ខេត្តក្រចេះ ៖ មនុស្ស៨នាក់ដែលអាជ្ញាធរកំណត់ថា ជាមុខសញ្ញាមេខ្យល់ក្នុងការកៀងគ មនុស្សមកធ្វើការតវ៉ាបិទផ្លូវជាតិក្នុងរឿងវិវាទដីធ្លីដ៏តានតឹងមួយ និងត្រូវបានចាប់ខ្លួនគឺអាជ្ញាធរ គ្រោងនឹងបញ្ជូនទៅតុលាការនៅថ្ងៃទី៩ ខែមីនា ឆ្នាំ២០១៨ នេះដើម្បីបន្តនីតិវិធី ។ នេះបើតាមការបញ្ជាក់ ពីលោកព្រះរាជអាជ្ញារងអមសាលាដំបូងខេត្តក្រចេះលោក ជា សុភ័ក្ត្រ ។
បើតាមលោក ជា សុភ័ក្ត្រ បានបញ្ជាក់ឲ្យដឹងនៅថ្ងៃទី៩ ខែមីនា ឆ្នាំ២០១៨ នេះទៀតថា នៅមានជន ជាមុខសញ្ញាមេខ្យល់ជាច្រើននាក់ទៀតដែលបានកៀងគមនុស្សឲ្យមកកាប់ទន្ទ្រានរើរានដីព្រៃក្រុមហ៊ុនកាប់ខុសច្បាប់ហើយអាជ្ញាធរកំពុងតែស្រាវជ្រាវចាប់ខ្លួនផងដែរ ។ មនុសប្រុសស្រីចំនួន៨នាក់ ដែលអាជ្ញាធរបានចាប់ខ្លួនទាំងនេះសុទ្ធសឹងតែមានទីលំនៅក្នុងស្រុកស្នួល ។
ហើយការចាប់ខ្លួនរបស់ពួកគេ គឺបានធ្វើឡើងក្នុងពេលដែលក្រុមជនទាំងនេះរួមនឹងពលរដ្ឋចំណាកស្រុកក្រុមអ្នកតវ៉ាប្រមាណជាង២០០គ្រួសារផ្សេងទៀតបាននាំគ្នាប្រឆាំងតវ៉ាជាមួយនឹងអាជ្ញាធរក្នុងសំណុំរឿងវិវាទរហូតឈានឲ្យមានការតវ៉ាបិទផ្លូវជាតិលេខ6Aអស់រយៈពេលជាច្រើនម៉ោងនៅចំនុចភូមិជើងឃ្លេ ឃុំ២ធ្នូ ស្រុកស្នួល កាលពីថ្ងៃទី៨ មីនា ។
សំណុំរឿងវិវាទដីធ្លីរវាងពលរដ្ឋចំណាកស្រុកចំនួនជាង២០០គ្រួសារជាមួយនឹងក្រុមហ៊ុនចម្កាកៅស៊ូមេមត់ដែលមានជាក្រុមហ៊ុនមួយមានច្បាប់វិនិយោគដីសម្បទានសេដ្ឋកិច្ចមានទំហំជិត១ម៉ឺនហិកតានៅក្នុងភូមិសាស្ត្រស្រុកស្នួលលាតសន្ឋឹងដល់ខេត្តមណ្ឌលគីរី គឺបាន កើតមានអត់ឈប់ឈរមានរយៈពេលជាច្រើនឆ្នាំមកហើយ ។
ហើយបើទោះបីជាអជា្ញធរខេត្ត ស្រុក បានព្យាយាមចុះសម្របសម្រួលបែបណាក្តីក៏នៅមិនធូរស្រាលនោះដែរ ខណៈដែលពលរដ្ឋចំណាកស្រុក មកពីតាមបណ្តាខេត្តផ្សេងៗនៅតែជឿតាមការញុះញង់របស់មេខ្យល់បានសម្រុកចូលមកកាប់ទន្ទ្រានដីព្រៃ និងដីរបស់ក្រុមហ៊ុនមកធ្វើកម្មសិទ្ធយ៉ាងអនាធិបត្យេ ។
អភិបាលស្រុកស្នួលលោក គង់ គឹមនី បានបញ្ជាក់ឲ្យដឹងថា ក្នុងស្ថានភាពតានតឹងពី ពលរដ្ឋដែលបានមកប្រមូលផ្តុំគ្នាធ្វើតវ៉ាបិទផ្លូវ និងប៉ុនប៉ងបង្កហិង្សាមកលើអាជ្ញាធរដែល ចុះទៅសម្រសម្រួលរហូតឈានឲ្យមានការផ្ទុះអាវុធពីកងកម្លាំងប្រដាប់អាវុធកាលពីថ្ងៃទី៨ មីនា នោះគឺមិនមានគ្រោះថ្នាក់ដល់អាយុជីវិតនរណាម្នាក់ដូចតាមការលើកឡើងនោះទេគឺគ្រាន់តែមានរបួសតិចតួចទាំងសងខាងដោយសារមានការប៉ះទង្គិចគ្នា ៕
ចែករំលែកព័តមាននេះ