រាជធានីភ្នំពេញ ៖ សហភាពសហព័ន្ធយុវជនកម្ពុជាបានប្រកាសជាផ្លូវការនូវដំណើរការរៀបចំព្រឹត្តិការណ៍អង្គរសង្ក្រាន្តឆ្នាំ២០១៨ ដើម្បីអបអរពិធីបុណ្យចូលឆ្នាំប្រពៃណីខ្មែរ ដែលនឹងឈានមកដល់នៅខែក្រោយនេះ។ ព្រឹត្តិការណ៍ប្រវត្តិសាស្ត្រមួយនេះ ពិតជាបានធ្វើឲ្យព្រះរាជាណាចក្រអច្ឆរិយដ៏វ័យចំណាស់នៅអាស៊ីអាគ្នេយ៍មួយនេះ កាន់តែល្បីល្បាញលើឆាកអន្តរជាតិ តាមរយៈការមកឃើញដោយផ្ទាល់ភ្នែក ដែលខុសពីគ្រាន់តែស្ដាប់ការបរិយាយ ។
នៅឆ្នាំ២០១៨នេះ អង្គរសង្ក្រាន្ដនឹងប្រព្រឹត្តទៅក្រោមប្រធានបទ «សាទរមរតកដូនតា» ដោយរំពឹងនឹងទទួលស្វាគមន៍ភ្ញៀវទេសចរជាតិ និងអន្តរជាតិរាប់លាននាក់មកទស្សនាកម្មវិធីជាច្រើន ដែលរៀបចំដោយសហភាពសហព័ន្ធយុវជនកម្ពុជា ។
ថ្លែងនៅក្នុងសន្និសីទសារព័ត៌មាននាព្រឹកថ្ងៃទី៦ មីនា លោក ហ៊ុន ម៉ានី ប្រធានគណៈកម្មការរៀបចំព្រឹត្តិការណ៍អង្គរសង្ក្រាន្ត និងជាប្រធានក្រុមការងារប្រតិបត្តិការនៃព្រឹត្តិការណ៍អង្គរសង្ក្រាន្ត បានឲ្យដឹងថា នេះជាលើកទី៦ ហើយដែលរូបភាពអង្គរសង្ក្រាន្តបានរំលេចឡើងដោយទទួលបានភាពជោគជ័យគាំទ្រទាំងជាតិ និងអន្តរជាតិ ។ សម្រាប់ព្រឹត្តិការណ៍ឆ្នាំនេះរៀបចំក្រោមប្រធានបទ«សាទរមរតកដូនតា» ព្រមជាមួយការបង្កើតកម្មវិធីដ៏ច្រើនពិសេសជាងមុន។
លោកបន្ដថា ៖« យើងបានសហការជាមួយក្រសួងទេសចរណ៍ ក្រសួងវប្បធម៌ និងអាជ្ញាធរអប្សរា សុទ្ធតែជាអ្នកយល់ដឹងយ៉ាងច្បាស់ពីការរៀបចំនេះ ។ មួយទៀត ដោយសារតែមានការលើកទឹកចិត្តពីបងប្អូនក្នុងនិងក្រៅប្រទេស ទើបយើងអាចបន្តបានតទៅទៀត»។
លោកបញ្ជាក់ថា ៖« កត្តាសំខាន់ គឺឆន្ទៈរបស់ក្រុមការងារដែលជាយុវជនស្ម័គ្រចិត្ត មិនគិតនឿយហត់ ប៉ុន្ដែពួកគេសប្បាយរីករាយនឹងការងារ ហើយយើងនៅតែផ្តល់ស្នាមញញឹមដើម្បីជាតិ និងអន្តរជាតិ » ។
លោកលើកឡើងទៀតថា នេះជាការចំណេញទៅដល់សេដ្ឋកិច្ចជាតិ ។ បើតាមរបាយការណ៍ក្រសួងទេសចរណ៍ ព្រឹត្តិការណ៍នេះបានទាក់ទាញភ្ញៀវទេសចរកើនឡើងពី១៧៩.១៥៤នាក់ក្នុងឆ្នាំ២០១៣ រហូតដល់១,៦លាននាក់ក្នុងឆ្នាំ២០១៧ មានកំណើនជាបន្ដបន្ទាប់ ។ លើសពីនេះ អង្គរសង្ក្រាន្តកំពុងតែក្លាយជាព្រឹត្តិការណ៍គំរូមួយសម្រាប់ខេត្តដទៃទៀតប្រារព្ធឡើង ដើម្បីចូលរួមអបអរសាទរបុណ្យចូលឆ្នាំប្រពៃណីជាតិខ្មែរ ។
