រាជធានីភ្នំពេញ ៖ នៅល្ងាចថ្ងៃសៅរ៍ ទី១០ ខែមីនា ស្អែកនេះ ស្ថានីយទូរទស្សន៍ប៉ុស្ដិ៍លេខ៥ បើកការប្រដាល់ជាលក្ខណៈអន្តរជាតិដូចសព្វដងទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរជាយរាជធានីភ្នំពេញ ។ ប៉ុន្តែសម្រាប់សប្ដាហ៍នេះមានការចាប់អារម្មណ៍ជាងមុន ដោយសារគូអន្តរជាតិ គឺជាជំនួបរវាងម្ចាស់ជើងឯក TV5 Knock Out Series By K-Cement ទើបជាប់រដូវកាលមុន ខណៈដែលសមាសភាពកីឡាករកម្ពុជា៤រូបដែលមានឈ្មោះប្រកួតគ្នាចាញ់ធ្លាក់ៗ ឆ្ពោះទៅដណ្ដើម
ជើងឯកសប្ដាហ៍នេះ ក៏មិនធម្មតា ។
កីឡាករកម្ពុជា គឺសៅ វណ្ណា ដែលមិនធ្លាប់ឡើងប្រកួតអន្តរជាតិទាល់តែសោះ នឹងបើកឆាកប្រកួតជាមួយកីឡាករថៃ ដោយការប្រកួតលើកនេះដ្បិតថាជាការប្រកួតមិត្តភាព តែក៏ដើម្បីការពារកិត្តិយសរបស់លោកក្នុងនាមជាម្ចាស់ជើងឯកថ្មីៗផងដែរ។
ការប្រកួតដែលនឹងធ្វើឡើងចាប់ពីម៉ោង៥ល្ងាចនៅព្រែកកំពិសនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា។
កីឡាករកម្ពុជា និងថៃ២រូប គឺសៅ វណ្ណា និងជើងខ្លាំងមកពីប្រទេសថៃឈ្មោះ Aram Boy នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ ។ អ្នករៀបចំការប្រកួតបានអះអាងថា នៅក្នុងថ្ងៃនោះ កីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈជម្រុះចាញ់ធ្លាក់ៗសម្រាប់សប្ដាហ៍ទី៧ផងដែរ ទើបមានអ្នកទស្សនាភាគច្រើនយល់ថា វត្តមានរបស់កីឡាករទាំងកម្ពុជា និងថៃ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈជម្រុះយកអ្នកខ្លាំងទៅប្រកួតយកជើងឯក ពិតជាធ្វើឱ្យអ្នកស្នេហាវិស័យប្រដាល់ចាប់អារម្មណ៍ ។ លោកអះអាងថា បើទោះជាការប្រកួតជ្រើសរើសជើងឯកមានការចាប់អារម្មណ៍រួចជាស្រេច ក៏ប៉ុស្តិ៍លេខ៥នៅតែបញ្ចូលការប្រកួតជាលក្ខណៈអន្តរជាតិមួយគូៗនៅក្នុងការប្រកួតនោះ ដើម្បីឱ្យរឹតតែទាក់ទាញ ។ វត្តមានរបស់សមាសភាពគូអន្តរជាតិក៏ត្រូវបានសម្រាំងយ៉ាងពិសេសផងដែរ ដើម្បីឱ្យអ្នកទស្សនាកាន់តែកន្ត្រាក់អារម្មណ៍ នៅពេលកីឡាករប្រកួតគ្នា ។
លោក សេង កដិកា ដែលជាអ្នករៀបចំកម្មវិធីប្រកួតបញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ សៅ វណ្ណា ដោយសារតែកីឡាកររូបនេះទើបតែបានតំណែងជើងឯកនៅប៉ុស្តិ៍លេខ៥ ក្នុងព្រឹត្តិការណ៍នេះដូចគ្នាកាលពីរដូវកាលមុន ។ លោកប្រកាសថា វត្តមានចុះមករបស់កីឡាករថៃ Aram Boy មានតែសៅ វណ្ណា ម្នាក់ប៉ុណ្ណោះដែលលោកសម្លឹងឃើញថាមានបទពិសោធន៍ និងមានសមត្ថភាពគ្រប់គ្រាន់អាចឱ្យប្រកួតជាមួយបាន ជាពិសេសគឺអ្នកទាំងពីរមានប្រភេទទម្ងន់ត្រូវគ្នា ។
លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរ មុនពេលផ្គូផ្គង ទើបលោកយល់ថា សមាសភាពរបស់កីឡាករកម្ពុជាមួយនេះ គ្រប់គ្រាន់សម្រាប់ឱ្យប៉ុស្តិ៍លេខ៥ដាក់ប្រកួតជាលក្ខណៈអន្តរជាតិ នៅថ្ងៃសៅរ៍នេះបាន។ លោកថា កីឡាករកម្ពុជា និងថៃ សុទ្ធតែត្រូវបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា។
