល់ការសាកល្បងនុយក្លេអ៊ែរ ឬមីស៊ីល ។
ការប្រកាសនេះក៏កើតមានដែរ ក្រោយភាពធូរស្រាល គួរឱ្យកត់សម្គាល់នៅឧបទ្វីបកូរ៉េតាំងពីដើមឆ្នាំនេះមក ជាមួយការចូលរួមរបស់កូរ៉េខាជើងក្នុងការប្រកួតកីឡាអូឡាំពិករដូវរងានៅ PYEONGCHANG ។
ក្រោយការជួបពិភាក្សាគ្នាយ៉ាងយូរកាលពីថ្ងៃទី៥ មីនា ជាមួយមេដឹកនាំកូរ៉េខាងជើង លោកគីម ជុងអ៊ុន លោក CHUNG ធ្លាប់អះអាងថា លោកគីម ជុងអ៊ុន ចាប់ពីពេលនេះតទៅត្រៀមជំរុញលើសំណុំរឿងអាវុធនុយក្លេអ៊ែររបស់ក្រុងព្យុងយ៉ាង ប្រសិនបើការគំរាមកំហែងខាងយោធាទាំងឡាយប្រឆាំងកូរ៉ខាងជើងលែងមានតទៅទៀត និងប្រសិនបើសន្តិសុខនៃរបបរបស់លោកត្រូវបានធានា ។
ក្រោយបេសកកម្មនេះនៅក្រុងព្យុងយ៉ាងវិមានប្រធានាធិបតីកូរ៉េខាងត្បូងធ្លាប់និយាយថា កូរ៉េខាងជើងត្រៀមខ្លួនធ្វើការចរចាដោយស្មោះសរជាមួយសហរដ្ឋអាេមរិក ដើម្បីលើកពីបញ្ហារំសាយនុយក្លេអ៊ែរ និងការផ្អាករាល់ការសាកល្បងនុយក្លេអ៊ែរ ឬមីស៊ីលក្នុងអំឡុងពេលនៃការចរចាគ្នា ។
យោងតាមក្រុងសេអ៊ូលថា កូរ៉េទាំង២ក៏សម្រេចផងដែរធ្វើការជួបគ្នាកំពូលអន្តរកូរ៉េលើកទី៣នាដំណាច់ខែមេសា ក្រោយការជួបគ្នាកំពូលឆ្នាំ២០០០ និងឆ្នាំ២០០៧ ។ ការជួបគ្នាកំពូលនេះនឹងប្រព្រឹត្តទៅនៅភូមិប៉ានមុនហ្សូមនៅកណ្តាលតំបន់ហាមមិនឱ្យមានកងទ័ពដែលពុះចែកកូរ៉េទាំង២ ។
ប្រធានាធិបតីអាមេរិក លោកត្រាំ បានស្វាគមន៍ចំពោះសញ្ញានៃការបើកចំហនេះរបស់កូរ៉េខាងជើង តែដោយអំពាវនាវឱ្យមានការប្រុងប្រយ័ត្ន រួចដោយអះអាងជាថ្មីថា រាល់ការជ្រើសរើសស្ថិតនៅលើតុរួចហើយ ។ លោកត្រាំ ថ្លែងថា សេចក្តីប្រកាសមកពីកូរ៉េខាងត្បូងក៏ដូចមកពីកូរ៉េខាងជើងមានលក្ខណៈវិជ្ជមានបំផុត ។ នេះនឹងជារឿងល្អសម្រាប់ពិភពលោក ទាំងសម្រាប់កូរ៉េខាងជើងទាំងសម្រាប់ឧបទ្វីបកូរ៉េ ក៏ប៉ុន្តែយើងចាំមើលតើនឹងមានអ្វីកើតមានទៀត ៕
ចែករំលែកព័តមាននេះ