លោក សុខ សប្បាយណា ប្រធានលេខាធិការដ្ឋានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ត បានលើកឡើងដែរថា អង្គរសង្ក្រាន្តប្រព្រឹត្តទៅចាប់ពីថ្ងៃទី១៣ដល់ថ្ងៃទី១៦ មេសា ឆ្នាំ២០១៨ និងមានកម្មវិធីជាច្រើនដែលនឹងបង្ហាញពីអរិយធម៌ វប្បធម៌ ទំនៀមទម្លាប់ និងប្រពៃណីជាតិ ។
លោកបន្ដថា ៖« យើងមានកម្មវិធីមហោស្រពវប្បធម៌បុរាណ ក្រោមទិដ្ឋភាពកម្មវិធីល្ខោនព្រះរាជទ្រព្យរឿង «មហាវេស្សន្តរជាតក» ដែលដកស្រង់ចេញពីគម្ពីរទសជាតក។លើសពីនេះ មានកម្មវិធីភូមិខ្ញុំ កម្មវិធីភូមិបេតិកភណ្ឌវប្បធម៌ កម្មវិធីព្រៃប្រសិទ្ឋី កម្មវិធីសហស្សវិចិត្រវាយនា កម្មវិធីភូមិអាហារនៃក្តីស្រឡាញ់ កម្មវិធីទាញព្រ័ត្រមិត្តភាពអង្គរសង្ក្រាន្ត និងកម្មវិធីគុណល្បុក្កតោ ជាដើម » ។
រដ្ឋមន្ត្រីក្រសួងពាណិជ្ជកម្មក៏បានសម្តែងការកោតសរសើរចំពោះភាពឈ្លៀសវៃរបស់លោក ហ៊ុន ម៉ានី ក្នុងការដឹកនាំសហភាពសហព័ន្ធយុវជនកម្ពុជា ជាពិសេសផ្តួចផ្តើមបង្កើតឲ្យមានព្រឹត្តិការណ៍អង្គរសង្ក្រាន្តក្នុងឱកាសបុណ្យចូលឆ្នាំថ្មីប្រពៃណីជាតិ ដែលបានទាក់ទាញភ្ញៀវទេសចរជាតិ និងអន្តរជាតិរាប់លាននាក់ចូលមកទស្សនានៅក្នុងប្រទេសកម្ពុជា ហើយបាននាំមកនូវប្រាក់ចំណូលរាប់លានដុល្លារសម្រាប់ប្រជាពលរដ្ឋ និងអាជីវករនៅក្នុងខេត្តសៀមរាប ។
ថ្លែងក្នុងជំនួបពិភាក្សានាថ្ងៃដដែលនោះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានគូសបញ្ជាក់ថា ៖« ក្រសួងពាណិជ្ជកម្មនឹងបន្តកិច្ចសហការ និងគាំទ្រពេញទំហឹងចំពោះការរៀបចំព្រឹត្តិការណ៍អង្គរសង្ក្រាន្ត ឆ្នាំ២០១៨ នៅលើទឹកដីខេត្តសៀមរាប ក្រោមការចាត់ចែងរបស់សហភាពសហព័ន្ធយុវជនកម្ពុជា ដែលមានបេសកកម្មបណ្តុះបណ្តាលយុវជនកម្ពុជា ឱ្យក្លាយទៅជាសសរទ្រូង និងជាឆ្អឹងខ្នងនៃប្រទេសជាតិ » ។
សូមបញ្ជាក់ថា ព្រឹត្តិការណ៍អង្គរសង្ក្រាន្តឆ្នាំនេះ នឹងត្រូវរៀបចំឡើងរយៈពេល៤ថ្ងៃ (ថ្ងៃទី១៣ ដល់ថ្ងៃទី១៦ ខែមេសា) ក្រោមប្រធានបទ «សាទរមរតកដូនតា» ដើម្បីស្វាគមន៍ភ្ញៀវទេសចរគ្រប់ជាតិសាសន៍ ធ្វើការឈ្វេងយល់កេរដំណែលអរិយធម៌ វប្បធម៌ ទំនៀមទម្លាប់ និងស្នាដៃបុព្វបុរសខ្មែរ ។
ព្រឹត្តិការណ៍នេះ ក៏នឹងនាំមកនូវផ្ទាំងទស្សនីយភាពវប្បធម៌ជាច្រើនទម្រង់ដូចជា៖ ការលេងល្បែងប្រជាប្រិយ ការសម្តែងរបាំបុរាណ របាំប្រពៃណី និងរបាំប្រជាប្រិយ ព្រមទាំងការបង្ហាញជីវភាពរស់នៅរបស់ប្រជាពលរដ្ឋខ្មែរនៅតាមតំបន់ផ្សេងៗនៅខាងមុខប្រាសាទអង្គរវត្ត លានជល់ដំរី បរិវេណពិព័រណ៍ឃ្យុងយូ ផាប់ស្ទ្រីត និងសួនច្បារព្រះរាជដំណាក់នៃខេត្តសៀមរាប ៕
ចែករំលែកព័តមាននេះ