ខេត្តកំពង់ចាម ៖ រហូតមកដល់ព្រឹកថ្ងៃទី៣ មីនា សពស្ត្រីម្នាក់ដែលបានអណ្តែតមកទើរត្រង់ចំណុចវត្តជ្រោយថ្ម ស្ថិតនៅភូមិជ្រោយថ្ម សង្កាត់បឹងកុក ក្រុងកំពង់ចាម ដោយពាក់អាវយឺតពណ៌លឿង និងស្លៀកខោខូវប៊យជើងវែងពណ៌ខៀវ កាលពីវេលាម៉ោង៥ល្ងាច ថ្ងៃទី២ មីនា នោះ ត្រូវបានដឹងថា សពមានឈ្មោះម៉ន ចាន់ដារ៉ា ភេទស្រី អាយុ២៣ឆ្នាំ មានទីលំនៅក្នុងភូមិតាំងក្រង ឃុំស្វាយទាប ស្រុកចំការលើ ។
គួរកត់សម្គាល់ថា បងប្អូនខ្មែរអ៊ិស្លាម បានប្រទះឃើញសពស្ត្រីម្នាក់មិនស្គាល់អត្តសញ្ញាណបានផុសអណ្តែតនៅកណ្តាលទន្លេមេគង្គមុខវត្តជ្រោយថ្ម ហើយត្រូវបានលោកវរសេនីយ៍ត្រី សំ ផាត អធិការនគរបាលក្រុងកំពង់ចាម បានចាត់ឱ្យកម្លាំងក្រោមឱវាទរកទូកម៉ាស៊ីន ដើម្បីអូសយកសពនោះមកច្រាំងទន្លេមេគង្គធ្វើការត្រួតពិនិត្យ ។ រហូតមកដល់វេលាម៉ោង៧យប់ទៅហើយគេនៅតែមិនទាន់ស្គាល់អត្តសញ្ញាណអ្នករងគ្រោះនៅឡើយទេ ។ ផ្អែកតាមបញ្ជារបស់លោកស្នងការនគរបាលខេត្តបាន ឱ្យយកសពនេះទៅតម្កល់នៅវត្តបឹងកុកជាបណ្តោះអាសន្នសិន រង់ចាំក្រែងមានក្រុមសាច់ញាតិមកតាមរក។
លោកម៉ឹង សាវឿន នគរបាលបច្ចេកទេសខេត្តបានប្រាប់ថា តាមរយៈការពិនិត្យសពឃើញថានៅលើផ្ទៃមុខខាងឆ្វេងមានស្នាមហើមជាំ។ តាមការសន្និដ្ឋានថា អាចត្រូវគេសំលាប់នៅលើច្រាំងទន្លេ រួចហើយសែងមកទំលាក់ចូលក្នុងទឹកទន្លេមេគង្គ ហើយបានរសាត់មកទើរត្រង់ច្រាំងទន្លេមុខវត្តជ្រោយថ្មដែលបង្កឲ្យមានការភ្ញាក់ផ្អើលដល់អ្នកក្រុងកំពង់ចាម ក្មេងចាស់ប្រុសស្រីនាំគ្នាមកមើលជាបន្តបន្ទាប់ តែមិនមានអ្នកណាម្នាក់អះអាងថា ស្គាល់អ្នកស្លាប់នេះ រស់នៅទីណាទេ។
តាមប្រភពចុងក្រោយគឺបុរសឈ្មោះឡាយ ហ៊ាង អាយុ៥៦ឆ្នាំ ត្រូវជាឪពុកនៃសពបានប្រាប់ថា កូនស្រីគាត់ឈ្មោះចាន់ដារ៉ា កើតរោគសរសៃប្រសាទបានបាត់ចេញពីផ្ទះតាំងពីវេលាម៉ោង១០យប់ ថ្ងៃទី២៦ កុម្ភៈ ម៉្លេះមិនដឹងជាចេញទៅទីណាទេ ព្រោះសមាជិកគ្រួសារម្នាក់ៗបានតាមស្វែងរកគ្រប់ច្រកល្ហកតែគ្មានដំណឹងណាបន្តិចសោះ។ នាព្រឹកថ្ងៃទី២៧ កុម្ភៈ រូបគាត់បានតាមសួរនាំគេឯង និងបានសួរកំលាំងនគរបាលប៉ុស្តិ៍បុសខ្នុរ ត្រូវបានគេប្រាប់ថា បានប្រទះឃើញកូនស្រីរបស់គាត់ជិះកង់១គ្រឿង ចេញមកទិសខាងត្បូងតាមផ្លូវជាតិលេខ៧១ តែមិនដឹងថា ទៅណាទេ។
បុរសដដែលបន្តថា នៅព្រឹកថ្ងៃទី៣ មីនា គាត់បានជិះម៉ូតូឌុបតាមស្វែងរកកូនស្រីគ្រប់ទីកន្លែង តែមិនបានទទួលដំណឹងណាបន្តិចសោះ។ មិនអស់ចិត្តគាត់ទៅក្រុងកំពង់ចាម កាត់តាមវត្តជ្រោយថ្ម និងទៅស្ពានមាត់ឃ្មង់ ស្រុកត្បូងឃ្មុំទៀតនៅតែមិនមានពន្លឺណាមួយសោះ។ លុះពេលរសៀលបានជិះម៉ូតូត្រឡប់ទៅផ្ទះវិញទាំងអស់សង្ឃឹម។ មកដល់វេលាម៉ោង៩ព្រឹក ថ្ងៃទី៣ មីនា កំលាំងរដ្ឋបាលប៉ុស្តិ៍ឃុំស្វាយទាប បានមកប្រាប់ថា «មានសពស្រ្តីម្នាក់មិនស្គាល់អត្តសញ្ញាណផ្សាយតាមកាសែតកោះសន្តិភាពបានផុសអណ្តែតនៅមុខវត្តជ្រោយថ្ម ដោយមានស្លៀកខោខូវប៊យពណ៌ខៀវ និងពាក់អាវយឺតពណ៌លឿង និងមានពាក់ចិញ្ចៀនមេដៃខាងឆ្វេង»។ ព័ត៌មាននេះស៊ីសង្វាក់រឿងកូនស្រីទី២ របស់គាត់ដែលបានបាត់ចេញពីផ្ទះកាលពីថ្ងៃទី២៦ កុម្ភៈ ដែលមានភិនភាគដូចរៀបរាប់នេះ ដូច្នេះហើយទើបគាត់ប្រញាប់មកមើលនៅកន្លែងគេតំកល់សពនៅវត្តបឹងកុក ទើបដឹងប្រាកដថា ពិតជាកូនស្រីរបស់គាត់មែន។ សពកូនស្រីគាត់ត្រូវបានរៀបចំបូជាតាមប្រពៃណី នៅវត្តបឹងកុក ហើយយកធាតុទៅធ្វើបុណ្យនៅស្រុកចំការលើវិញ ៕
ចែករំលែកព័តមាននេះ