ខេត្តកណ្តាល ៖ រថយន្តមិនស្គាល់ម៉ាក១គ្រឿងបានបើកបុកបុរសវ័យចំណាស់ម្នាក់ ដើរតាមចិញ្ចើមថ្នល់ បណ្តាលឲ្យស្លាប់នៅនឹងកន្លែង រួចរថយន្តបង្កបន្ថែមល្បឿនបន្តដំណើរទៅមុខទៀត បើករត់គេចខ្លួនបាត់ស្រមោលមុនពេលសមត្ថកិច្ចចុះទៅដល់ ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី៨ ខែមីនា…
ខេត្តកណ្តាល ៖ រថយន្តមិនស្គាល់ម៉ាក១គ្រឿងបានបើកបុកបុរសវ័យចំណាស់ម្នាក់ ដើរតាមចិញ្ចើមថ្នល់ បណ្តាលឲ្យស្លាប់នៅនឹងកន្លែង រួចរថយន្តបង្កបន្ថែមល្បឿនបន្តដំណើរទៅមុខទៀត បើករត់គេចខ្លួនបាត់ស្រមោលមុនពេលសមត្ថកិច្ចចុះទៅដល់ ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី៨ ខែមីនា ឆ្នាំ២០១៨ នៅលើកំណាត់ផ្លូវជាតិលេខ៦A ស្ថិតក្នុងភូមិលើ ឃុំព្រែកអញ្ជាញ ស្រុកមុខកំពូល ខេត្តកណ្តាល ។
បើតាមស្ត្រីម្នាក់ឈ្មោះម៉ៅ ចាន់ អាយុ៥៦ឆ្នាំ មានទីលំនៅភូមិ -ឃុំកើតហេតុបានអះអាងថា ត្រូវជាប្រពន្ធជនរងគ្រោះ ដែលឈ្មោះ មុំ មានអាយុ៥៨ឆ្នាំ មានកូនចំនួន៤នាក់ ក្នុងនោះស្រី៣នាក់ ។ ស្ត្រីរូបនោះបន្តទៀតថា មុនពេលកើតហេតុរូបគាត់ និងប្តីបានទៅមើលគេរាំកម្សាន្តនៅកន្លែងបុណ្យដាលានក្នុងភូមិ ។ លុះដល់វេលាម៉ោងប្រហែលជាង៩យប់ ក៏បបួលគ្នាមកផ្ទះវិញ ។ ប៉ុន្តែរូបគាត់ជាប្រពន្ធបានឡើងជិះម៉ូតូជាមួយក្មួយ ហើយបានហៅប្តីឲ្យជិះដែរ តែជនរងគ្រោះមិនព្រមជិះទេ ដោយគាត់បានប្រាប់ប្រពន្ធថា ជិះទៅមុនទៅចាំគាត់ដើរតាមបណ្តោយចិញ្ចើមថ្នល់លេងៗតាមក្រោយ ។ ស្រាប់តែរូបគាត់ជាប្រពន្ធទៅដល់ផ្ទះមានគេទៅប្រាប់ថា ប្តីគាត់ត្រូវរថយន្តបុកស្លាប់ហើយ ពេលឮដូច្នេះធ្វើឲ្យរូបគាត់រន្ធត់ចិត្តស្ទើតែមិនជឿពេលមកដល់ឃើញប្តីត្រូវរថយន្តមិនស្គាល់បុកស្លាប់មែន ។
ស្ត្រីជាប្រពន្ធជនរងគ្រោះបញ្ជាក់បន្ថែមថា ប្តីគាត់ហូបស្រាដែរ តែគាត់ហូបមិនច្រើនទេ ស្រាសអស់តែ៥០០រៀល គឺគាត់ស្រវឹងហើយ មុនពេលជួបគ្រោះថ្នាក់ គឺប្តីរបស់គាត់បានដើរតាមចិញ្ចើមថ្នល់ទិសដៅពីស្ពានព្រែកតាម៉ាក់ ទៅព្រែកលៀប ខណៈដើរជិតដល់ផ្ទះក៏ត្រូវរថយន្តមិនម៉ាក បើកបរស្របទិសគ្នា បើកមកបុកទាំងកំរោលតែម្តង ។
ក្រោយទទួលបានព័ត៌មានសមត្ថកិច្ចនគរបាលជំនាញបានចុះទៅធ្វើការវាស់វែងចាត់ការតាមនីតិវិធី ។ រីឯសពធ្វើកំណត់ហេតុប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