មួយគូនេះ មានការចាប់អារម្មណ៍ភាគច្រើន ថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករ សៅ វណ្ណាមិនសូវមានទម្លាប់ឡើងវាយលាក់ដៃស្រាប់ទៅហើយ ស្របគ្នាដែលគេក៏ជាកីឡាករក្លាហាន ហើយវាយស៊ូ ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាង សៅ វណ្ណា និងកីឡាករថៃ Aram Boy គឺលោកជឿជាក់ ដោយសារកីឡាករថៃលោកស្គាល់ថ្វីដៃច្បាស់ ហើយ កីឡាករកម្ពុជាក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ។ បើទោះជាកីឡាករកម្ពុជាត្រូវប្រឈមនឹងកីឡាករថៃជាគូប្រកួតដែលជាកីឡាករល្អ ក៏លោកនៅតែប្រកាសថា សៅ វណ្ណា មានសមត្ថភាពគ្រប់គ្រាន់ក្នុងការតតាំង និងមានសង្ឃឹមឈ្នះច្រើន បើលោកផ្គូផ្គងដាក់កីឡាករកម្ពុជាផ្សេងឱ្យជំនួស ។
ជំនួបរវាងពួកគេ លោកនៅតែថាមិនមែនជារឿងចៃដន្យ និងមិនមែនជារឿងធម្មតា ដោយសារមានការព្រាងទុកពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង ។ លោកថា មួយគូនេះ អ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រកាន់តែខ្លាំងផងដែរ ។ ផ្ទុយទៅវិញ បើចាញ់ការប្រកួតហើយជាកីឡាករកម្ពុជាទៅទៀត គឺមិនត្រឹមតែអាម៉ាស់ប៉ុណ្ណោះទេ ក៏នឹងមានការរិះគន់ធ្ងន់ធ្ងរនៅក្នុងស្រទាប់អ្នកចូលចិត្តកីឡា ព្រោះតែថាប្រកួតលែងកើត ឬធ្លាក់ដៃ ជាពិសេសក្នុងនាមជាម្ចាស់ពានថ្មីៗបែបនេះ ។
យ៉ាងណាមិញ លោកថា កីឡាករកម្ពុជា ដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់មិនតិចដែរ ។ លោកថា ជំនួបរបស់ពួកគេត្រូវបានដាក់យ៉ាងពិសេសសម្រាប់ថ្ងៃសៅរ៍
សប្ដាហ៍នេះ តែក៏ទាមទារឱ្យប្រឹងប្រែងណាស់ដែរ គឺមិនអាចសំអាងត្រឹមថាជាកីឡាករល្បីស្រាប់ មានការគាំទ្រស្រាប់ ហើយក៏ខ្វះការប្រឹងប្រែងនោះទេ ។ លោកនៅតែចាត់ទុកថា សៅ វណ្ណា គឺជាធនធានកំពុងឡើងកូដងាយស្រួលបណ្ដុះ ដោយសារតែគេមានមហិច្ឆតាខ្លាំងចង់ក្លាយជាកីឡាករល្បី។
សម្រាប់ការប្រកួត៤នាក់ជាលក្ខណៈមិត្តភាពដែលជាការជម្រុះជើងឯកវគ្គថ្មីនៅសប្ដាហ៍ទី៧នេះវិញ លោកថានឹងមានវត្តមានសុទ្ធសឹងតែជាកីឡាករល្អៗនៅក្នុងពិភពប្រដាល់តែម្ដងប៉ះគ្នា ដោយសារក្នុងចំណោមសមាសភាពថ្មីទាំង៣២រូប គឺលោកបានដាក់ចម្រុះកីឡាករជើងចាស់ និងកីឡាករល្អៗ ដែលធានាថានឹងទាក់ទាញមិនចាញ់ការប្រកួតអន្តរជាតិដែលបានសម្រិតសម្រាំងឡើយ ។ លោក សេង កដិកា បញ្ជាក់ថា ការប្រកួតលើកនេះ ក៏មិនខុសពីរូបមន្តដែលធ្លាប់បានធ្វើនោះទេ គឺអ្នកឈ្នះបានឡើងវគ្គបន្ត ហើយសម្រាប់អ្នកចាញ់គឺធ្លាក់ហាលអាវ ។
លោកអះអាងថា ការប្រកួតរបស់លោក គឺមិនមានអ្នកឈ្នះក្នុងវគ្គណាមួយមិនឈ្នះដោយការប្រឹងប្រែងនោះទេ ដោយលោកបញ្ជាក់ថា អ្នកបានឡើងអង្គុយកៅអី៤នាក់បើកឆាកក្នុងវគ្គ១៦នាក់កាលពី៦សប្ដាហ៍កន្លងទៅ បានឡើងទាំងវេទនានោះផង ។
លោកថា ការប្រកួតចាញ់ធ្លាក់ៗ សុទ្ធតែទាមទារឱ្យកីឡាករម្នាក់ៗត្រៀមខ្លួនខុសពីការប្រកួតតាមរបៀបសន្សំពិន្ទុ ដោយសារតែអ្នកមិនខំប្រឹងប្រែង គឺដឹងតែធ្លាក់ហើយបាត់ឱកាស ដែលតម្រូវឱ្យអ្នកមានមុខឡើងប្រកួតត្រូវតែប្រកួតប្ដូរ មិនខ្វល់ពីគ្រោះថ្នាក់ និងលាក់ថ្វីដៃ ពោលគឺធ្វើយ៉ាងម៉េចឱ្យតែឈ្នះ៕
ចែករំលែកព័តមាននេះ